ពោធិ៍សាត់៖ បន្ទាប់ពីមានការរិះគន់ដល់មន្ត្រីនគរបាលក្រុងពោធិ៍សាត់ ថាបានដោះលែងរថយន្ត និង ជនបង្ក ករណី គ្រោះថ្នាក់ចរាចរណ៍ នៅក្បាលស្ពានថ្មរទីរួមខេត្ត ពោធិ៍សាត់ កាលពីថ្ងៃទី ១៧ ខែ កុម្ភៈ ឆ្នាំ ២០២០ ដោយមិនសងប្រាក់ជនរងគ្រោះ មួយរៀលនោះ ប្រភពពីមន្ត្រីនគរបាលក្រុងពោធិ៍សាត់បានលួចបង្ហើបថា អ្នកដែលបញ្ជាឲ្យដោះលែងរថយន្ដ និង ជនបង្កគឺ លោកឧត្ដមសេនីយ៍ទោ សារុន ចាន់ធី ស្នងការនគរបាលខេត្តពោធិ៍សាត់ និង លោកស្នងការរងទទួលបន្ទុកចរាចរណ៍ ។ ចំណែកជនបង្កជាជនជាតិ វៀតណាមឈ្មោះ ហ៊ុយ គីម ជាម្ចាស់រថយន្ត ហ្វត ពណ៌ ស ពាក់ផ្លាកលេខ 2AY-2577 ភ្នំពេញ ។ នេះបើតាមការរៀបរាប់របស់លោកផែង វណ្ណៈ។
គួរបញ្ជាក់ថាកាលពីថ្ងៃទី ១៦ ខែ កុម្ភៈ ឆ្នាំ ២០២០ វេលាម៉ោងប្រមាណ ១០:០០ នាទី ព្រឹក រថយន្ដ ហ្វត ពាក់ផ្លាកលេខ 2AY-2577 ភ្នំពេញ បានបើកបុកម៉ូតូជនរងគ្រោះបណ្ដាលឲ្យរបួសធ្ងន់នៅក្បាលស្ពានថ្មត្រើយខាងលិច ទីរួមខេត្តពោធិ៍សាត់ ។ ពេលបុកមនុស្សហើយ រថយន្ដបង្កមិនឈប់ទេ បានបើករត់គេចរហូតដល់ប៉ុស្តិ៍ត្រួតពិនិត្យការអនុវត្តន៍ច្បាប់ចរាចរមុខស្នាក់ការពន្ធដារខេត្តទើបចាប់បាន ហើយនាំយកទាំងរថយន្ត និង មនុស្ស មកអធិការដ្ឋាននគរបាលក្រុងពោធិ៍សាត់ ទុកដោះស្រាយ ។ លុះថ្ងៃទី ១៧ ខែ កុម្ភៈ ឆ្នាំ ២០២០ ស្នងការខេត្តពោធិ៍សាត់គឺ លោកឧត្ដមសេនីយ៍ទោ សារុន ចាន់ធី បញ្ជាឲ្យដោះលែងរថយន្ដនិងជនបង្កតែម្ដង ដោយគ្មានដំណោះស្រាយចំពោះជនរងគ្រោះបន្តិចសោះឡើយ ។ ចំណែកជនរងគ្រោះដោយរបួសធ្ងន់ពេក ក៏យកទៅព្យាបាលនៅប្រទេសវៀតណាម រហូតមកដល់ថ្ងៃទី ២៧ ខែ កុម្ភៈ ឆ្នាំ ២០២០ នេះ មិនទាន់បានចេញពីមន្ទីរពេទ្យនៅឡើយទេ ។
លោកផែង វណ្ណៈបានប្រាប់ទៀតថា “ទង្វើរបស់ស្នងការខេត្តពោធិ៍សាត់ និង អធិការនគរបាលក្រុងពោធិ៍សាត់ បង្កឲ្យ មានការរិះគន់ខ្លាំង ព្រោះតែមិនគិតពីទុក្ខវេទនារបស់ជនរងគ្រោះ បែជាឃុបឃិតគ្នាដោះលែងទាំងរថយន្ត និង ជនបង្កទៅបាត់តែម្ដង ។ ប៉ុន្ដែ បន្ទាប់ពីមានការរិះគន់កក្រើកហ្វេសប៊ុកមក សមត្ថកិច្ចរបស់ស្នងការដ្ឋានខេត្តពោធិ៍សាត់ បានទាក់មកជនរងគ្រោះដើម្បីដោះស្រាយគ្នា ។ តែដោយជនរងគ្រោះនៅរបួសធ្ងន់មិនទាន់បានទៅដោះស្រាយគ្នានៅឡើយទេ ។
គិតទៅវៀតណាម មានអំណាចខ្លាំងមែន បង្កគ្រោះថ្នាក់ចរាចរណ៍ហើយ មានអំណាចបញ្ជាឲ្យ ស្នងការខេត្តដោះលែងបានយ៉ាងរលូនទៀត “។
បន្ទាប់ពីមានការរិះគន់ ស្នងការដ្ឋាននគរបាលខេត្តពោធិ៍សាត់ក៏បានចេញសេចក្តី បំភ្លឺពាក់ព័ន្ធករណីចោទប្រកាន់ខាងលើនេះ។
សរុបខ្លឹមសារបំភ្លឺរបស់ស្នងការដ្ឋាននគរបាលខេត្តពោធិ៍សាត់ មាន ៤ ចំណុចសំខាន់ ៖ ១- ជនរងគ្រោះ ដែលកំពុងរងរបួសដេកព្យាបាលនៅ មន្ទីរពេទ្យ ជា ជនបង្កបើកម៉ូតូទៅបុកឡាន ។ ២- ការដោះលែងមិនមែនស្នងការជាអ្នកបញ្ជាទេ ព្រោះស្នងការជាប់រវល់ បេសកកម្ម នៅភ្នំពេញ ។ ៣-អ្នកដែលបញ្ជាឲ្យដោះលែង ម្ចាស់ឡាន និង ឡាន គឺលោក អភិបាលខេត្ត អភិបាលខេត្តរង និង ព្រះរាជអាជ្ញាអមសាលាដំបូងខេត្តពោធិ៍សាត់ ។ ៤- ម្ចាស់រថយន្តមិនខុសទេ ។
លោកបន្តថា បំភ្លឺចុះបំភ្លឺឡើង នគរបាលខេត្តពោធិ៍សាត់ ភ្លេចបញ្ជាក់មូលហេតុដែលរថយន្តបើករត់ បើម្ចាស់រថយន្តមិនខុស ហេតុអ្វីបានបើករត់គេចពីកន្លែងកើតហេតុ ?៕ ដោយ៖កូឡាប