ខេត្តព្រះសីហនុ៖ មន្ត្រីនគរបាលអន្តោប្រវេសន៍ ប្រចាំច្រកទ្វារអន្តរជាតិកំពង់ផែក្រុងព្រះសីហនុ បានឲ្យដឹងថា នៅម៉ោងជាង៦ព្រឹកថ្ងៃទី២៧ ខែកុម្ភៈ ឆ្នាំ២០២០នេះ មាននាវាទេសចរណ៍បរទេសមួយគ្រឿងទៀត បានចូលចតកំពង់ផែក្រុងព្រះសីហនុ។
នាវាទេសចរណ៍នេះ បានដឹកភ្ញៀវទេសចរចម្រុះជាតិសាសន៍ចំនួន ១៣៣នាក់ ចូលមកទស្សនាកម្សាន្ត ខេត្តព្រះសីហនុ ប្រទេសកម្ពុជា រយៈពេលពេញមួយថ្ងៃ។
មន្ត្រីនគរបាលច្រកទ្វារអន្តរជាតិកំពង់ផែក្រុងព្រះសីហនុ បន្តថា នាវាទេសចរណ៍ខាងលើនេះ មានកងនាវិកសរុប៥១៦នាក់ ដោយមានដំណើរចេញពីប្រទេសថៃ ចូលមកប្រទេសកម្ពុជា មុននឹងបន្តដំណើរឆ្ពោះទៅកាន់ប្រទេសសឹង្ហបុរីទៀត នៅម៉ោង ៦ល្ងាចថ្ងៃទី២៧ ខែកុម្ភៈ ឆ្នាំ២០២០។
មន្ត្រីនគរបាលអន្តោប្រវេសន៍ដដែល បញ្ជាក់ថា ភ្ញៀវទេសចរបរទេសទាំងអស់ ត្រូវបានពិនិត្យសុខភាពតាមវេជ្ជសាស្ត្រត្រឹមត្រូវ មុននឹងអនុញ្ញាតឲ្យចុះពីនាវា សម្រាប់ដំណើរកម្សាន្តក្នុងក្រុងព្រះសីហនុ៕ ដោយ៖ ដែន សីមា