ភំ្នពេញ ៖ អគ្គស្នងការដ្ឋាននគរបាលជាតិ បានប្រកាសព័ត៌មានថា ប៉ុស្ដិ៍នគរបាលរដ្ឋបាលទំនប់ទឹក បានចុះសហការជាមួយនាយកដ្ឋានប្រឆាំងបទល្មើសបច្ចេកវិទ្យា បានធ្វើឃាត់ជនបរទេស១នាក់ ពីបទ ឆបោក តាមប្រព័ន្ធបណ្ដាញសង្គម Instagram នៅចំណុចផ្ទះជួលលេខ ១៣Eo ផ្លូវ១៨៥ ក្រុម១៧ ភូមិ២ សង្កាត់ ទំនប់ទឹក ខណ្ឌបឹងកេងកង រាជធានីភ្នំពេញ កាលពីថ្ងៃទី២៥ ខែកុម្ភៈ ឆ្នាំ២០២០ វេលាម៉ោង ១៦ និង ៣០នាទី ។
នគរបាលរដ្ឋបាលទំនប់ទឹក បានឲ្យដឹងថា ជនសង្ស័យឈ្មោះ Hama Dou Abdou ភេទប្រុស អាយុ៣៤ឆ្នាំ ជនជាតិនីហ្សេរីយ៉ា ស្នាក់នៅផ្ទះជួលលេខ១៣Eo ផ្លូវ១៨៥ ក្រុម១៧ ភូមិ២ សង្កាត់ទំនប់ទឹក ខណ្ឌបឹងកេងកង រាជធានីភ្នំពេញ មុខរបរ កីឡាករបាល់ទាត់។
នគរបាលប៉ុស្តិ៍ បានរៀបរាប់តាមដំណើររឿងថា កាលពីថ្ងៃទី២៥ ខែកុម្ភៈ ឆ្នាំ២០២០ វេលាម៉ោង១៦និង៣០នាទី កម្លាំងប៉ុស្ដិ៍នគរបាលរដ្ឋបាលទំនប់ទឹក បានសហការជាមួយ កម្លាំងនាយកដ្ឋានប្រឆាំងបទល្មើសបច្ចេកវិទ្យា បានធ្វើការឃាត់ជនសង្ស័យម្នាក់ ឈ្មោះ Hama Dou Abdou ភេទប្រុស អាយុ៣៤ឆ្នាំ ជនជាតិ នីហ្សេរីយ៉ា ស្នាក់នៅផ្ទះជួលលេខ១៣Eo ផ្លូវ១៨៥ ក្រុម១៧ ភូមិ២ សង្កាត់ទំនប់ទឹក ខណ្ឌបឹងកេងកង រាជធានីភ្នំពេញ ពីបទ ឆបោក (តាម ប្រព័ន្ធបណ្ដាញសង្គម Instagram) យោងទៅតាមពាក្យបណ្ដឹងរបស់ជនរងគ្រោះឈ្មោះ សៀង ភុជគាវ និងឈ្មោះ មុន្នី ដារីកា កាលពីអំឡុងខែវិច្ឆិកា ឆ្នាំ២០១៩ ។ ជនសង្ស័យបានផ្ញើសារទៅកាន់ជនរងគ្រោះ តាមរយៈប្រព័ន្ធបណ្ដាញសង្គម (Instagram) ដោយសុំរាប់អានជាមួយជនរងគ្រោះ ក្រោយមកជនសង្ស័យបានប្រើល្បិចផ្ញើសម្លៀកបំពាក់ ទូរស័ព្ទដៃ និងប្រាក់មួយចំនួន ដើម្បីយកទៅបរិច្ចាគឲ្យមនុស្សចាស់ និងក្មេងកំព្រា បន្ទាប់មកជនសង្ស័យក៏បានបន្លំធ្វើជាក្រុមហ៊ុនផ្ញើអីវ៉ាន់ រួចទូរស័ព្ទប្រាប់ជនរងគ្រោះថា មានអីវ៉ាន់ផ្ញើពីក្រៅប្រទេស ហើយតម្រូវឲ្យជនរងគ្រោះផ្ញើប្រាក់តាមវីងជាបន្ដបន្ទាប់ រហូតដល់ទៅ៧.៣០០ដុល្លារអាមេរិក ទើបជនរងគ្រោះដឹងថា ចាញ់បោកគេ ទើបបានទៅដាក់ពាក្យបណ្ដឹង រហូតដល់ថ្ងៃទី២៥ ខែកុម្ភៈ ឆ្នាំ២០២០ វេលាម៉ោង១៦និង៣០នាទី ទើបកម្លាំងនាយកដ្ឋានប្រឆាំងបទល្មើសបច្ចេកវិទ្យា សហការជាមួយកម្លាំង ប៉ុស្ដិ៍នគរបាលរដ្ឋបាលទំនប់ទឹក ធ្វើការស្រាវជ្រាវរហូតឈានដល់ធ្វើការឃាត់បាន ជនសង្ស័យខាងលើ នៅចំណុចផ្ទះជួលរបស់ជនសង្ស័យតែម្ដង។
បច្ចុប្បន្នជនសង្ស័យ ត្រូវបានបញ្ជូនទៅកាន់នាយកដ្ឋានប្រឆាំងបទល្មើសបច្ចេកវិទ្យា ក្រសួងមហាផ្ទៃ ដើម្បីចាត់ការបន្ដ៕ដោយ៖កូឡាប