រដ្ឋាភិបាលចិនបានដាក់ចេញជាផ្លូវការនូវការហាមឃាត់ជាអចិន្ត្រៃយ៍ ទៅលើការលក់ និងការប្រើប្រាស់សត្វព្រៃខុសច្បាប់ ចំពេលមានការផ្ទុះឡើងនូវវីរុសឆ្លង COVID-19 ។
យោងតាមសៀងហៃបានឲ្យដឹងថា ការប្រកាសអំពីការហាមឃាត់ជាអចិន្ត្រៃយ៍ត្រូវបានធ្វើឡើងដោយគណៈកម្មាធិការអចិន្ត្រៃយ៍នៃសភាប្រជាជនជាតិកាលពីថ្ងៃច័ន្ទ។ គណៈកម្មាធិការបាននិយាយថា ការបរបាញ់ ការធ្វើពាណិជ្ជកម្ម និងការដឹកជញ្ជូនសត្វព្រៃដែលធំធាត់តាមធម្មជាតិ និងបង្កាត់ពូជនៅក្នុងព្រៃ សម្រាប់គោលបំណងតែមួយគត់នៃការប្រើប្រាស់ គឺឥឡូវនេះត្រូវបានហាមឃាត់ទាំងស្រុងហើយ។
គណៈកម្មាធិការនេះបានបន្ថែមទៀតថា អ្នកដែលចាប់បានរំលោភច្បាប់នឹងត្រូវទទួលទណ្ឌកម្មយ៉ាងខ្លាំង។
សារព័ត៌មាន CNN បានដកស្រង់សំដីរបាយការណ៍ពីប្រព័ន្ធផ្សព្វផ្សាយរដ្ឋរបស់ចិនថា សេចក្តីសម្រេចចិត្តនេះមានគោលបំណង “ហាមប្រាមការបរិភោគសត្វព្រៃទាំងស្រុង” និង “ការបង្ក្រាបការធ្វើពាណិជ្ជកម្មសត្វព្រៃខុសច្បាប់” ។
សត្វព្រៃដែលត្រូវបានប្រើសម្រាប់ឱសថ ការតាំងពិព័រណ៍ ឬការស្រាវជ្រាវវិទ្យាសាស្ត្រ នឹងត្រូវឆ្លងកាត់ការត្រួតពិនិត្យ និងការយល់ព្រមយ៉ាងតឹងរឹង ពីសំណាក់អ្នកទទួលបន្ទុកស្របតាមបទបញ្ញត្តិពាក់ព័ន្ធ។
ការរាតត្បាតនៃជំងឺផ្តាសាយ Covid-19 ត្រូវបានគេជឿថា បានចាប់ផ្តើមនៅក្នុងទីផ្សារសើមមួយនៅទីក្រុង Wuhan នៃខេត្ត Hubei ប្រទេសចិន កាលពីអំឡុងខែធ្នូ ឆ្នាំ២០១៩ ។ ប៉ុន្មានសប្តាហ៍បន្ទាប់ពីការផ្ទុះឡើង រដ្ឋាភិបាលចិនបានដាក់បម្រាមបណ្តោះអាសន្នលើការលក់ និងការប្រើប្រាស់សត្វព្រៃនៅក្នុងខែមករា ។
ទោះយ៉ាងណា គេនៅមិនទាន់ដឹងថា វីរុសនោះមានប្រភពមកពីណាទេ ប៉ុន្តែអ្នកវិទ្យាសាស្ត្រជឿជាក់ថា វាមកពីសត្វប្រចៀវ ហើយត្រូវបានបញ្ជូនទៅសត្វពង្រូល មុនពេលវាត្រូវបានចម្លងមកមនុស្ស៕
ដោយ៖ លឹម ហុង (ប្រភព៖ nextshark)