នាយករដ្ឋមន្ត្រីម៉ាឡេស៊ីលោក Mahathir Mohamad បានដាក់លិខិតលាលែងចេញពីតំណែងទៅកាន់ព្រះមហាក្សត្រម៉ាឡេស៊ីហើយ នៅថ្ងៃច័ន្ទនេះ ។
ការលាលែងដ៏គួរឱ្យភ្ញាក់ផ្អើលរបស់លោក Mahathir កើតឡើងចំពេលមានពាក្យចចាមអារាមថា លោកអាចនឹងបង្កើតរដ្ឋាភិបាលចម្រុះថ្មីមួយ ដោយមិនមានលោក Anwar Ibrahim។
ការិយាល័យនាយករដ្ឋមន្ត្រីបាននិយាយថា លិខិតលាលែងពីតំណែងនេះត្រូវបានដាក់នៅម៉ោង ១៣ ៈ ០០ (ម៉ោងក្នុងស្រុក) ។ មិនមានព័ត៌មានលម្អិតផ្សេងទៀតត្រូវបានបញ្ចូលក្នុងសេចក្តីថ្លែងការណ៍នោះទេ។
វាមិនច្បាស់ទេថា នរណានឹងក្លាយជានាយករដ្ឋមន្ត្រីបន្ទាប់ – ឬប្រសិនបើការបោះឆ្នោតថ្មីនឹងត្រូវបានធ្វើឡើង ។
នាយករដ្ឋមន្ត្រីវ័យ ៩៤ ឆ្នាំរូបនេះ ក៏បានលាឈប់ពីគណបក្ស Bersatu ដែលជាគណបក្សនយោបាយដែលគាត់ធ្វើជាប្រធាន។
Bersatu គឺជាផ្នែកមួយនៃសម្ព័ន្ធមិត្តប្រឆាំងដែលកំពុងកាន់អំណាច Pakatan Harapan ដែលលោក Mahathir បានចូលរួមនៅក្នុងឆ្នាំ ២០១៨ ជាមួយលោក Anwar ។
កាលពីថ្ងៃអាទិត្យ លោក Anwar បានចោទប្រកាន់លោក Mahathir និងបក្សរបស់លោកថា «ជាជនក្បត់ជាតិ» ដោយនិយាយថា ពួកគេមានផែនការបង្កើតរដ្ឋាភិបាលថ្មីមួយដោយគ្មានរូបលោក ។
ប៉ុន្តែកាលពីថ្ងៃច័ន្ទលោក Mahathir បានដាក់លិខិតលាលែងរបស់លោក។
ទោះបីយ៉ាងនេះក្តី អ្នកយកព័ត៌មានរបស់ទូរទស្សន៍ប៊ីប៊ីស៊ីប្រចាំនៅអាស៊ីអាគ្នេយ៍នៃទូរទស្សន៍ BBC លោក Jonathan Head មានប្រសាសន៍ថាលោក Mahathir ប្រហែលជាមិនបានត្រៀមខ្លួនជាស្រេចដើម្បីចុះចេញពីតំណែងឡើយ។
សូមបញ្ជាក់ថា នាយករដ្ឋមន្ត្រីចំណាស់ជាងគេបំផុត នៅលើពិភពលោករូបនេះ បានឡើងកាន់អំណាចនៅឆ្នាំ ២០១៨ ៕ ដោយ៖ លឹម ហុង (ប្រភព៖ bbc)
