ភ្នំពេញ : អាជ្ញាសាលានៃដំបូងរាជធានីភ្នំពេញ ចុះអនុវត្តដីកាសម្រេចចាត់ចែងជាបណ្ដោះអាសន្ន លេខ៥៦ ចុះថ្ងៃទី១៤ កុម្ភ: ឆ្នាំ ២០២០ តែពេលអនុវត្តក៏មានការផ្ទុះការតវ៉ា និងហិង្សាពីកម្មករសំណង់ទាមទារបើកប្រាក់ខែ និងយកសាំងបម្រុងដុតខ្លួន ដែលកើតហេតុនាព្រឹកថ្ងៃទី២៥ ខែ កុម្ភ: ឆ្នាំ ២០២០ ក្នុងអគារការដ្ឋានកំពុងសាងសង់ ក្នុងសង្កាត់ទន្លេបាសាក់ ខណ្ឌចំការមន ។
អាជ្ញាធរបានប្រាប់ថា លោក សុខ ចន្ថា អាជ្ញាសាលានៃដំបូងរាជធានីភ្នំំពេញ បានដឹកនាំគណៈកម្មាការចម្រុះ រួមមាន សាលាខណ្ឌចំការមន អាវុធហត្ថរាជធានីភ្នំំពេញ នគរបាលខណ្ឌចំការមន កម្លាំងកងរាជអាវុធខណ្ឌចំការមន សាលាសង្កាត់ទន្លេបាសាក់ ប៉ុស្តិ៍រដ្ឋបាលទន្លេបាសាក់ចុះអនុវត្តដីកាសម្រេចចាត់ចែង ជាបណ្តោះអាសន្ន លេខ៥៦ធដរ ចុះថ្ងៃ ១៤ កុម្ភៈ ២០២០ របស់សាលាដំបូងរាជធានីភ្នំពេញ នៅចំណុចការដ្ឋានសំណង់ ស៊ីណូហ្រ្គេតវ៉ល ដីឡូតិ៍លេខ៨ ផ្លូវក្រសួងការបរទេស ក្រុមទី៧៨ ភូមិ១៤ សង្កាត់ទន្លេបាសាក់ ខណ្ឌចំការមន ដោយឲ្យកម្មករខ្មែរប្រហែល២០នាក់ និងមេការសំណង់ចិនស្នើឲ្យចេញពីក្នុងការដ្ឋាននោះ ។ តែភ្លាមៗនោះ ក៏កម្មករមានខ្មែរមានជនជាតិចិន ផ្ទុះការតវ៉ានិងបង្កហិង្សាជាក់ស្ដែង បុរសជនជាតិចិនម្នាក់ បានយកសាំងចំនួន១លីត្រកន្លះ មកចង់ស្រោចពេញខ្លួនប្រាណ តែអាជ្ញាធរក៏ទៅសម្របសម្រួលជាមួយបុរសនោះ និងលួងលោមយកសាំងចេញពីដី កុំឲ្យធ្វើបែបនេះ វាគ្រោះថ្នាក់ដល់អាយុជីវិត និងប៉ះពាល់អ្នកដទៃទៀត ។
លោក លុយ ចន្ទផល តំណាងឲ្យម្ចាស់ការដ្ឋានទីប្រឹក្សាផ្នែកច្បាប់ បានប្រាប់អ្នកសារព័ត៌មានជាសាធារណៈកុំឲ្យមានការយល់ច្រលំ ការអនុវត្តដីការបណ្ដោះ គឺទាមទារយកការដ្ឋានមកវិញ ដោយក្រុមហ៊ុនដេញថ្លៃឲ្យមេការសាងសង់អគារចំនួនកម្ពស់៥៥ជាន់ ជាអគារទំនើប ក៏ប៉ុន្តែធ្វើយឺតនិងខុសកិច្ចសន្យា ចំណែកអគារក៏ផ្អាកសាងសង់ជាច្រើនថ្ងៃដែរ ក៏បានប្ដឹងទៅតុលាការ ដើម្បីស្នើយកអគារមកវិញ និងដេញថ្លៃឲ្យក្រុមហ៊ុនផ្សេង ដើម្បីបន្តការសាងសង់អគារទំនើបនេះឆាប់រួចរាល់ ។
សូមបញ្ជាក់ថា គម្រោង The Peak គឺជាគម្រោងអភិវឌ្ឍន៍អគារចម្រុះ៥៥ជាន់ ដែលរួមមានអគារមួយសម្រាប់សណ្ឋាគារ និងការិយាល័យ និងអគារពីរទៀតសម្រាប់អគារស្នាក់នៅ ផ្សារទំនើប និងចំណតរថយន្តជាច្រើនជាន់ ដែលត្រូវបានអភិវឌ្ឍដោយ ក្រុមហ៊ុន អកស៍ឡី ជេម (ខេមបូឌា) ខូ អិលធិឌី ជាក្រុមហ៊ុនបុត្រសម្ព័ន្ធរបស់ក្រុមហ៊ុន Oxley Holdings Limited ។ ក្រុមហ៊ុន អកស៍ឡី ជេម បានចុះកិច្ចសន្យាជាមួយ ក្រុមហ៊ុន Sino Great Wall International Engineering Co., Ltd. (SGW) ឱ្យក្រុមហ៊ុន SGW ធ្វើជាអ្នកម៉ៅការសាងសង់គម្រោងនេះ។
យោងតាមការបញ្ជាក់ពីក្រុមហ៊ុន Oxley Gem ថា ដោយសារតែបញ្ហាហិរញ្ញវត្ថុរបស់ក្រុមហ៊ុនមេរបស់ក្រុមហ៊ុន SGW និងដោយសារក្រុមហ៊ុន SGW គ្រប់គ្រងគម្រោងមិនត្រឹមត្រូវ ជាហេតុនាំឱ្យការសាងសង់គម្រោងជួបប្រទះការលំបាក និងមានភាពយឺតយ៉ាវជាខ្លាំង ។ ក្រុមហ៊ុន អកស៍ឡី ជេម ដែលជាក្រុមហ៊ុនអភិវឌ្ឍន៍នៃគម្រោងនេះ បានស្នើផ្តល់ជំនួយដល់ក្រុមហ៊ុន SGW ដើម្បីឱ្យក្រុមហ៊ុននេះអាចសាងសង់ឱ្យរួចទាន់ពេលវេលា ស្របតាមកិច្ចសន្យា ហើយថែមទាំងបានពន្យារពេលជូនក្រុមហ៊ុន SGW សម្រាប់ធ្វើការបញ្ចប់ការសាងសង់ទៀត។ យ៉ាងណាមិញ ក្រុមហ៊ុន SGW មិនបានខិតខំបំពេញកាតព្វកិច្ចសាងសង់របស់ខ្លួនឱ្យប្រសើរឡើងឡើយ ដែលជាកត្តាបង្ហាញយ៉ាងច្បាស់ថា ក្រុមហ៊ុននេះពិតជាមិនមានសមត្ថភាព ក្នុងការបញ្ចប់ការសាងសង់គម្រោងទៅតាមពេលវេលាកំណត់ឡើយ។ ដូច្នេះ ដើម្បីជៀសវាងការយឺតយ៉ាវបន្ថែមទៀត ក្រុមហ៊ុន អកស៍ឡី ជេម បានសម្រេចចិត្តរំលាយកិច្ចសន្យាសាងសង់ជាមួយក្រុមហ៊ុន SGW នាខែតុលា ឆ្នាំ២០១៩។
ចាប់តាំងពីពេលនោះមក ក្រុមហ៊ុន អកស៍ឡី ជេម បានតែងតាំងក្រុមហ៊ុនសំណង់ថ្មីមួយទៀត សម្រាប់បន្តសាងសង់អគារ ពោលគឺក្រុមហ៊ុន China Railway Urban Construction Group Co., Ltd. ( CRUCG ) ដែលជាក្រុមហ៊ុនរដ្ឋចិន ដែលមានស្ថានភាពហិរញ្ញវត្ថុរឹងមាំល្អ ។
នៅពេលដែលកិច្ចសន្យាសាងសង់ជាមួយក្រុមហ៊ុន SGW ត្រូវបានរំលាយ ក្រុមហ៊ុននេះមានកាតព្វកិច្ចក្នុងការចាកចេញពីទីតាំងគម្រោង ដើម្បីឱ្យក្រុមហ៊ុន CRUCG ចូលកាន់កាប់ទីតាំងដើម្បីបន្តការសាងសង់គម្រោង។ យ៉ាងណាមិញ ក្រុមហ៊ុន SGW បានបំពានកាតព្វកិច្ចតាមកិច្ចសន្យារបស់ខ្លួន ដោយមិនព្រមចាកចេញពីទីតាំងគម្រោង និងធ្វើការកាន់កាប់គម្រោងយ៉ាងខុសច្បាប់។ សកម្មភាពនេះ បង្កឱ្យការសាងសង់គម្រោងកាន់តែយឺតយ៉ាវខ្លាំង ដោយសារក្រុមហ៊ុន CRUCG មិនអាចចូលក្នុងទីតាំងគម្រោងដើម្បីចាប់ផ្តើមការងាររបស់ខ្លួនបាន។
ហេតុដូចនេះ ក្រុមហ៊ុន អកស៍ឡី ជេម បានដាក់ពាក្យសុំដីកាសម្រេចរក្សាការពារនៅសាលាដំបូងរាជធានីភ្នំពេញ ស្នើសុំឱ្យតុលាការបង្គាប់ឱ្យក្រុមហ៊ុន SGW ចាកចេញពីទីតាំងគម្រោង ដើម្បីអាចឱ្យ ក្រុមហ៊ុន អកស៍ឡី ជេម អនុវត្តសិទ្ធិស្របច្បាប់របស់ខ្លួនក្នុងនាមជាម្ចាស់ និងក្រុមហ៊ុនអភិវឌ្ឍន៍គម្រោង។ នៅក្នុងនីតិវិធីរក្សាការពារនេះ តុលាការបានធ្វើការកោះហៅ និងបានផ្តល់ឱកាសសមរម្យឱ្យក្រុមហ៊ុន SGW ចូលរួមក្នុងនីតិវិធី ដើម្បីធ្វើការតតាំង និងការពារខ្លួនតាមផ្លូវតុលាការ។ យ៉ាងណាមិញ ក្រុមហ៊ុន SGW មិនអើពើចំពោះការកោះហៅរបស់តុលាការឡើយ ដែលនាំឱ្យសាលាដំបូងរាជធានីភ្នំពេញ សម្រេចយល់ស្របតាមការស្នើសុំរបស់ ក្រុមហ៊ុន អកស៍ឡី ជេម។ សាលាដំបូងរាជធានីភ្នំពេញបានចេញដីកាសម្រេចរក្សាការពារ ចុះថ្ងៃទី១៤ ខែកុម្ភៈ ឆ្នាំ២០២០ ដោយបង្គាប់ឱ្យក្រុមហ៊ុន SGW អ្នកម៉ៅការបន្ត និងបុគ្គលិករបស់ពួកគេ ចាកចេញពីទីតាំងគម្រោងជាបន្ទាន់។
នាថ្ងៃទី២៥ ខែកុម្ភៈ ឆ្នាំ២០២០ អាជ្ញាសាលានៃសាលាដំបូងរាជធានីភ្នំពេញ បានចាប់ផ្តើមអនុវត្តដីកាសម្រេចរក្សាការពារ នៅទីតាំងគម្រោង ស្របតាមនីតិវិធីច្បាប់ជាធរមាន ដោយមានជំនួយពីអាជ្ញាធរមានសមត្ថកិច្ច។ នាពេលអនុវត្តនោះ ក្រុមហ៊ុន SGW ប្រកែកមិនព្រមសហការជាមួយអាជ្ញាសាលា និងអាជ្ញាធរឡើយ ហើយថែមទាំងធ្វើការរារាំងការអនុវត្តដីកាតុលាការ ដោយបានប៉ះទង្គិចជាមួយអាជ្ញាធរមានសមត្ថកិច្ច។ ចំពោះសកម្មភាពរបស់ក្រុមហ៊ុន SGW ដែលប្រឆាំងនឹងសេចក្តីសម្រេចរបស់តុលាការ និងការរារាំងអាជ្ញាធរនៅពេលកំពុងអនុវត្តភារកិច្ច មេធាវីរបស់ក្រុមហ៊ុន អកស៍ឡី ជេម បានលើកឡើងថាទង្វើនេះអាចចាត់ទុកជាបទល្មើស ក្រោមច្បាប់នៃព្រះរាជាណាចក្រកម្ពុជា។
ទោះបីជាមានការរារាំងយ៉ាងនេះក្តី ក្រោយមកអាជ្ញាសាលាបានធ្វើការនាំខ្លួនក្រុមការងាររបស់ក្រុមហ៊ុន SGW ចេញពីទីតាំងគម្រោងដោយជោគជ័យ ហើយគិតមកដល់ថ្ងៃនេះ ក្រុមហ៊ុន អកស៍ឡី ជេម អាចកាន់កាប់ និងគ្រប់គ្រងទីតាំងគម្រោងបានវិញយ៉ាងពេញលេញហើយ ដូច្នេះ ក្រុមហ៊ុន CRUCG អាចនឹងចាប់ផ្តើមការងារសាងសង់គម្រោងបន្ត ក្នុងពេលឆាប់ៗខាងមុខនេះ។
នាពេលនេះ ក្រុមហ៊ុន អកស៍ឡី ជេម កំពុងបង្គាប់ឱ្យមេធាវីរបស់ខ្លួនធ្វើការសិក្សាទិដ្ឋភាពតាមផ្លូវច្បាប់ និងរៀបចំឯកសារក្នុងការទាមទារសំណងការខូចខាតពីក្រុមហ៊ុន SGW សម្រាប់រាល់ការខូចខាតដែលខ្លួនទទួលរង ដោយសារការបំពានកាតព្វកិច្ច និងសកម្មភាពបំពានច្បាប់ជាច្រើនរបស់ក្រុមហ៊ុន SGW ៕ ដោយ៖បញ្ញាស័ក្តិ