ភ្នំពេញ៖ សាលារាជធានីភ្នំពេញ បានចេញសេចក្តីប្រកាសព័ត៌មាន ត្រៀមដេញថ្លៃលើការផ្ដល់សេវាប្រមូល និងដឹកជញ្ជូនសំរាម សំណល់រឹង នៅរាជធានីភ្នំពេញ រយៈពេល ៣ថ្ងៃ ចាប់ផ្ដើមពីថ្ងៃទី២៦ ដល់ថ្ងៃទី២៨ ខែកុម្ភៈ ឆ្នាំ២០២០។
បើតាមលិខិតរបស់រដ្ឋបាលរាជធានីភ្នំពេញ នៅថ្ងៃទី២៥ ខែកុម្ភៈ ឆ្នាំ២០២០ បានឲ្យដឹងថា រដ្ឋបាលរាជធានីភ្នំពេញ កំពុងរៀបចំឯកសារ និងនីតិវិធីដេញថ្លៃ ជ្រើសរើសក្រុមហ៊ុនផ្ដល់សេវាប្រមូល និងដឹកជញ្ជូនសំរាម សំណល់វឹង នៅរាជធានីភ្នំពេញ ប្រកបដោយតម្លាភាព និងប្រសិទ្ធភាពតាមលក្ខណៈស្ដង់ដាអន្ដរជាតិ ស្របតាមច្បាប់ និងលិខិតបទដ្ឋានគតិយុត្ដ ជាធរមានរបស់កម្ពុជា។
ក្នុងដំណើរការលទ្ធកម្មនេះ នឹងត្រូវធ្វើឡើងជា ២ដំណាក់កាលផ្សេងគ្នា ក្នុងនោះ ក្រុមហ៊ុនដែលទទួលបានការជ្រើសរើស ក្នុងដំណាក់កាលទី១ និងមានសិទ្ធិចូលរួមដេញថ្លៃបន្ដ ក្នុងដំណាក់កាលទី២ (ដំណាក់កាលលទ្ធកម្ម)។ រាជធានីភ្នំពេញ ត្រូវបានចែកចេញជា៤តំបន់ សម្រាប់ឲ្យក្រុមហ៊ុន ធ្វើការជ្រើសរើសក្នុងការផ្ដល់សេវាប្រមូល និងដឹកជញ្ជូនសំរាម សំណង់រឹងទៅតាមតំបន់នីមួយៗ៕ ដោយ៖កូឡាប
