សំណង់ខុនដូមួយដែលកំពុងសាងសង់នៅ Mont Kiara (ម៉ាឡេស៊ី) បានជួបឧបទ្ទវហេតុមួយកាលពីរសៀលថ្ងៃទី ២៤ ខែកុម្ភៈ ឆ្នាំ២០២០ បន្ទាប់ពីមានសេចក្តីរាយការណ៍ថា ការដាក់រន្ទាទ្រទ្រង់ការសាងសង់បានដួលរលំ ។
យោងតាមការបង្ហោះលើបណ្តាញសង្គមហ្វេសប៊ុកមួយ នោះរូបភាពនៃឧប្បត្តិហេតុនេះបានបង្ហាញថា ផ្នែកខ្លះនៃរន្ទាទ្រទ្រង់បានដួលរលំក្នុងអំឡុងពេលការសាងសង់កំពុងបន្ត។ បំណែកដែក និងបំណែកឈើដែលបាក់បែកត្រូវបានគេឃើញដួលរលំ ខណៈដែលកម្មករបរទេសដែលរងរបួសមួយចំនួនកំពុងដេកដួលនៅលើដី។
គេនៅមិនទាន់ដឹងច្បាស់ពីមូលហេតុដែលបណ្តាលឱ្យរន្ទាទាំងនោះដួលរលំបែបនោះទេ ប៉ុន្តែជាសំណាងល្អ ដែលគ្មាននរណាម្នាក់បានស្លាប់នៅក្នុងហេតុការណ៍ដ៏រន្ធត់នេះ។ ទន្ទឹមនឹងនេះអ្នកអភិវឌ្ឍន៍អចលនទ្រព្យនៅពីក្រោយការសាងសង់អគារខុនដូ បានបញ្ជាក់ពីហេតុការណ៍នេះ និងបានចេញសេចក្តីថ្លែងការណ៍មួយនៅលើទំព័រហ្វេសប៊ុករបស់ពួកគេផងដែរ។
សេចក្តីថ្លែងការណ៍បាននិយាយថា ឧប្បត្តិហេតុតូចមួយនេះបានកើតឡើងនៅការដ្ឋានកាលពីម្សិលមិញ ហើយកម្មករទាំងអស់មានសុវត្ថិភាព។ ពួកគេបាននិយាយថា ផ្នែកតូចមួយនៃការរន្ទាទាំងនោះ គឺជាដើមចមដែលនាំកើតមានឧប្បត្តិហេតុឡើង។
អាជ្ញាធរពាក់ព័ន្ធបាននិយាយថា អ្នកម៉ៅការបានចាត់វិធានការជាបន្ទាន់ ដើម្បីការពារតំបន់នោះ និងធ្វើការត្រួតពិនិត្យយ៉ាងលំអិត ទៅលើរាល់រចនាសម្ព័ន្ធ និងរន្ទា រួមគ្នាជាមួយអ្នកពិគ្រោះយោបល់ជំនាញផងដែរ ៕
ប្រែសម្រួលដោយ៖ លឹម ហុង (ប្រភព៖ worldofbuzz)
