ខេត្តកំពង់ស្ពឺ៖ ភ្ញៀវទេសចរជាតិ បានកោតសរសើរ អ្នកគ្រប់គ្រងរមណីយដ្ឋាន ឬមណ្ឌលកម្សាន្តអំពែភ្នំ នាខេត្តកំពង់ស្ពឺ ថាបានរៀបចំអនាម័យបរិស្ថានគួរជាទីចាប់អារម្មណ៍។ ប៉ុន្តែជាក់ស្តែងហាក់មិនសូវមានភ្ញៀវទេសចរច្រើនទេ ចូលមកទស្សនា រមណីយដ្ឋានមួយនេះ។
យ៉ាងណាក៏ដោយចុះ ភ្ញៀវទេសចរជាតិ បានរិះគន់ លោក វី សំណាង អភិបាលខេត្តកំពង់ស្ពឺ ដែលទុកឲ្យបទល្មើសសត្វព្រៃកើតមានអនាធិបតេយ្យ ដោយគ្មានសមត្ថកិច្ចហាមឃាត់។ បទល្មើសសត្វព្រៃអនាធិបតេយ្យទាំងនោះ តាមរយៈអាជីវករលក់ដូរចំណីអាហារ ភាគច្រើននៅមណ្ឌលកម្សាន្តមួយនេះ បាននាំយកសាច់សត្វព្រៃជាច្រើនប្រភេទរួមមាន៖ សាច់ជ្រូកព្រៃ , សត្វទន្សាយ និងសត្វឈ្លូសជាដើម មកប្រកាសលក់ ជូនភ្ញៀវចម្អិនធ្វើម្ហូបយ៉ាងអនាធិបតេយ្យ ហើយគ្មានការហាមឃាត់។
ផ្តើមពីបញ្ហានេះ ភ្ញៀវទេសចរជាតិ បានសំណូមពរដល់ លោក វី សំណាង អភិបាលខេត្តកំពង់ស្ពឺ ជួយមានវិធានការទប់ស្កាត់បទល្មើសសត្វ ដែលកំពង់ធ្វើចរាចរណ៍ នៅខេត្តកំពង់ស្ពឺ ជាពិសេសកំពុងត្រូវបានអាជីវករនៅតាមទីតាំងភាគច្រើន មានរមណីយដ្ឋានអំពែភ្នំជាដើម មានដាក់លក់សាច់សត្វព្រៃយ៉ាងចំហ ដោយគ្មានសមត្ថកិច្ចហាមឃាត់៕ ដោយ៖ ដែន សីមា