បងប្អូនប្រជាពលរដ្ឋបានសម្តែងនូវការគាំទ្រ និងសាទរយ៉ាងខ្លាំង ចំពោះចំណាត់ការរបស់សមត្ថកិច្ចក្នុងការបំបែកសំបុកក្រុមឆបោកតាមបណ្តាញសង្គមហ្វេស៊ុក ក្រោមរូបភាពផ្ញើសម្ភារៈមានតម្លៃពីបរទេស ដែលកន្លងទៅនេះមានអ្នកចាញ់បោកមិនតិចនាក់នោះទេ ដោយក្នុងនោះក៏មានអ្នកឈានដល់ការសម្រេចធ្វើអត្តឃាតទៀតផង ។
ទាក់ទងនឹងករណីនេះ កាលពីថ្ងៃទី២៣ ខែកុម្ភៈ ឆ្នាំ២០២០ លោកឧត្តមសេនីយ៍ត្រី សំ តុលា មេបញ្ជាការកងរាជអាវុធហត្ថខេត្តកណ្ដាល បានអំពាវនាវដល់ប្រជាពលរដ្ឋ ពិសេសអ្នកប្រើប្រាស់បណ្ដាញសង្គមហ្វេស៊ុក ត្រូវតែបង្កើនការប្រុងប្រយ័ត្នខ្ពស់ ព្រោះបច្ចុប្បន្នជនល្មើសមានល្បិចច្រើន ដើម្បីលួងលោមបោកប្រាស់បងប្អូនខ្មែរយើង ស្ថិតក្រោមរូបភាពផ្ញើ «សម្ភារៈមានតម្លៃ» ពីបរទេស ។
ពិតណាស់ ជនរងគ្រោះឈ្មោះ វណ្ណនី ភេទស្រី អាយុ ៥៥ ឆ្នាំ មុខរបរកសិករ រស់នៅ ឃុំបឹងគ្រំ ស្រុកល្វាឯម ខេត្តកណ្តាល បានដាក់ពាក្យបណ្តឹងមកកងរាជអាវុធហត្ថស្រុកល្វាឯម ខេត្តកណ្តាល ប្តឹងពីម្ចាស់ហ្វេសប៊ុកមួយឈ្មោះ Michael Johnson ដែលក្រោយពីមានទំនាក់ទំនង ជាមួយគាត់តាម Facebook អស់រយៈពេលពីរខែ គឺឈ្មោះនេះបានធ្វើការលួងលោមបោកប្រាស់គាត់ តាមរយៈឆាត Messenger ក្រោមរូបភាពដើរតួជាជនជាតិអង់គ្លេស ធ្វើជាមានចិត្តអាណិតអាសូរដល់ជនរងគ្រោះមានជីវភាពខ្សត់ខ្សោយ ហេតុនេះជនរូបនេះក៏បាននិយាយធ្វើជាផ្ញើប្រាក់ គ្រឿងអលង្កា សម្ភារៈផ្សេងៗ ដើម្បីសង់ផ្ទះ និង ផ្គត់ផ្គង់ជីវភាពគ្រួសារឱ្យប្រសើរឡើង ។
បន្ទាប់មកម្ចាស់គណនីហ្វេសប៊ុកជនឆបោកខាងលើ ក៏បានទាក់ទងជនរងគ្រោះផ្ញើលុយឲ្យខ្លួនជាបន្តបន្ទាប់ ជាថ្នូរនឹងសេវារត់ការផ្សេងៗ គិតជាទឹកប្រាក់សរុបអស់ចំនួន ៨.៤៥០ ដុល្លារសហរដ្ឋអាមេរិក ។
ក្រោយពីទទួលបានពាក្យបណ្តឹង និង ការបំភ្លឺដូចខាងលើនេះរួច សមត្ថកិច្ចក៏បានកំណត់មុខសញ្ញាជនសង្ស័យឈ្មោះ រ៉ុម សុខលាង ភេទស្រី អាយុ ៣៥ ឆ្នាំ មុខរបរមិនពិតប្រាកដ ដែលជាអ្នកដើរតួជាអ្នកធ្វើការនៅប្រៃសណីយ៍ និង ជាអ្នកទៅដកប្រាក់ ដែលជនរងគ្រោះវេរប្រាក់តាមវីង (Wing) ដោយដកហូតវត្ថុតាងរួមមានម៉ូតូ ១ គ្រឿង ម៉ាកស្កុបពី ពណ៌ស ពាក់ស្លាកលេខភ្នំពេញ1IC-7298 , ទូរស័ព្ទ៤គ្រឿង, ក្រដាស់ដកលុយវីង១សន្លឹក (ដកមិនបានសម្រេច) ។
ក្រោយពេលឃាត់ខ្លួន ជនសង្ស័យខាងលើ ក៏បាននាំសមត្ថកិច្ចទៅបន្តចាប់ឃាត់បក្ខពួកខ្លួនចំនួន ៣ នាក់បន្ថែមទៀត ដែលមានទី១-ឈ្មោះ EMMANUEL SUNJAY អាយុ ៣១ ឆ្នាំ ជនជាតិនីហ្សេរីយ៉ា, ទី២-ឈ្មោះ GABRIEL PHILEP អាយុ ២១ ឆ្នាំ ជនជាតិនីហ្សេរីយ៉ា និងទី៣- ឈ្មោះ លីធី ង្វឿងថាវ ភេទស្រី អាយុ ២៦ ឆ្នាំ ជនជាតិវៀតណាម ។
សូមបញ្ជាក់ថា ជនបរទេសទាំង៣នាក់នេះ ស្នាក់នៅផ្ទះជួលជាមួយគ្នាក្នុងបុរី «លឹម ឈាងហាក់» ស្ថិតក្នុងភូមិម័ល សង្កាត់ដង្កោ ខណ្ឌដង្កោ ក្នុងនោះសមត្ថកិច្ច ចាប់យកវត្ថុតាងរួមមាន លេបថប ៣គ្រឿង, ទូរស័ព្ទ ៩ គ្រឿង,ដុំសម្រាប់ ប្រើអ៊ិនធើណេត ២ ដុំ, ស៊ីមកាតមួយចំនួនធំ និង សម្ភារមួយចំនួនទៀត ។ បច្ចុប្បន្នជនសង្ស័យ និង វត្ថុតាងត្រូវបានបញ្ជូនទៅសាលាដំបូងខេត្តកណ្តាល ដើម្បីចាត់ការតាមច្បាប់ ។
បន្ទាប់ធ្វើការឃាត់ខ្លួនរួច កងរាជអាវុធហត្ថខេត្តកណ្តាល បានសហការគ្នាជាមួយស្នងការដ្ឋាននគរបាលខេត្តកណ្តាល ស្រាវជ្រាវរកឃើញថា ជនបរទេសទាំងបីនាក់នេះ មកស្នាក់នៅក្នុងប្រទេសកម្ពុជា ដោយខុសច្បាប់ និងមានបទល្មើសផ្សេងទៀត ។
ដោយមានការសម្របសម្រួលពីលោក លាវ ស្រេង ព្រះរាជអាជ្ញាអមសាលាដំបូងខេត្តកណ្តាល ក្រុមឆបោកទាំងជនជាតិខ្មែរ និងបរទេសទាំងនេះ ត្រូវបានសមត្ថកិច្ចកងរាជអាវុធហត្ថខេត្តកណ្តាល បានប្រគល់ជូនទៅស្នងការដ្ឋាននគរបាលខេត្តកណ្តាល ដើម្បីបន្តនីតិវិធីតាមច្បាប់រួចហើយ ៕ ដោយ៖ លឹម ហុង
