ភ្នំពេញ៖ រាជរដ្ឋាភិបាល ដែលមានក្រសួងសេដ្ឋកិច្ចនិងហិរញ្ញវត្ថុ ជាសេនាធិការ បានចេញសេចក្តីណែនាំអនុវត្ត ស្តីពី វិធានការសម្រួលផ្នែកពន្ធដារ ដើម្បីកាត់បន្ថយផលប៉ះពាល់លើវិស័យសណ្ឋាគារ និងផ្ទះសំណាក់ នៅខេត្តសៀមរាប និងវិស័យអចលនទ្រព្យ ការលើកលែងពន្ធប្រថាប់ត្រាលើផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ លំនៅដ្ឋានគ្រប់ប្រភេទ តម្លៃស្នើឬទាបជាង៧ម៉ឺនដុល្លារ។
តាមការសម្រេចរបស់រដ្ឋាភិបាល ក្នុងគោលបំណងកាត់បន្ថយផលប៉ះពាល់ លើវិស័យសណ្ឋាគារនិងផ្ទះសំណាក់ និងវិស័យអចនទ្រព្យ ក្រសួងសេដ្ឋកិច្ចនិងហិរញ្ញវត្ថុ សូមដាក់ចេញសេចក្តីណែនាំ អនុវត្តវិធានការផ្នែកពន្ធដារមួយចំនួន។ អ្នកជាប់ពន្ធដែលកំពុងប្រកបអាជីវកម្ម ក្នុងវិស័យសណ្ឋាគារ និងផ្ទះសំណាក់ ដែលមានទីតាំងក្នុងខេត្តសៀមរាប ត្រូវទទួលបានការបន្ធូរបន្ថយកាតព្វកិច្ចពន្ធដារ គឺលើកលែងការបង់ពន្ធអាករ ប្រចាំខែគ្រប់ប្រភេទ សម្រាប់រយៈពេលប្រពន្ធពីខែកុម្ភៈ ដល់ខែឧសភា ឆ្នាំ 2020។ រួចផុតពីការធ្វើសវនកម្មពេញលេញ សម្រាប់ការិយបរិច្ឆេទឆ្នាំ 2020 សម្រាប់វិស័យសណ្ឋាគារ និងផ្ទះសំណាក់ក្នុងខេត្តសៀមរាប។ អ្នកជាប់ពន្ធដែលទទួលបានការលើកលែង ការបង់ពន្ធអាករប្រចាំខែដូចមានចែង ក្នុងចំណុចកខាងលើនេះ ត្រូវដាក់លិខិតប្រកាសប្រចាំខែ និងប្រើប្រាស់ប្រព័ន្ធអនឡាញសម្រាប់គ្រប់គ្រងអាករ លើតម្លៃបន្ថែមមជាធម្មតា ព្រមទាំងត្រូវដាក់លិខិតប្រកាសនិងបង់ប្រាក់ពន្ធលើប្រាក់ចំណូលប្រចាំឆ្នាំ 2019 ជាធម្មតា។
បើតាមក្រសួងសេដ្ឋកិច្ចនិងហិរញ្ញវត្ថុ ការលើកលែងពន្ធប្រថាប់ត្រា លើផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ លំនៅដ្ឋានគ្រប់ប្រភេទ គឺរាល់ការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ ដែលមានតម្លៃស្មើឬទាបជាង 7 ម៉ឺនដុល្លារអាមេរិក ត្រូវទទួលបានការលើកលែងពន្ធប្រថាប់ត្រា ចំពោះលំនៅដ្ឋានដែលបំពេញលក្ខខណ្ឌ ៕ដោយ៖កូឡាប