ប្រទេសចិនបានប្រកាសនៅថ្ងៃអង្គារនេះថា មានអ្នកស្លាប់ថ្មីដោយសារវីរុសកូរ៉ូណាចំនួន ៧១នាក់ ដែលវាជាតួលេខស្លាប់តិចបំផុត ក្នុងរយៈពេល ២សប្តាហ៍ចុងក្រោយនេះ ហើយតួលេខអ្នកស្លាប់សរុបកើនដល់ចំនួន ២.៦៦៣។
ក្នុងចំណោមអ្នកស្លាប់ថ្មី ៧១នាក់ មាន ៦៨នាក់ស្លាប់នៅទីខេត្តហូបេ ដែលជាកន្លែងវីរុសមរណៈខាងលើផ្ទុះ។
ជាមួយគ្នានេះដែរ ក៏មានការឆ្លងថ្មីចំនួន ៤០៩ករណីផងដែរ ទូទាំងប្រទេសចិន ហើយតួលេខនៃការឆ្លងសរុបមានចំនួន ៧៧.៦៥៨ករណី។
ប្រធានអង្គការសុខភាពពិភពលោក លោក Tedros Adhanom Ghebreyesus បានថ្លែងថា ការឆ្លងខ្លាំងបំផុតនៅចិន កើនឡើងចន្លោះថ្ងៃទី ២៣ ខែមករា និង ថ្ងៃទី ២ ខែកុម្ភៈ ប៉ុន្តែតួលេខបានធ្លាក់ជាបន្តបន្ទាប់តាំងពីពេលនោះមក។
ទោះយ៉ាងណា លោកក៏បានព្រមានពីការផ្ទុះនៃវីរុសខ្លាំង នៅក្នុងប្រទេសដទៃទៀតដែរ។
សូមបញ្ជាក់ថា ក្នុងរយៈពេល ១សប្តាហ៍ចុងក្រោយនេះ ប្រទេសកូរ៉េខាងត្បូង មានការឆ្លងវីរុស COVID-19 ខ្លាំងគួរឲ្យកត់សម្គាល់ ដោយមានអ្នកឆ្លងជិត ១.០០០នាក់ និងអ្នកស្លាប់ ៨នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
