ភ្នំពេញ៖ រឿងរ៉ឺម៉កដឹកឈើ គ្រាន់តែបើកចេញពីដេប៉ូមួយកន្លែង ត្រូវបានមេព្រៃឃាត់ ថែមទាំងគំរាមដកកាំភ្លើង នោះ ត្រូវមន្ទីរកសិកម្ម រុក្ខាប្រម៉ាញ់ និង នេសាទ រាជធានីភ្នំពេញ នៅថ្ងៃទី ២៥ ខែ កុម្ភៈ ឆ្នាំ ២០២០ បានចេញលិខិតមួយជម្រាបមកលោកនាយខណ្ឌរដ្ឋបាលព្រៃឈើភ្នំពេញ ឲ្យចាត់បញ្ជូនលោក គឹមហ៊ាន ច័ន្ទសុភក្ត្រា នាយផ្នែករដ្ឋបាលព្រៃឈើចំការមន ឲ្យមករៀនសូត្របន្ថែមអំពីច្បាប់មួយរយះនៅមន្ទីរកសិកម្ម រុក្ខាប្រម៉ាញ់ និង នេសាទ រាជធានីភ្នំពេញ ដើម្បីពង្រឹងសមត្ថភាពការងារ ។
ក្នុងលិខិតដដែលនេះក៏បានចាត់តាំងលោក ឆេង ថៃ នាយរងផ្នែករដ្ឋបាលព្រៃឈើចំការមនទទួលបន្ទុកដឹកនាំ ចាត់ចែងការងារផ្នែករដ្ឋបាលព្រៃឈើចំការមនជំនួសជាបណ្ដោះអាសន្នចាប់ពីថ្ងៃចុះហត្ថលេខាតទៅរហូតដល់មានការសម្រេចជាថ្មី ។
ចំណាត់ការរបស់មន្ទីរកសិកម្ម រុក្ខាប្រម៉ាញ់ និង នេសាទ រាជធានីភ្នំពេញ បានកើតមានឡើងបន្ទាប់ពីមានការរិះគន់ខ្លាំងទៅលើទង្វើអសីលធម៌របស់លោក គឹមហ៊ាន ច័ន្ទសុភក្ត្រា នាយផ្នែករដ្ឋបាលព្រៃឈើចំការមន ដែលបានប្រើសំដីសម្លុតគំរាមកំហែងប្រជាពលរដ្ឋក្នុងពេលចុះចាប់ឈើមួយកូនរ៉ឺម៉ក នៅខណ្ឌមានជ័យកាលពីថ្ងៃទី ២២ ខែ កុម្ភៈ ឆ្នាំ ២០២០ កន្លងមក ។
បណ្តាលសង្គមហ្វេសប៊ុក បានលើកឡើងថា ផ្អើលទៀតហើយ រម៉កដឹកឈើ គ្រាន់តែបើកចេញពីដេប៉ូមួយកន្លែង ត្រូវបានមេព្រៃឃាត់ ថែមទាំងគំរាមដកកាំភ្លើង ស្ថិតនៅលើផ្លូវ៣៧១ សង្កាត់បឹងទំពុនទី២ ខណ្ឌមានជ័យ នាវេលាម៉ោង៣ជាងរសៀលថ្ងៃទី២០ ខែកុម្ភៈ ឆ្នាំ២០២០។
ប្រភពដដែលបានរៀបរាប់បន្តថា “អើយលោកពូលិស អើយលោកប៉ូលិស ឈើអ្នកកាប់នៅក្នុងព្រៃម៉េចក៏មិនទៅចាប់ ហេតុអ្វីបានមកចាប់ឈើគេត្រូវច្បាប់ទៅវិញចឹង មិនតែប៉ុណ្ណោះសម្លុតចង់បាញ់ប្រជារាស្ត្រទៀត ពិតជាគោរពច្បាប់បានល្អមែន”។
ចំណែកលោកផែង វណ្ណៈ បានថ្លែងថា មេព្រៃសំដីពាលឈ្មោះ ហ៊ាន ច័ន្ទសុភក្ត្រា ដែលរងការរិះគន់ពីមហាជនកក្រើក ហ្វេសប៊ុក អំពីទង្វើពាលរបស់ខ្លួននោះត្រូវបានថ្នាក់លើរក្សាអោយទុកកាន់តួនាទី និង មុខដំណែង ដដែល ។ បើថ្នាក់លើនៅតែរក្សាទុកមន្ត្រីសំដីពាលបែបនេះ ពេលបាត់សន្លឹកឆ្នោតកុំឆ្ងល់ថាមកពីអ្វី ? គឺមកពីថ្នាក់លើនឹងឯងដែលជាអ្នកធ្វើឲ្យរាស្ត្រស្អប់លែងបោះឆ្នោតឲ្យ ។
ពេលខ្លះខ្ញុំចេះតែឆ្ងល់ ហេតុអ្វីបានថ្នាក់លើខ្លះចូលចិត្តគាំទ្រមន្ត្រីដែលរាស្ត្រស្អប់ខ្ពើមម្ល៉េះ ? តើមន្ត្រីសម្តីពាលអញ្ចឹងៗផ្ដល់ផលប្រយោជន៍អ្វីខ្លះបានប្រឹងរក្សាទុកម្ល៉េះ ? ឬមួយគិតថា ១២៥ កៅអីហើយ ចង់ធ្វើអ្វីក៏បាន ? ៕ ដោយ៖កូឡាប