ភ្នំពេញ៖ ទីភ្នាក់ងារបារាំងសម្រាប់ការអភិវឌ្ឍន៌ (AFD)ប្រចាំកម្ពុជា បានពិនិត្យមើលនូវវឌ្ឍនភាព និងជុំរុញការអនុវត្តគម្រោងលើវិស័យអភិវឌ្ឍន៍ទឹកស្អាត ក្រោមគម្រោងឥណទានរបស់ទីភ្នាក់ងារបារាំងសម្រាប់ការអភិវឌ្ឍន៌ (AFD) ជាមួយក្រសួងឧស្សាហកម្ម និងសិប្បកម្ម ហើយក៏ចង់ស្វែងយល់ពីតម្រូវការបន្ថែមនៃភាគីកម្ពុជា។
នៅថ្ងៃទី២៤ ខែ កុម្ភៈ ឆ្នាំ២០២០ លោកចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម បានទទួលជួបពិភាក្សាការងារជាមួយលោកស្រី Ophélie Bourhis ប្រធានទីភ្នាក់ងារបារាំងសម្រាប់ការអភិវឌ្ឍន៌ (AFD)ប្រចាំកម្ពុជា នៅទីស្តីការក្រសួង ក្នុងគោលបំណងនៃជំនួបពិភាក្សា គឺដើម្បីពិនិត្យមើលនូវវឌ្ឍនភាព និងជុំរុញការអនុវត្តគម្រោងលើវិស័យអភិវឌ្ឍន៌ទឹកស្អាត ក្រោមគម្រោងឥណទានរបស់ទីភ្នាក់ងារបារាំងសម្រាប់ការអភិវឌ្ឍន៌ (AFD) ជាមួយក្រសួងឧស្សាហកម្ម និងសិប្បកម្ម ហើយក៏ចង់ស្វែងយល់ពីតម្រូវការបន្ថែមនៃភាគីកម្ពុជាផងដែរ ។
លោកទេសរដ្ឋមន្ត្រី ចម ប្រសិទ្ធ បានអរគុណចំពោះទីភ្នាក់ងារAFD បារាំង ដែលបានដើរតួរយ៉ាងសំខាន់ ក្នុងការផ្តល់ឥណទានសម្បទាន ក៏ដូចជាជំនួយឥតសំណង ក្នុងការអនុវត្តគម្រោងប្រព័ន្ធទឹកស្អាត និងអនាម័យខេត្ត រួមទាំងជួយគាំទ្រដល់អាជីវករទឹកស្អាតឯកជនខ្នាតតូចនៅតាមបណ្តាខេត្តតាមរយៈហិរញ្ញប្បទានឥណទានសម្បទាន ផងដែរ ។
លោកកិត្តិសេដ្ឋាបណ្ឌិតទេសរដ្ឋមន្ត្រី បានលើកឡើងពីគោលនយោបាយវិស័យទឹកស្អាតនៅកម្ពុជា ក៏ដូចជាគោលដៅរបស់ក្រសួង ក្រោមការដឹកនាំរបស់សម្តេចតេជោប្រមុខរាជរដ្ឋាភិបាលកម្ពុជា គឺចង់ឲ្យប្រជាពលរដ្ឋគ្រប់រូបទទួលបានទឹកស្អាតប្រើប្រាស់គ្រប់ៗគ្នា ក្នុងតម្លៃសមរម្យ ជៀសផុតពីការឆ្លងជំងឺផ្សេងៗដោយការប្រើប្រាស់ទឹកមិនស្អាត ជាពិសេសត្រូវខិតខំប្រឹងប្រែងសម្រេចបាននូវគោលដៅអភិវឌ្ឍន៌ប្រកបដោយនិរន្តរភាពរបស់អង្គការសហប្រជាជាតិ ដែលយកឆ្នាំ២០៣០ ឲ្យប្រជាពលរដ្ឋទូទាំងពិភពលោកមានទឹកស្អាតប្រើប្រាស់ ។
ទាក់ទងចំណុចនេះ លោកកិត្តិសេដ្ឋាបណ្ឌិត បានស្នើសុំឲ្យទីភ្នាក់ងារAFDបារាំង ជួយបន្ថែមទៀត ទាំងជំនួយ និងកម្ចីឥណទានសម្បទាន រួមទាំងការវិនិយោគ ផង ដើម្បីជួយជំរុញកម្ពុជាសម្រេចបាននូវគោលនយោបាយទឹកស្អាតសម្រាប់ទីប្រជុំជនផងនិងគោលដៅអភិវឌ្ឍន៌ប្រកប ដោយនិរន្តរភាពរបស់អង្គការសហប្រជាជាតិផង ។
ទាក់ទងការវិនិយោគ លោកកិត្តិសេដ្ឋាបណ្ឌិតបានលើកទឹកចិត្តឲ្យក្រុមហ៊ុនបរទេសធំៗវិនិយោគបង្កើតរោងចក្រប្រព្រឹត្តិកម្មទឹកស្អាតតាមស្តង់ដារ ដើម្បីលក់ដុំបន្តដល់អាជីវករទឹកស្អាតក្នុងស្រុក ដែលអាចតបណ្តាញបំពេញភាពខ្វះខាតនៅតំបន់គោលដៅរបស់ខ្លួន ។
លោកស្រី Ophélie Bourhis ប្រធានទីភ្នាក់ងារបារាំងសម្រាប់ការអភិវឌ្ឍន៌ (AFD)ប្រចាំកម្ពុជា បានវាយតម្លៃខ្ពស់ចំពោះកិច្ចសហការដ៏ល្អរវាងទីភ្នាក់ងារ AFD បារាំង ជាមួយក្រសួងឧស្សាហកម្ម និងសិប្បកម្ម ក៏ដូចជាអង្គភាពរដ្ឋាករទឹកស្វយ័តនិងមិនស្វយ័តកម្ពុជា លើការអនុវត្តគម្រោងជាច្រើន ។ ក្នុងនោះ ទីភ្នាក់ងារ AFD បារាំង នឹងខិតខំសហការពន្លឿនការអនុវត្តគម្រោងរោងចក្រប្រព្រឹត្តសម្អាតទឹកថ្មី ដែលមានសមត្ថភាព ៥ម៉ឺនម៉ែត្រត្រីគុណ ក្នុងមួយថ្ងៃរបស់ខេត្ត បាត់ដំបង និងខេត្តកំពង់ចាម សមត្ថភាព ជាង០១ ម៉ឺន ម៉ែត្រត្រីគុណ ក្នុងមួយថ្ងៃ ។ ក្នុងនោះ លោកស្រីប្រធាន ទីភ្នាក់ងារ AFD បារាំង បានមើលឃើញស្របគ្នា ពីសារសំខាន់នៃការពង្រឹងសមត្ថភាពមន្ត្រី និងស្ថាប័ន ក៏ដូចជា អត្ថប្រយោជន៌នៃការទទួលបានឥណទានរបស់វិស័យទឹកស្អាតឯកជន សម្រាប់ពង្រឹងមូលដ្ឋានអាជីវកម្មរបស់ខ្លួន ៕ដោយ៖បញ្ញាស័ក្តិ
