កណ្ដាល: រថយន្តដឹកទឹកដាច់ហ្រ្វាំង ក្រឡាប់សង្កត់លើម៉ូតូកង់បី បណ្តាលឲ្យ ប្ដីនិងកូនស្លាប់ ចំណែកប្រពន្ធមានផ្ទៃពោះ រងរបួសធ្ងន់ ដែលករណីកើតឡើងនៅវេលាម៉ោង ៦និង៥០នាទីព្រឹកថ្ងៃទី២៦ ខែកុម្ភ: ឆ្នាំ២០២០ ស្ថិតត្រង់ចំណុចស្តុបព្រែកហូរ ផ្លូវជាតិលេខ២ កែងផ្លូវលេខ១១៥ ភូមិតាក្តុលត្បូង សង្កាត់ព្រែកហូរ ក្រុងតាខ្មៅ ខេត្តកណ្ដាល។
ករណីគ្រោះថ្នាក់ចរាចរណ៍បង្កឡើងដោយរថយន្តបង្កម៉ាក NISSAN DIESEL ដឹកស៊ីទែនទឹក ពណ៌ស គ្មានផ្លាកលេខ អ្នកបើកបរ មិនស្គាល់អត្តសញ្ញាណ ព្រោះ រត់គេចបាត់ពីកន្លែងកើតហេតុ។ ចំណែកជនរងគ្រោះឈ្មោះ ជា សុផាត ភេទប្រុស អាយុ ៣៨ឆ្នាំ ស្លាប់ ជាអ្នកបើកម៉ូតូកង់បី មានអ្នករួមដំណើរចំនួន ៣នាក់៖ ១ ឈ្មោះ ស៊ី នាង ភេទស្រី អាយុ ៣៨ឆ្នាំ មានផ្ទៃពោះ រងរបួសធ្ងន់ ត្រូវជាប្រពន្ធ ។ ២ ឈ្មោះ ហៃ យូប៊ិន ភេទស្រី អាយុ ៣ឆ្នាំ ស្លាប់ ត្រូវជាកូន។ ៣ ឈ្មោះ ហៃ យូហួរ ភេទប្រុស អាយុ ៧ឆ្នាំ រងរបួសស្រាល។
នគរបាលក្រុងតាខ្មៅ បានឲ្យដឹងថា មុនពេលកើតហេតុ រថយន្តបង្ក បើកក្នុងទិសដៅពីលិចមកកើត រួចបត់ស្តាំទៅទិសខាងត្បូង ត្រង់ចំណុចផ្លូវកោង និងល្បឿនលឿន បណ្ដាលឲ្យក្រឡាប់សង្កត់ពីលើម៉ូតូកង់បី ពណ៌ស ពាក់ផ្លាកលេខ កណ្តាល 1AF-8493 កំពុងឈប់ស្តុបក្នុងទិសដៅ ពីត្បូងទៅជើង និងសង្កត់ពីលើម៉ូតូចំនួន ២គ្រឿងទៀត បង្កឲ្យអ្នកបើកបររងរបួសស្រាល ព្រមទាំងក្រឡាប់សង្កត់ពីលើសំយ៉ាបផ្ទះពលរដ្ឋរងការខូចខាត។
នគរបាលក្រុងតាខ្មៅ បានឲ្យដឹងថា ករណីគ្រោះថ្នាក់ចរាចរណ៍នេះ ដោយមូលហេតុ អ្នកបើកបររថយន្តលឿន ត្រង់ចំណុចផ្លូវកោង និងដាច់ហ្រ្វាំង៕ ដោយ៖កូឡាប