ខេត្តព្រះសីហនុ៖ អគ្គនាយកក្រុមហ៊ុន ជី.ធី.វី.ស៊ី, ស្ពីដបូត កម្ពុជា G.T.V.C, SPEED BOAT CAMBODIA) និងម៉ាហ្វីយ៉ា រីស្សត (Mafya’s Resort) គឺ លោកឧកញ៉ា ទៀ វិចិត្រ បានបន្តនាំយកសត្វអណ្តើកធំ ១ក្បាលទៀត យកទៅលែងឲ្យរស់នៅក្នុងព្រៃ និងព្រែកធម្មជាតិវិញ បន្ទាប់ពីប្រជាពលរដ្ឋ បាននាំយកមកប្រគល់ជូនរូបលោក នៅដើមសប្តាហ៍ ចុងខែកុម្ភៈ ឆ្នាំ២០២០នេះ។
ទាក់ទិនបញ្ហានេះ លោកឧកញ៉ា ទៀ វិចិត្រ ដែលជាប្រធានក្រុមមនុស្សធម៌អូរ៣ (O3) ផងនោះ មានប្រសាសន៍ថា សត្វអណ្តើកមួយក្បាល ដែលបាននាំយកទៅលែងនាឱកាសនេះ មានទម្ងន់ ១០,២គីឡូក្រាម ហើយត្រូវបានប្រជាពលរដ្ឋនាំយកមកប្រគល់ជូនរូបលោក ក្នុងន័យចូលរួមចំណែកក្នុងផែនការអភិរក្សសត្វកម្រ ដោយត្រូវរូបលោក បាននាំយកទៅលែងឲ្យរស់នៅក្នុងព្រៃ និងព្រែកធម្មជាតិវិញនៅពេលនេះ។
ចំណែក ប្រជាពលរដ្ឋ ដែលបាននាំយកសត្វអណ្តើកធំមួយក្បាល មកប្រគល់ជូន លោកឧកញ៉ា ទៀ វិចិត្រ ក៏បានឲ្យដឹងដែរថា ការនាំយកសត្វអណ្តើកមួយក្បាលមកប្រគល់ជូន លោកឧកញ៉ា ទៀ វិចិត្រ ក៏ព្រោះតែកន្លងមករូបគាត់ បានឃើញសកម្មភាព របស់ លោកឧកញ៉ា ទៀ វិចិត្រ ស្រឡាញ់ចូលចិត្តសត្វព្រៃ និងឃើញនាំយកសត្វព្រៃជាច្រើនប្រភេទយកទៅលែងក្នុងព្រៃ ក្នុងបឹង អូរ និងក្នុងទឹកសមុទ្រជាបន្តបន្ទាប់ ជាពិសេសប្រភេទសត្វព្រៃកម្រ រួមមាន៖ សត្វល្មិច ឬអណ្តើកសមុទ្រជាដើម។
ត្រង់ចំណុចនេះ លោកឧកញ៉ា ទៀ វិចិត្រ បានថ្លែងអំណរគុណដល់ប្រជាពលរដ្ឋទាំងអស់ ដែលជាបន្តបន្ទាប់មកនេះ បាននាំយកសត្វអណ្តើក និងសត្វព្រៃជាច្រើនប្រភេទ មកប្រគល់ជូនរូបលោក ដើម្បីនាំយកទៅលែងឲ្យរស់នៅតាមធម្មជាតិវិញ។
ទន្ទឹមគ្នានេះ លោកឧកញ៉ា ទៀ វិចិត្រ ក៏បានអំពាវនាវដល់មនុស្សគ្រប់ស្រទាប់វណ្ណៈ, មន្ត្រីរាជការ និងប្រជាពលរដ្ឋរស់នៅតាមសហគមន៍នានា ឲ្យចូលរួមថែរក្សាការពារសត្វព្រៃ ឬសត្វកម្រគ្រប់ប្រភេទតាមរយៈ៖ កុំប្រមាញ់ កុំសម្លាប់ និងកុំទទួលទានចំណីអាហារ ចម្អិនពីសាច់សត្វព្រៃ ឲ្យបានទាំងអស់គ្នា ប្រយោជន៍រួមគ្នាអភិរក្សការពារសត្វព្រៃកម្រ ឲ្យសម្បូរបែបនៅកម្ពុជា៕ ដោយ៖ ដែន សីមា
