ភ្នំពេញ៖ ខណៈមានការភ្ញាក់ផ្អើលនិងបារម្ភខ្លាំង ពីជំងឺតាមផ្លូវដង្ហើមដោយ វីសកូរូណា ឬខូវីដ១៩ ដែលបានផ្ទុះឡើងនឹងឆ្លងរាលដាលជុំវិញពិភពលោក និងស្របពេលដែលជំងឺទឹកនោមផ្អែម បាននិងកំពុងកើតមានយ៉ាងខ្លាំង នៅក្នុងព្រះរាជាណាចក្រកម្ពុជា គណៈកម្មាធិការពិគ្រោះយោបល់កិច្ចការស្ត្រី និងកុមារ នៃក្រុមប្រឹក្សារាជធានីភ្នំពេញ អាណត្តិទី ៣បានរៀបចំសិក្ខាសាលាមួយ ដើម្បីអប់រំផ្សព្វផ្សាយថែទាំសុខភាព និងវិធីការពារជំងឺទាំងពីរនេះ ដែលពិធីនេះបានធ្វើឡើង កាលពីព្រឹកថ្ងៃទី២៥ កុម្ភៈឆ្នាំ ២០២០ នៅសាលារាជធានីភ្នំពេញ ក្រោមវត្តមានលោកជួប ខុន សមាជិកក្រុមប្រឹក្សារាជធានីភ្នំពេញ លោកស្រីឃួន គឹមនី ប្រធានគណៈកម្មាធិការពិគ្រោះយោបល់ កិច្ចការស្ត្រី និងកុមារ នៃក្រុមប្រឹក្សារាជធានីភ្នំពេញ និង លោកងី មានហេង ប្រធានមន្ទីរសុខាភិបាលរាជធានីភ្នំពេញ ដោយមានការចូលរួមពីបងប្អូនស្ត្រីប្រមាណជាង៥០០នាក់ មកពីខណ្ឌទាំង១៤ នៃរាជធានីភ្នំពេញ។
លោកជួប ខុន បានមានប្រសាសន៍ថា អង្គសិក្ខាសាលាអប់រំផ្សព្វផ្សាយ ថែទាំស្តីពីវិធីការពារជំងឺទឹកនោមផ្អែម បង្ការជំងឺឆ្លងវីរុសកូរូណាថ្មីឬខូវីដ១៩ របស់គណៈកម្មាធិការពិគ្រោះយោបល់ស្ត្រី និងកុមារ នៃក្រុមប្រឹក្សារាជធានីភ្នំពេញ អាណត្តិទី៣ នេះធ្វើឡើងដើម្បីអបអរសាទរទិវាអន្តរជាតិនារី៨មីនាឆ្នាំ ២០២០ ក្រោមប្រធានបទ មានសន្តិភាពមានការលើកកម្ពស់សមភាពយេនឌ័រ ស្របពាក្យស្លោក “អរគុណសន្តិភាព“។
លោកជួប ខុន បានបន្តថា ការចូលរួមរបស់បងប្អូនស្ត្រី ក្នុងអង្គសិក្ខាសាលានាថ្ងៃនេះ គឺសុទ្ធសឹង ជាធនធានមនុស្សរបស់រាជធានីភ្នំពេញ ដែលសំខាន់នោះ គឺការយល់ដឹងអំពីវិធីបង្ការការពារ និងថែទាំសុខភាព ដើម្បីសុខភាពរឹងមាំចូលរួមអភិវឌ្ឍប្រទេសជាតិមាតុភូមិ ក៏ដូចជារាជធានីភ្នំពេញ ឱ្យកាន់តែរីកចម្រើនជាលំដាប់។ ក្រៅពីនេះលោកក៏បានសម្ដែងការកោតសរសើរ ដោយស្មោះចំពោះគណៈកម្មាធិការពិគ្រោះយោបល់កិច្ចការស្ត្រី និងកុមារ នៃក្រុមប្រឹក្សារាជធានីភ្នំពេញ ដែលបានតាំងចិត្តនិងការខិតខំប្រឹងប្រែង សហការជាមួយមន្ទីរសុខាភិបាលរាជធានី បង្កើតព្រឹត្តិការណ៍អបអរសាទរទិវាអន្តរជាតិ៨មីនា រៀបចំសិក្ខាសាលាអប់រំផ្សព្វផ្សាយ ការថែទាំសុខភាព មានន័យថា យើងមិនត្រឹមតែបានលើកអំពីសិទ្ធិរបស់ស្ត្រីទេ តែយើងបានយល់ដឹងបន្ថែមទៀតនៅការបង្ការ ការពារនិងការថែទាំសុខភាពផ្ទាល់ខ្លួន របស់យើងគ្រប់គ្នាព្រមទាំងសម្រាប់ក្រុមគ្រួសារ និងញាតិមិត្តនិងបងប្អូនប្រជាពលរដ្ឋ យើងនៅក្នុងមូលដ្ឋានថែមទៀត។
លោកស្រី ឃួន គឹមនី ប្រធានគណៈកម្មាធិការពិគ្រោះយោបល់ កិច្ចការស្ត្រីនិងកុមារ បានថ្លែងថា យើងទាំងអស់គ្នាមិនថាស្ត្រីឬបុរសទេ គឺមានមួយចំនួនបាននិងកំពុងកើតជំងឺ និងមានមួយចំនួនទៀត នឹងមានរោគសញ្ញនៃជំងឺទឹកនោមផ្អែមដែរ ដែលយើងចាំបាច់ត្រូវដឹង ពីវិធីការពារនិងថែទាំសុខភាពឲ្យបានប្រសើរ ។ ម្យ៉ាងទៀតនៅពេលថ្មីៗនេះ មានការភ្ញាក់ផ្អើលនិងព្រួយបារម្ភខ្លាំង ពីការចម្លងជំងឺផ្លូវដង្ហើមដោយវីរុសកូរូណាថ្មី ដែលទើបតែផ្ទុះនឹងឆ្លងរាលដាល ជុំវិញពិភពលោកមាន ប្រភពដើមពីទីក្រុងវូហាន ប្រទេសចិន ដែលយើងទាំងអស់គ្នា ត្រូវមានការប្រុងប្រយ័ត្នខ្ពស់ និងទប់ស្កាត់ការឆ្លងនេះ បើទោះបីប្រជាពលរដ្ឋនៃប្រទេសកម្ពុជា យើងពុំទាន់រកឃើញថា មាននរណាម្នាក់ផ្ទុកវីរុសនេះក៏ដោយ។
លោកងី មានហេង ប្រធានមន្ទីរសុខាភិបាលរាជធានីភ្នំពេញ ក្នុងឱកាសនៃការធ្វើបទបង្ហាញនៃជំងឺទាំងពីរនេះ បានលើកឡើងថា កង្វះការធ្វើពលកម្ម ដូចជាមិនមានការហាត់ប្រាណ មិនដើរច្រើន វាជាដើមចម បង្កើតឲ្យមានជំងឺទឹកនោមផ្អែម ជំងឺបេះដូងនិងជំងឺមហារីក ។ លោក បានស្នើឲ្យបងប្អូនប្រជាពលរដ្ឋទាំងអស់ត្រូវបង្ការ ជំងឺទឹកនោមផ្អែមឲ្យបានល្អ ដោយត្រូវហាត់ប្រាណឲ្យបានច្រើន មានរបបអាហារត្រឹមត្រូវ ជាមួយនឹងការរក្សាទម្ងន់កុំលើសច្រើន។
លោកងី មានហេង បានបញ្ជាក់ថា មានប្រជាពលរដ្ឋខ្លះ មានការយល់ច្រឡំខ្លាំងដោយពួកគាត់ យកកន្លែងលក់ថ្នាំពេទ្យឬ គ្លីនិចជាគ្រូពេទ្យព្យាបាលជំងឺរបស់គាត់ ។ នេះជាប្រការគ្រោះថ្នាក់ខ្លាំងណាស់ ដែលបងប្អូនត្រូវចៀសវាង។
លោក ងី មានហេង បានបញ្ជាក់ថា ដើម្បីបង្ការនូវជំងឺនេះ យើងត្រូវលាងដៃជាមួយនឹងសាប៊ូ ជាមួយទឹកស្អាតឬអាល់កុលហ្សែល ឲ្យបានញឹកញាប់ខ្ទប់មាត់និងច្រមុះ ដោយក្រដាស កន្សែង ក្រមា នៅពេលក្អកនិងកណ្ដាស់ ត្រូវចម្អិនសាច់ ឬស៊ុតឲ្យបានឆ្អិនល្អ ជៀសវាងការប៉ះពាល់ជិតស្និទ្ធ ជាមួយអ្នកដែលមានជំងឺគ្រុនក្តៅនិងក្អក ឬផ្តាសាយ ជៀសវាងការប៉ះពាល់ជាមួយសត្វព្រៃរស់ ឬកន្លែងចិញ្ចឹមសត្វដោយគ្មានពាក់សម្ភារការពារខ្លួន៕ដោយ៖កូឡាប
