ខេត្តមណ្ឌលគិរី៖ ជនសង្ស័យប្រើប្រាស់អាវុធខុសច្បាប់ម្នាក់ ត្រូវបានសមត្ថកិច្ចស្រុកកែវសីមា ឃាត់ខ្លួន ខណៈបុរសរូបនេះ ធ្វើសកម្មភាពអារជ្រៀកឈើក្នុង ដែនជម្រកសត្វព្រៃកែវសីមា។
ហេតុការណ៍ខាងលើនេះ កើតនៅម៉ោង ៦ និង០៧ នាទីថ្ងៃទី២៧ ខែកុម្ភៈ ឆ្នាំ២០២០នេះ។
អាជ្ញាធរស្រុកកែវសីមា បានឱ្យដឹងថា មន្រ្តីបរិស្ថាននៅដែនជម្រកសត្វព្រៃកែវសីមា សហការជាមួយ មន្រ្តីកងរាជអាវុធហត្ថលើផ្ទៃប្រទេស និងមន្រ្តីនគរបាលស្នងការខេត្តមណ្ឌលគិរី បានឃាត់ជនសង្ស័យចំនួន១ នាក់ ដែលចូលមកកាប់ជ្រៀកឈើខុសច្បាប់ និង ប្រើប្រាស់អាវុធគ្មានលិខិតអនុញ្ញាត នៅចំណុចពាមអូរប្រ៉ ស្ថិតនៅភូមិស្រែល្វី ឃុំស្រែខ្ទុម ស្រុកកែវសីមា ខេត្តមណ្ឌលគិរី។
ជនសង្ស័យ មាន ឈ្មោះ ជិល ប៊ុននឿន ភេទប្រុស អាយុ ២៥ ឆ្នាំជនជាតិព្នង រស់នៅភូមិស្រែល្វី ឃុំ ស្រែខ្ទុម ស្រុកកែវសីមា ខេត្តមណ្ឌលគិរី។
ដកហូតវត្ថុតាងរួមមាន៖ អាវុធAK ស្វ័យបត់ចំហៀងចំនួន ១ ដើម មានលេខ ៤៤៤៦ គ្រាប់ចំនួន ១០ គ្រាប់។ រណារយន្តចំនួន ១ គ្រឿង ម៉ាក០៣៨។ ម៉ូតូកែច្នៃចំនួន ១ គ្រឿង។
ជនសង្ស័យត្រូវបានបញ្ជូនមកមន្ទីរបរិស្ថានខេត្តមណ្ឌលគិរី ដើម្បីកសាងសំណុំរឿងទៅកាន់បញ្ជូនទៅតាមនីតិវីធីច្បាប់៕ ដោយ៖ ដែន សីមា
