ភ្នំពេញ៖ នៅថ្ងៃ២៥ ខែកុម្ភៈ ឆ្នាំ២០២០នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងហាផ្ទៃ បានអនុញ្ញាតជូនលោកឧត្តមសេនីយ៍ឯកបំរុង ឡេ គ្វីវឿន អនុរដ្ឋមន្ត្រីក្រសួងនគរបាលនៃសាធារណរដ្ឋសង្គមនិយមវៀតណាម ដឹកនាំគណប្រតិភូចូលជូបសម្ដែងគួរសម និងពិភាក្សាការងារនៅទីស្ដីការក្រសួងមហាផ្ទៃ។
សម្ដេចក្រឡាហោម បានគូសបញ្ជាក់ថាកាលពីពេលថ្មីៗនេះ ក្រសួងទាំងពីរក៏បានចុះហត្ថលេខាលើផែនការសហប្រតិបត្តិការប្រចាំឆ្នាំ២០២០ ដែលសម្ដេចបានដឹកនាំគណៈប្រតិភូបំពេញទស្សនកិច្ច និងចុះហត្ថលេខាផែនការនេះនៅទីក្រុងហូជីមិញ។
សម្ដេចក៏បានជម្រាបជូនដែរថា ភាគីទាំងពីរ កម្ពុជា វៀតណាម ពិសេសក្នុងក្របខ័ណ្ឌក្រសួងមហាផ្ទៃ ក៏មានយន្តការសហប្រតិបត្តិការផ្សេងៗបន្ថែមទៀត ដូចជាកិច្ចសហប្រតិបត្តិការរវាងកងម្លាំនគរបាលជាមួយកងទ័ពប្រជាជនវៀតណាម ក្នុងគោលដៅរួមដើម្បីថែរក្សាសុខសុវត្ថិភាពជូនប្រជាពលរដ្ឋប្រទេសទាំងពីរ ហើយសម្ដេចចាត់ទុកដំណើរទស្សនកិច្ចគណៈប្រតិភូវៀតណាមនាពេលនេះ គឺជាការរួមចំណែកពង្រឹងទំនាក់ទំនង និងកិច្ចសហប្រតិបត្តិការរវាងប្រទេសយើងទាំងពីរ។
ជាការឆ្លើតបលោកឧត្តមសេនីយ៍ឯកបំរុង ឡេ គ្វីវឿន អនុរដ្ឋមន្ត្រីក្រសួងនគរបាលវៀតណាម បានមានប្រសាសន៍កត់សម្គាល់លើការរីកចម្រើននៃទំនាក់ទំនង និងកិច្ចសហប្រតិបត្តិការរវាងកម្លាំងមានសមត្ថកិច្ចនៃប្រទេសទាំងពីរ ជាពិសេសលើកិច្ចសហប្រតិបត្តិការប្រយុទ្ធប្រឆាំងគ្រឿងញៀន ដែលលោកកត់សម្គាល់ឃើញមានវឌ្ឍនភាពយ៉ាងល្អប្រសើរក្នុងការការងារនេះ។
លោកក៏បានជម្រាបជូនសម្ដេចក្រឡាហោមដែរថា នាឱកាសដំណើរទស្សនកិច្ចនេះ លោកនឹងជួបពិភាក្សាទ្វេភាគីជាមួយលោកនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិកម្ពុជា ដែលជាមសភាគីបើកិច្ចប្រជុំស្ដីពីដំណើរការផែនការចំណុចខ្ពស់នៃយុទ្ធនាការឃោសនាវាយលុក និងបង្ក្រាបគ្រឿងញៀនតាមបន្ទាប់ព្រំដែនកម្ពុជា វៀតណាម ។
សម្ដេចក្រឡហោម ស ខេង បានវាយតម្លៃលើកិច្ចសហប្រតិបត្តិការដ៏ល្អរវាងភាគីទាំងពីរ ហើយសម្ដេចបានជំរាបជូនថាក្រសួងមហាផ្ទៃ នឹងខិតខំពង្រឹងកិច្ចសហប្រតិបត្តិការនេះ ឱ្យកាន់តែល្អប្រសើរថែមទៀត។ សម្ដេចក៏បានបញ្ជាក់អំពីការអនុវត្តយុទ្ធនាការបង្ក្រាបគ្រឿងញៀន ដែលបានដំណើរការយៈពេល២ឆ្នាំមកហើយ ដោយបានបង្ក្រាបរឹបអូសគ្រឿងញៀនជាច្រើន រួមទាំងចាប់បញ្ជូនអ្នកពាក់ព័ន្ធទៅផ្ដន្ទាទោសជាច្រើននាក់។
សម្ដេចបានមានប្រសាសន៍ថាកម្ពុជា នៅតែខិតខំបន្តយុទ្ធនាការបង្ក្រាបគ្រឿងញៀនខុសច្បាប់នេះដើម្បីធ្វើយ៉ាងណារក្សាបានសុខសុវត្ថិភាពជូនដល់ប្រជាពលរដ្ឋ៕ ដោយ៖កូឡាប