បាត់ដំបង៖ សម្ដេចក្រឡាហោម បានណែនាំកងកម្លាំងអនុវត្តច្បាប់ចរាចរណ៍ទូទាំងខេត្ត ពិសេសនគរបាលចរាចរណ៍ ត្រូវបង្កើនការរឹតបន្តឹងច្បាប់ និងផាកពិន័យជាដាច់ខាតជាងបណ្ដាឆ្នាំណាៗទាំងអស់ គឺចាប់ពីឆ្នាំ២០២០នេះតទៅ សម្ដេចបានសង្កត់ធ្ងន់ថា វិធានការអប់រំគឺជាកិច្ចការអាទិភាពលំដាប់ក្រោយហើយ ដោយសម្ដេចនឹងកំណត់យកការផាកពិន័យជាវិធានការជួរមុខ ទោះបីពលរដ្ឋមានការខឹងឬអន់ចិត្ត ប៉ុន្តែនេះគឺដើម្បីសុវត្ថិភាព និងជីវិតរបស់ពួកគាត់។
នៅព្រឹកថ្ងៃពុធ ទី២៦ ខែកុម្ភៈ ឆ្នាំ២០២០នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងារថ្នាក់ជាតិចុះជួយខេត្តបាត់ដំបង បានអញ្ជើញជាអធិបតី ពិធីបិទសន្និបាតបូកសរុបលទ្ធផលការងារឆ្នាំ២០១៩ និងលើកទិសដៅការងារឆ្នាំ២០២០ របស់រដ្ឋបាលខេត្តបាត់ដំបង និងក្រុមការងាររាជរដ្ឋាភិបាលចុះមូលដ្ឋានខេត្តបាត់ដំបង។
ចំពោះបញ្ហាចរាចរណ៍វិញ សម្ដេចក្រឡាហោម ស ខេង ក៏បានរំលឹកជាថ្មីទៀតអំពីកំណើន គ្រោះថ្នាក់ចរាចរណ៍កាលពីឆ្នាំ២០១៩ និងវិធានការសម្រាប់អនុវត្តឆ្នាំ២០២០ ដើម្បីកាត់បន្ថយចំនួនគ្រោះថ្នាក់ អ្នកស្លាប់ និងអ្នករងរបួស ដោយសម្ដេចបានណែនាំកងកម្លាំងអនុវត្តច្បាប់ចរាចរណ៍ទូទាំងខេត្ត ពិសេសនគរបាលចរាចរណ៍ ត្រូវបង្កើនការរឹតបន្តឹងច្បាប់ និងផាកពិន័យជាដាច់ខាតជាងបណ្ដាឆ្នាំណាៗទាំងអស់ ពោលគឺចាប់ពីឆ្នាំនេះតទៅ សម្ដេចបានសង្កត់ធ្ងន់ថា វិធានការអប់រំគឺជាកិច្ចការអាទិភាពលំដាប់ក្រោយហើយ ដោយសម្ដេចនឹងកំណត់យកការផាកពិន័យជាវិធានការជួរមុខ ទោះបីពលរដ្ឋមានការខឹងឬអន់ចិត្ត ប៉ុន្តែនេះគឺដើម្បីសុវត្ថិភាព និងជីវិតរបស់ពួកគាត់។
ជាមួយគ្នានេះ សម្ដេចក្រឡាហោម ស ខេង ក៏បានថ្លែងលើកទឹកចិត្តមន្ត្រីនគរបាលចរាចរណ៍ទាំងអស់ ត្រូវចូលរួមគាំទ្រវិធានការនេះជាចាំបាច់បំផុត ដោយត្រូវផាកពិន័យគ្រប់អ្នកល្មើសច្បាប់ចរាចរណ៍ទាំងអស់ មិនថាអ្នកនោះជាប្រពលរដ្ឋសាមញ្ញ ឬជាថ្នាក់ដឹកនាំជាន់ខ្ពស់ ជាតំណាងរាស្ត្រ ជាមន្ត្រីពាក់សក្ដិ ឬពាក់ផ្កាយធំ ឬជាអ្នកមានអំណាចកម្រិតណាក៏ដោយ គឺត្រូវតែគោរពច្បាប់ទាំងអស់គ្នា និងត្រូវទទួលការផាកពិន័យ នៅពេលប្រព្រឹត្តបទល្មើសដោយគ្មានការលើកលែង បើមិនធ្វើដូច្នេះទេ សម្ដេចបានអះអាងថាយើងនឹងមិនអាចដោះស្រាយបញ្ហាចគ្រោះថ្នាក់រាចរណ៍ដ៏គួរឲ្យរន្ធត់ និងព្រួយបារម្ភជារៀងរាល់ថ្ងៃនេះបានឡើយ៕ដោយ៖កូឡាប