ប្រទេសកូរ៉េខាងត្បូង នៅថ្ងៃព្រហស្បតិ៍នេះ បានប្រកាសថាមានអ្នកផ្ទុកវីរុសកូរ៉ូណា ឬ COVID-19 ចំនួន ៣៣៤នាក់បន្ថែមទៀត ធ្វើឲ្យតួលេខនៃអ្នកឆ្លងសរុបក្នុងប្រទេសមួយនេះកើនដល់ ១.៥៩៥នាក់។ នេះបើតាមការដឹងរបស់មជ្ឈមណ្ឌលគ្រប់គ្រង និងការពារជំងឺ។
ត្រឹមរយៈពេល ១ថ្ងៃមានអ្នកឆ្លងរហូតដល់ ៣៣៤នាក់ ដែលវាគឺជាតួលេខខ្ពស់បំផុត ចាប់តាំងពីប្រទេសនេះរកឃើញមានករណីឆ្លងដំបូងកាលពីថ្ងៃទី ២០ ខែមករា។
រហូតមកដល់ពេលនេះ នៅកូរ៉េខាងត្បូង មានអ្នកស្លាប់ចំនួន ១២នាក់ដោយសារវីរុសមរណៈខាងលើ។
សូមបញ្ជាក់ថា កូរ៉េខាងត្បូង មានការរាតត្បាតវីរុសកូរ៉ូណាយ៉ាងខ្លាំងក្នុងរយៈពេលប៉ុន្មានថ្ងៃនេះ ហើយតួលេខនៃអ្នកឆ្លងដ៏ច្រើនបែបនេះ បានធ្វើឲ្យប្រទេសនេះ ក្លាយជាប្រទេសទី ២ដែលមានអ្នកឆ្លងច្រើនបំផុត បន្ទាប់ពីប្រទេសចិន៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia