បច្ចុប្បន្ននេះ បើទោះជាហាក់ស្ងាត់នូវអំពើឆក់ប្លន់មិនកក្រើកដូចពីមុនក៏ដោយ តែករណីនេះនៅតែឆ្មក់កើតមានជារឿយៗ ហេតុនេះ សូមបងប្អូនប្រជាពលរដ្ឋយើងទាំងអស់គ្នា ត្រូវបង្កើនការប្រុងប្រយ័ត្នបំផុត ជាពិសេសខណៈពេលធ្វើដំណើរតាមផ្លូវស្ងាត់តែឯង ។
ជាក់ស្តែង កាលពីពេលថ្មីៗនេះ និស្សិតស្រីម្នាក់រៀននៅសកលវិទ្យាល័យភូមិន្ទកសិកម្មចំការដូង ត្រូវបានចោរប្រុសស្រី១គូបានធ្វើសកម្មភាពឆក់កាបូបស្ពាយពីខ្លួន ខណៈនាងកំពុងជិះនៅតាមផ្លូវស្ងាត់តែឯង (ប្រហែលជាប់របងសាលាចំការដូងតែម្តង) ។
ទោះយ៉ាងណា ករណីឆក់នេះពុំបណ្តាលឲ្យជនរងគ្រោះ ដួលរងរបួសនោះទេ ហើយគេក៏មិនដឹងថា នៅក្នុងកាបូបរបស់នាងមានរបស់របរមានតម្លៃ ឬ លុយកាក់ប៉ុន្មាននោះដែរ ។
នេះបើយោងតាមគណនីហ្វេសប៊ុកឈ្មោះ វុធ លី មេខលា បានបង្ហោះវីដេអូ និងគ្រាន់តែបញ្ជាក់ប្រាប់យ៉ាងដូច្នេះថា៖ «ចោរឆក់កាបូប និស្សិតភូមិន្ទកសិកម្មចំការដូង អាណិតគាត់ណាស់ ជានិស្សិតក្រីក្រ មកពីខេត្ត សូមបងប្អូនជួយស៊ែរផង ហើយបន្តិចទៀតខ្ញុំនឹងជូនគាត់ទៅដាក់ពាក្យបណ្តឹង» ៕ ដោយ៖ លឹម ហុង
