ភ្នំពេញ៖ថ្ងៃទី២៧កុម្ភៈនេះ ស្ថានទូតស៊ុយអែតប្រចាំនៅកម្ពុជា និងទីភ្នាក់ងារសម្រាប់ ការអភិវឌ្ឍន៍អន្តរជាតិសហរដ្ឋអាមេរិក បានផ្តល់ជំនួយឥតសំណង ដល់មូលនិធិក្រុមប្រឹក្សាអាជ្ញាកណ្ដាល ដើម្បីពង្រឹងសេវាដោះស្រាយ វិវាទការងារនៅកម្ពុជា។
ស្ថានទូតស៊ុតអែត បានចុះហត្ថលេខាផ្តល់មូលនិធិសរុបចំនួន ៥លានក្រូណា (ប្រមាណ៥៣ម៉ឺនដុល្លារសហរដ្ឋអាមេរិក)សម្រាប់ អនុវត្តគម្រោងរយៈពេល២ឆ្នាំ (២០២០-២០២១) ដើម្បីលើកកម្ពស់ ប្រព័ន្ធមជ្ឈត្តវិនិច្ឆ័យដោះស្រាយវិវាទការងារដោយអាជ្ញាកណ្ដាលដែលអាចជឿជាក់បាន និងប្រកបដោយប្រសិទ្ធិភាព។ ទីភ្នាក់ងារ សម្រាប់ការអភិវឌ្ឍន៍អន្តរជាតិសហរដ្ឋអាមេរិក បានបន្តផ្តល់ ជំនួយមូលនិធិថ្មីចំនួនទឹកប្រាក់ប្រមាណ ១លាន ៥សែនដុល្លារ សហរដ្ឋអាមេរិក សម្រាប់រយៈពេលប្រាំឆ្នាំ ដល់មូលនិធិក្រុមប្រឹក្សា អាជ្ញាកណ្ដាល តាមរយៈដៃគូរបស់ខ្លួនគឺមជ្ឈមណ្ឌលសាមគ្គីភាព។
ការផ្តល់មូលនិធិទាំងពីរនេះមានគោលបំណងដូចគ្នា គឺដើម្បីធ្វើឱ្យ ប្រព័ន្ធទំនាក់ទំនងការងារ និងសេវាដោះស្រាយវិវាទការងារនៅក្នុង ប្រទេសកម្ពុជាកាន់តែមានប្រសិទ្ធភាព បង្កើនការយល់ដឹងពីក្រុម ប្រឹក្សាអាជ្ញាកណ្ដាល និងលើកកម្ពស់ជំនាញក្នុងការដោះស្រាយ វិវាទការងារទៅដល់កម្មករ និយោជិត និងនិយោជក និងដើម្បីរក្សា និងលើកកម្ពស់សុចរិតភាព និងនិរន្តរភាពរបស់ស្ថាប័ន ក្រុមប្រឹក្សាអាជ្ញាកណ្តាល៕ ដោយ៖បញ្ញាស័ក្តិ