ជំងឺកូរ៉ូណា គឺជាជំងឺកាចសាហាវមួយប្រភេទ កំពុងធ្វើឲ្យពិភពលោកយកចិត្តទុកដាក់បំផុត ខណៈវីរុសថ្មីនេះបានបណ្តាលឲ្យមនុស្សស្លាប់សរុបចំនួន ២.៧៦០នាក់ ឆ្លង ៨០.៩៩៤នាក់ និងជាសះស្បើយ ៣០.០០០នាក់ទូទាំងពិភពលោក គិតត្រឹមថ្ងៃទី២៦ ខែកុម្ភៈ ឆ្នាំ២០២០។
ពិតណាស់ ជំងឺកូរ៉ូណានេះ ត្រូវបានផ្ទុះចេញពីក្នុងទីក្រុង Wuhan ប្រទេសចិន ហើយវាបានឆ្លងរាលដាលទាំងនៅក្នុងប្រទេសចិន និងប្រទេសជិតខាងយ៉ាងលឿន ក្នុងនោះជាពិសេសកូរ៉េខាងត្បូងខ្លាំងតែម្តង ដែលនាំឲ្យមានការរើសអើងដល់ប្រជាជនចិន ព្រោះតែម្នាក់ៗខ្លាចឆ្លងជំងឺនេះពីពួកគេ ។
បើទោះប្រទេសគេមានអ្នកស្លាប់យ៉ាងច្រើនដោយសារឆ្លងជំងឺនេះក៏ដោយ តែសម្រាប់ប្រទេសកម្ពុជាយើង ហាក់ពុំទាន់មានរបាយការណ៍ណាបញ្ជាក់ពីមានអ្នកស្លាប់ ឬ ឆ្លងជំងឺកូរ៉ូណានេះនៅឡើយទេ ។
ដោយឡែក ថ្មីៗនេះ ឯកឧត្តម ពេជ្រ ស្រស់ បានធ្វើឲ្យអ្នកប្រើប្រាស់បណ្តាញសង្គមភ្ញាក់ផ្អើល ក្រោយលោកសង្ស័យខ្លួនឯងឆ្លងមេរោគ Covid-19 ក្រោយទៅសម្រាកនៅសណ្ឋាគារមួយនៅកំពង់សោមកាលពីអាទិត្យមុន ។
នេះបើយោងតាមហ្វេសប៊ុកឯកឧត្តម ពេជ្រ ស្រស់ ផ្ទាល់បានបង្ហោះឲ្យដឹងថា៖ «មិននិយាយលេងទេ ស្អែកគឺខ្ញុំណាត់ពេទ្យរួចហើយ ដើម្បីទៅតេស្តរកមើលមេរោគកូរ៉ូណា វាមិនកើតអ្វីនោះទេប៉ុន្តែក៏ត្រូវឲ្យច្បាស់ផងដែរ ពីព្រោះអាការៈខ្ញុំដាក់ថ្នាំមិនត្រូវទាល់តែសោះ។
ក្តៅខ្លួន ផ្តាសាយ ឈឺបំពង់ករនិងល្វើយក្នុងខ្លួន ដើម្បីច្បាស់លាស់ត្រូវទៅពិនិត្យរកមេរោគកូរ៉ូណា ទើបគេងលក់ស្រួល។ បញ្ជាក់៖ខ្ញុំមានអាការៈបែបនេះគឺក្រោយពីខ្ញុំត្រឡប់មកពីគេងនៅសណ្ឋាគារឯករាជ្យ ឯ ខេត្តព្រះសីហនុវិញកាលពីថ្ងៃទី២០ខែកុម្ភៈ ឆ្នាំ២០២០ កន្លងទៅ។ ពេជ្រ ស្រស់ ២៦/០២/២០២០» ៕ ដោយ៖ លឹម ហុង
