ភ្នំពេញ៖ ស្នងការដ្ឋាននគរបាលរាជធានីភ្នំពេញ នៅថ្ងៃទី២៧ខែកុម្ភៈ បានឲ្យដឹងថា ដោយសង្កេតឃើញថា មួយរយ:ពេលចុងក្រោយនេះ មានករណីអគ្គិភ័យកើតឡើងយ៉ាងច្រើន តាមបណ្តាខណ្ឌនានា ដូចជាការឆេះរោងចក្រ សហគ្រាស ឃ្លាំងស្តុកទំនិញ គេហដ្ឋាន ... ។ល។
បង្កមកពីការឆ្លងចរន្តអគ្គិសនី ឬមកពីការធ្វេសប្រហែស ដែលធ្វើឲ្យមានការបាត់បង់ និងខូចខាតទ្រព្យសម្បត្តិជាច្រើន ជាពិសេសគឺការបាត់បង់ដល់អាយុជីវិតនៅពេលមានអគ្គិភ័យកើតឡើង ។
ដូច្នេះសូមបងប្អូនប្រជាពលរដ្ឋមេត្តាប្រុងប្រយ័ត្នខ្ពស់ ដើម្បីបង្ការកុំឲ្យអគ្គិភ័យកើតឡើង ដោយត្រួតពិនិត្យឲ្យបានច្បាស់រាល់ឧបករណ៍ ឬសម្ភារ:ទាំងឡាយណាដែលអាចបង្កឲ្យមានអគ្គិភ័យកើតឡើង ។
កម្លាំងនៃការិយាល័យអគ្គិភ័យ ប្រចាំការ ២៤/២៤ម៉ោង ដើម្បីត្រៀមចេញជួយសង្គ្រោះ និងពន្លត់ឲ្យបានទាន់ពេលវេលា ។ លេខទំនាក់ទំនងទាន់ហេតុការណ៍ : 666។
សូមបញ្ជាក់ថា លោកឃួង ស្រេង អភិបាលរាជធានីភ្នំពេញ អមដំណើរដោយលោក មាន ចាន់យ៉ាដា អភិបាលរងរាជធានីភ្នំពេញ លោកហែម ដារិទ្ធិ អភិបាលខណ្ឌពោធិសែនជ័យ និងអភិបាលរងខណ្ឌ បានអញ្ជើញទៅជួយធ្វើអន្តរាគមន៍ បញ្ជាពន្លត់អគ្គិភ័យ ដែលមឆេះរោងចក្រផលិតបារីនីសដ៏ធំមួយកន្លែង នៅខណ្ឌពោធិ៍សែនជ័យទាំងកណ្ដាលអធ្រាត្រ ដើម្បីលើកទឹកចិត្តកងកម្លាំងនគរបាលពន្លត់អគ្គិភ័យ និងអាជ្ញាធរខណ្ឌពោធិ៍សែនជ័យ ក្នុងការប្រតិបត្តិការពន្លត់ឱ្យបានលឿន។
មន្ត្រីរដ្ឋបាលខណ្ឌពោធិ៍សែនជ័យ បានឱ្យដឹងថា៖ កាលពីយប់ថ្ងៃទី២៦កុម្ភៈនេះ មានករណីគ្រោះអគ្គិភ័យឆាបឆេះរោងចក្រផលិតបារីនីសដ៏ធំមួយកន្លែង មានទីតាំងស្ថិតនៅជិតវត្តព្រៃស្ពឺ ក្នុងភូមិស្រែជំរៅ សង្កាត់ចោមចៅទី២ ខណ្ឌពោធិ៍សែនជ័យ ហើយកាលពីម៉ោងជាង១រំលងអធ្រាត្រ ឈានចូលថ្ងៃទី២៧ ខែកុម្ភៈ ឆ្នាំ២០២០ ត្រូវបានអគ្គិភ័យឆេះបំផ្លាញរហូតដល់រលំអគារទាំងស្រុង។ ដោយមានការដឹកនាំបញ្ជាផ្ទាល់ពីអភិបាលរាជធានីភ្នំពេញនោះ ទោះបីជាករណីអគ្គិភ័យឆេះអគារនៃរោងចក្រផលិតបារីនីស ខាងលើនេះអស់ទាំងស្រុងក្ដី តែមិនបណ្តាលឲ្យរាលដាលដល់ផ្ទះពលរដ្ឋ នៅក្បែរនោះទេ។
កន្លងមកលោកឃួង ស្រេង អភិបាលរាជធានីភ្នំពេញ ធ្លាប់បានអំពាវនាវដល់ប្រជាពលរដ្ឋជាម្ចាស់ផ្ទះ និងជា ម្ចាស់អាជីវកម្ម សហគ្រាស រោងចក្រ ត្រូវត្រួតពិនិត្យប្រព័ន្ធអគ្គិសនី បំពាក់ឧបករណ៍ពន្លត់អគ្គិភ័យ ដើម្បីបង្ការនិងទប់ស្កាត់ឱ្យបានទាន់ពេលវេលា។
លោកមាន ចាន់យ៉ាងដា អភិបាលរងរាជធានីភ្នំពេញ បានសរសេរលើហ្វេសប៊ុក នៅថ្ងៃទី២៧ខែកុម្ភៈថា ក្នុងសប្ដាហ៍នេះ មានករណីបាត់បង់ទ្រព្យសម្បត្ដិរបស់ប្រជាពលរដ្ឋ ឃ្លាំងទំនិញដែលកើតឡើងដោយអគ្គិភ័យប៉ុន្មានករណីកន្លងមក ក្នុងរាជធានីភ្នំពេញមិនថាយប់ឬថ្ងៃ សូមអំពាវនាវដល់ប្រជាពលរដ្ឋ ម្ចាស់អាជីវកម្ម សហគ្រាស រោងចក្រ ត្រូវត្រួតពិនិត្យប្រព័ន្ធអគ្គិសនី បំពាក់ឧបករណ៍ពន្លត់អគ្គិភ័យដើម្បីបង្ការនិងទប់ស្កាត់ឱ្យបានទាន់ពេលវេលា៕ដោយ៖បញ្ញាស័ក្តិ