ភ្នំពេញ ៖ នារីវ័យក្មេងម្នាក់សន្លប់ស្តូកស្តឹងនៅក្នុងព្រៃ បន្ទាប់ពីរងនូវការចាប់រំលោភបូកពីយុវជន២នាក់។ បន្ទាប់ធ្វើសកម្មភាពរំលោភ ជនសង្ស័យម្នាក់បានរត់គេចខ្លួនបាត់ ចំណែកជនសង្ស័យម្នាក់ទៀត ក៏ត្រៀមរត់គេចដែរ តែត្រូវបានសមត្ថកិច្ចឃាត់ខ្លួនបាន កាលពីវេលារំលងអធ្រាត្រ ឈានចូលថ្ងៃពុធទី ២៦ ខែកុម្ភៈ ឆ្នាំ ២០២០នេះ នៅចំណុចមាត់ស្រះ ជិតរង្វង់មូលមច្ឆា ក្នុងសង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ ។
នគរបាលមូលដ្ឋាន បានឲ្យដឹងថា ជនសង្ស័យដែលសមត្ថកិច្ចឃាត់ខ្លួនបាន ឈ្មោះ សុខ ពុធ អាយុ២៧ឆ្នាំ មុខរបរនិងស្នាក់នៅមិនពិតប្រាកដ ទីលំនៅងស្រុកពាមជរ ខេត្តព្រៃវែង និងម្នាក់ទៀតរត់ខ្លួនគេចបាត់ មិនស្គាល់អត្តសញ្ញាណ មុខរបរលក់ខ្ចៅស្ងោរនិងអំពៅសាង បានរត់ចោលរទេះនិងម៉ូតូ ។ រីឯនារីរងគ្រោះឈ្មោះ ស.រ.ហ អាយុប្រហែល១៨ឆ្នាំ ។
បុគ្គលិកសន្តិសុខ ដែលបានឃើញហេតុការណ៍ បានឲ្យដឹងថា មុនពេលកើតហេតុ គាត់ឃើញបុរស២នាក់ និងនារីម្នាក់អង្គុយសាសងគ្នា។ លុះបន្តិចក្រោយមក គាត់ឃើញបុរសម្នាក់បានធ្វើសកម្មភាពរំលោភនារីរងគ្រោះ ចំណែកម្នាក់ទៀតឈរមើលផ្លូវ ។ ក្រោយជនសង្ស័យទី១ រំលោភបានសម្រេចហើយ ជនសង្ស័យទី២ ក៏អូសនារីរងគ្រោះទៅរំលោភកន្លែងមួយទៀត ហើយជនសង្ស័យទី១ ជាអ្នកឈរមើលផ្លូវវិញម្ដង ។ ពេលនោះគាត់ ក៏ដើរមកសួរនាំ ស្រាប់តែជនសង្ស័យទី២ ដែលកំពុងតែរំលោភនារីរងគ្រោះ បានរត់គេចខ្លួន ចូលព្រៃបាត់ រីឯជនសង្ស័យទី១ ជាអ្នកមើលផ្លូវនោះ ក៏ស្ទុះរត់ដែរ តែត្រូវគាត់ចាប់បាន រួចប្រគល់ឲ្យសមត្ថកិច្ច៕ដោយ៖កូឡាប