ស្ត្រីជាម្តាយម្នាក់ត្រូវបានកូនស្រីចិត្តសណ្តានក្រពើ អាយុ ១៧ ឆ្នាំ វាយដំយ៉ាងសាហាវ ដោយសារតែខឹងគាត់មិនរួសរាន់រៀបចំខោអាវឲ្យទាន់ចិត្ត ។ ដែលហេតុការណ៍នេះបានកើតឡើងនៅ Desa Tuatuka ប្រទេសឥណ្ឌូនេស៊ី កាលពីថ្ងៃទី២៦ ខែកុម្ភៈ ឆ្នាំ២០២០ ។
យោងតាមសារព័ត៌មាន Tribun បានឲ្យដឹងថា កូនស្រីឈ្មោះ TH បានឲ្យម្តាយរៀបចំសម្លៀកបំពាក់ឲ្យ ដើម្បីនាងចេញទៅដើរលេងនៅ Kota Kupang ។ នៅពេលនោះ ម្តាយដែលមានឈ្មោះថា AH បានឆ្លើយតបថា កូនស្រីគួរអត់ធ្មត់តិចទៅ ព្រោះពេលនេះ ម្តាយកំពុងជាប់រវល់ចំអិននៅក្នុងផ្ទះបាយ ។
ទោះយ៉ាងណា ក្មេងស្រីទំនើងរូបនេះ ស្តាប់មិនចូលនូវអ្វីដែលម្តាយតបឡើយ និងផ្ទុយទៅវិញ នាងបែរជាស្តីបន្ទោសឲ្យម្តាយខ្លាំងៗ រហូតឈានកើតមានអំពើហិង្សាដ៏សាហាវតែម្តង ។ TH បានយកដៃវាយក្បាល និងយកជើងទាត់ផ្នែកខាងក្រោមដងខ្លួន និងក្បាលរបស់ម្តាយ ប្រៀបដូចសត្វធាតុអ៊ីចឹង ។
សំណាងហើយ ដែលសម្លេងស្រែកយំរបស់ម្តាយ បានលេចឮដល់អ្នកជិតខាង ចេញមកជួយអន្តរាគមន៍ ពុំនោះសោត ស្ត្រីជាម្តាយមិនយ៉ាងណានោះទេ ព្រោះតែមិនអាចតដៃនឹងកូនកំណើតក្រពើបែបនេះ ។
ក្រោយហេតុការណ៍កើតឡើង ប៉ូលីសក្នុងតំបន់បានមកដល់ភ្លាមៗ និងនាំខ្លួនកូនស្រីរូបនេះទៅប៉ុស្តិ៍ ដើម្បីស៊ើបអង្កេតបន្ថែម ដោះស្រាយតាមផ្លូវច្បាប់ ៕
ប្រែសម្រួលដោយ៖ លឹម ហុង (ប្រភព៖ worldofbuzz)
