ភ្នំពេញ៖អធិការដ្ឋាននគរបាលខណ្ឌកំបូល សូមប្រកាសរកសាច់ញាតិ បងប្អូនដែលស្គាល់សាកសពបុរសនេះ ដើម្បីមកទទួលយកសាកសពទៅធ្វើបុណ្យតាមប្រពៃណី។ បុរសនេះត្រូវឃាតករចាក់សម្លាប់ចំនួន 17 កន្លែង ហើយរហូតមកដល់ថ្ងៃទី 26 ខែកុម្ភៈនេះមិនទាន់ស្រាវជ្រាវរកឃើញឃាតករ ហើយក៏មិនទាន់ដឹងថា ជនរងគ្រោះមានឈ្មោះអ្វីហើយនឹងអាសយដ្ឋាននៅទីណាដែរ។
អធិការដ្ឋាននគរបាលខណ្ឌកំបូលបានឲ្យដឹងថា កាលពីថ្ងៃ២៥ ខែកុម្ភៈ ឆ្នាំ២០២០ វេលាម៉ោង ៨និង៣០នាទីព្រឹក សមត្ថកិច្ចប៉ុស្តិ៍នគរបាលរដ្ឋបាលកំបូល បានទទួលព័ត៌មានពីប្រជាពលរដ្ឋ ដែលទៅដកក្រអៅឈូកនៅក្នុងបឹង មានទឹករាក់ ស្ថិតក្នុងភូមិទួលតាឡាត់ សង្កាត់កំបូល ខណ្ឌកំបូល រាជធានីភ្នំពេញ ក៏ប្រទះឃើញសាកសព នៅក្នុងបឹងឈូកនោះ ភ្លាមនោះ ផ្នែកជំនាញខណ្ឌ ចុះដល់ចំណុចកើតហេតុ បានសហការណ៍ជាមួយនគរបាលបច្ចេកទេស វិទ្យាសាស្ត្រ រាជធានីភ្នំពេញ, តាមការពិនិត្យ និងបញ្ជាក់របស់លោក ឧកញ៉ាវេជ្ជបណ្ឌិត នង សុវណ្ណរ័ត្ន ថាបុរសខាងលើស្លាប់ ដោយសារការចាក់ចំដើមទ្រូង និងដងខ្លួន បង្កដោយជនល្មើសមិនដឹងចំនួន និងមិនស្គាល់អត្តសញ្ញាណ។
អត្តសញ្ញាណសាកសព ភេទប្រុស អាយុប្រហែល ២៨ឆ្នាំ ស្លៀកខោខូវប៊យជើងវែង ពណ៌ខៀវ រហែកក្បាលជង្គង់ទាំងសងខាង ពាក់អាវដៃវែង ពណ៌ខ្មៅឆ្នូតស ជនល្មើសយកខោខូវប៊យចងជើងទាំងពីរ ។ ស្លាកស្នាម ៖ ស្នាមចាក់ចំដើមទ្រូង ដងខ្លួន និងដៃចំនួន ១៧ កន្លែង៕ ដោយ៖កូឡាប