កំពង់ធំ៖ ផលិតផលក្លែងក្លាយ និងខូចគុណភាព ចំនួន ២២មុខ ស្មេីនិងទម្ងន់ប្រមាណជាង ៨តោន ត្រូវបានកិនកម្ទេចចោលនៅព្រឹកថ្ងៃទី២៥ ខែកុម្ភៈ ឆ្នាំ២០២០នេះ ស្ថិតនៅក្នុងភូមិវល្លិយាវ ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ។
ពិធីកិនកម្ទេចចោលនូវផលិតផលក្លែងក្លាយ និងខូចគុណភាព ចំនួន ២២មុខ ស្មេីនិងទម្ងន់ប្រមាណជាង ៨តោន នេះ ប្រព្រឹត្តទៅ ក្រោមអធិបតីភាព លោកអង្គវង្ស វឌ្ឍានា រដ្ឋមន្ត្រីក្រសួងយុត្តិធម៌ និង អញ្ជើញចូលរួមពី លោកឧត្ដមសេនីយ៍ មៀច សុផាន់ណា រដ្ឋលេខាធិការក្រសួងមហាផ្ទៃ និងជា ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ លោកសុខ លូ អភិបាលនៃគណៈអភិបាលខេត្តកំពង់ធំ ។
លោកនាយឧត្តមសេនីយ៍ មៀច សុផាន់ណា បានថ្លែងបញ្ជាក់ថា សមត្ថកិច្ចចម្រុះនៃគណៈកម្មាធិការប្រយុទ្ធប្រឆាំងផលិតផលក្លែងក្លាយ បានសហការជាមួយអាជ្ញាធរខេត្ត កម្លាំងសមត្ថកិច្ចនានា និងព្រះរាជអាជ្ញា ចុះបង្ក្រាផលិតផលក្លែងក្លាយ ក្នុងសហគ្រាស ០៤កន្លែង នៅក្នុងខេត្តកំពង់ធំ ហេីយ សមត្ថកិច្ចចម្រុះ បានរកឃើញ ផលិតផលខូចគុណភាព និងហួសកាលបរិច្ឆេទ ព្រមទាំងបានរឹបអូសរក្សាទុកបានចំនួន២២មុខ ប្រមាណជាង៨តោន ដែលផលិតផលទាំងនេះត្រូវកិនកម្ទេចចោលតាមការបង្គាប់របស់តុលាការនៅពេលនេះ រួមមាន ផលិតផលទឹកក្រូចចម្រុះម៉ាកសញ្ញា ផលិតផលតែបៃតង ស្រាបៀរ ផលិតផលទឹកសុទ្ធ មេទឹកក្រូច ស្ករអំពៅ, មេក្លិនក្រូច ប្រភេទA3923 និងល័ក្ត Apple Green ល័ក្តSunse ។
បន្ទាប់មក លោក អង្គវង្ស វឌ្ឍានា បានលើកឡើងថា រៀងរាល់ថ្ងៃ គណៈកម្មាធិការប្រយុទ្ធប្រឆាំងផលិតផលក្លែងក្លាយ បានខិតខំយ៉ាងស្រស្រាក់ស្រាំ និងយកចិត្តទុកដាក់ ក្នុងការអនុវត្តច្បាប់ និងអនុវត្តតាមគោលនយោបាយ របស់រាជរដ្ឋាភិបាល ក្នុងការពង្រឹងការស្រាវជ្រាវស៊ើបអង្កេតដោយសហការជាមួយ កម្លាំងជំនាញ និងស្ថាប័នពាក់ព័ន្ធ ដើម្បីប្រមូលផ្តុំព័ត៌មាន ព្រមទាំងកំណត់មុខសញ្ញា និងទីតាំង ក្នុងការបង្ក្រាប ដោយមិនបណ្តែតបណ្តោយ ទុកឲ្យមុខសញ្ញា ជាឈ្មួញមានឱការធ្វើសកម្មភាពរំលោភបំពាននិងល្មេីសច្បាប់ ។
លោករដ្ឋមន្ដ្រី បានផ្តាំផ្ញើទៅដល់ឈ្មួញទុច្ចរឹតទាំងឡាយ ត្រូវតែបញ្ឍប់ជាបន្ទាន់ ចំពោះសកម្មភាពល្មើសច្បាប់ ដែលបង្កហានិភ័យខ្ពស់ប៉ះពាល់សុខភាព និងសុខមាលភាពរបស់ប្រជាពលរដ្ឋ សុវត្ថិភាពសង្គម ៕ដោយ៖បញ្ញាស័ក្តិ
