ព្រៃឡង់៖ អង្គការសមាគមនិងសហគមន៍ សរុបជាង១០០ស្ថាប័ន នៅថ្ងៃទី២៨ខែកុម្ភៈនេះ បានហៅការហាមឃាត់របស់អាជ្ញាធរប្រឆាំងនឹងសកម្មភាពរបស់ក្រុមប្រជាពលរដ្ឋដែលការពារព្រៃឡង់ថា ប៉ះពាល់យ៉ាងខ្លាំងដល់ការអភិរក្សព្រៃនេះ។
ពួកគេបានបញ្ជាក់នៅក្នុងសេចក្តីថ្លែងការណ៍ថា ការប្រើប្រាស់មន្រ្តីឧទ្យានុរក្សប្រដាប់ដោយកាំភ្លើងរបស់ក្រសួងបរិស្ថាន ដើម្បីរារាំងសមាជិកបណ្ដាញសហគមន៍ព្រៃឡង់ ពីការប្រារព្ធពិធីបុណ្យបំបួសដើមឈើប្រចាំឆ្នាំនៅក្នុងព្រៃ គឺជាការរឹតត្បិតមិនសមហេតុផលទៅលើសេរីភាពនៃការដើរហើរនិងបង្អាក់ការខិតខំប្រឹងប្រែងអភិរក្សព្រៃឈើ។
បើយោងតាមលិខិតចំហ អង្គការសមាគមនិងសហគមន៍ សរុបជាង១០០ស្ថាប័ន បានសូមគោរពជូន លោក សាយ សំអាល់ រដ្ឋមន្ត្រីក្រសួងបរិស្ថាន ជាទីគោរពដ៏ខ្ពង់ខ្ពស់ បានបញ្ជាក់ថា យើងខ្ញុំទាំងអស់គ្នាជាសមាជិកបណ្តាញសហគមន៍ព្រៃឡង់បួនខេត្ត ក្រចេះ ស្ទឹងត្រែង ព្រះវិហារ និងកំពង់ធំ ដែលកំពុងធ្វើការងារស្ម័គ្រចិត្តការពារ ព្រៃការពារដែនជម្រកសត្វព្រៃ ព្រៃឡង់ មានការសោកស្តាយ និងខកចិត្តបំផុត ចំពោះវិធានការរបស់ក្រសួងបរិស្ថានដែលបានរារាំង ការចុះល្បាត ការប្រារព្ធពិធីប្រពៃណី ការគំរាមចាប់ខ្លួន និងជាពិសេសការប្រើអំពើហិង្សាលើសមាជិក ដែលចូលរួមប្រារព្ធពិធីបុណ្យព្រៃឡង់ និងបំបួសដើមឈើ។
លិខិតដដែល បានលើកឡើងថា “យើងខ្ញុំទាំងអស់គ្នាសូមគោរពជម្រាបជូនឯកឧត្តមរដ្ឋមន្ត្រីមេត្តាជ្រាបថា យើងខ្ញុំបានរួមចំណែកការពារព្រៃឡង់ យ៉ាងសកម្មរយៈពេលជាង២០ឆ្នាំ ជាមួយកិច្ចខិតខំប្រឹងប្រែងរបស់រាជរដ្ឋាភិបាល ក្នុងបុព្វហេតុការពារធនធានធម្មជាតិ និងការស្តារព្រៃឈើឡើងវិញ តែគួរឱ្យសោកស្តាយ និងខកចិត្តបំផុត ដែលការខិតខំទាំងនេះមិនត្រូវបានលើកទឹកចិត្ត ហើយបែរជាទទួលបាននូវ ការរាំង ការចោទប្រកាន់ លាបពណ៌ គំរាមកំហែង និងការប្រើហិង្សាមកលើសមាជិកបណ្តាញសហគមន៍ព្រៃឡង់យើងខ្ញុំទៅវិញ”។
យើងខ្ញុំសូមស្នើសុំឱ្យ លោករដ្ឋមន្ត្រី ពន្យល់ពីការប្រើអំពើហិង្សាក្រោមការដឹកនាំបញ្ជាដោយ លោក តុប កក្កដា ប្រធានមន្ទីរបរិស្ថានខេត្តកំពង់ធំ លើសមាជិកបណ្តាញសហគមន៍ព្រៃឡង់ នៅថ្ងៃទី២២ កុម្ភៈ ត្រង់ចំណុចវាលស្រែពពេល។ តើយើងខ្ញុំទាំងអស់គ្នា មានទោសកំហុសអ្វីបានជាត្រូវប្រើហិង្សាមកលើសហគមន៍? តើការចូលរួមការពារធនធានធម្មជាតិ ស្របតាមច្បាប់ ស្របតាមការអំពាវនាវរបស់លោករដ្ឋមន្ត្រី និងស្របតាមគោលនយោបាយរបស់រាជរដ្ឋាភិបាល ជាអំពើខុសច្បាប់?
លោករដ្ឋមន្ត្រីជាទីគោរព យើងខ្ញុំសូមជម្រាបហេតុផលជូនលោកជ្រាបថា មូលហេតុដែលយើងខ្ញុំនៅតែបន្តចូលទៅល្បាតការពារព្រៃឈើ ដាំដើមឈើឡើងវិញ និងប្រារព្ធពិធីប្រពៃណីផ្សេងៗ ក្នុងតំបន់ការពារដែនជម្រកសត្វព្រៃ ព្រៃឡង់ ព្រោះ៖
១. យើងខ្ញុំទាំងអស់គ្នារស់នៅ និងអាស្រ័យផល មានជំនឿ វប្បធម៌ ទំនៀមទម្លាប់ ប្រពៃណីជាជនជាតិដើមភាគតិចកួយ ដែលពឹងផ្អែកទៅលើព្រៃឈើទាំងនោះ។
២. ព្រៃការពារដែនជម្រកសត្វព្រៃ ព្រៃឡង់ នៅមិនទាន់មានការកំណត់ និងបែងចែកតំបន់គ្រប់គ្រងនៅឡើយទេ។ ការចោទប្រកាន់ថា យើងខ្ញុំចូលទៅតំបន់ស្នូលខុសនឹងច្បាប់ស្តីពី តំបន់ការពារធម្មជាតិ ជារឿងមិនសមហេតុផលឡើយ និង
៣. បើទោះបីជាមាន ឬមិនទាន់មានការកំណត់ និងបែងចែកតំបន់គ្រប់គ្រងក្តី ហេតុផលសំខាន់បំផុត ដែលបង្ខំឱ្យយើងខ្ញុំត្រូវតែលះបង់ និងប្រឈមនឹងគ្រោះថ្នាក់ក្នុងកិច្ចការពារព្រៃឡង់គឺ ការកាប់រានដីព្រៃយកជាកម្មសិទ្ធិច្រើនរយហិកតា និងការកាប់រំលំដើមជ័រច្បោះ/ឈើធំៗជារៀងរាល់ថ្ងៃនៅគ្រប់ខេត្ត ក្នុងតំបន់ការពារដោយជនអនាធិបតេយ្យ និងក្រុមហ៊ុន ស៊ីង បាយអូថេក ដែលគួរឱ្យព្រួយបារម្ភបំផុត ដែលសកម្មភាពល្មើសទាំងនេះអាចនឹងធ្វើឱ្យព្រៃឡង់បាត់បង់ ប្រសិនបើគ្មានកិច្ចខិតខំប្រឹងប្រែង ពីគ្រប់ភាគីពាក់ព័ន្ធចូលរួមការពារទេនោះ។
យើងខ្ញុំក៏សូមជម្រាបជូនលោករដ្ឋមន្ត្រីផងដែរថា ការចោទប្រកាន់ផ្សេងទៀតដោយអ្នកនាំពាក្យក្រសួងបរិស្ថាន មកលើយើងខ្ញុំដែលជាសហគមន៍មូលដ្ឋាន ដែលកំពុងធ្វើការងារការពារព្រៃឈើ ថាជាសហគមន៍ខុសច្បាប់ គឺជាការគំរាមកំហែងដែលធ្វើឱ្យយើងខ្ញុំមានការព្រួយបារម្ភយ៉ាងខ្លាំង ខណៈដែលច្បាប់នានា ក៏ដូចជាការថ្លែងរបស់សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ និងលោក ប៊ុន ហ៊ុន រដ្ឋលេខាធិការក្រសួងមហាផ្ទៃ បានគូសបញ្ជាក់ថា សហគមន៍មូលដ្ឋាន មិនតម្រូវឱ្យចុះបញ្ជីនៅក្រសួងមហាផ្ទៃ ឬមិនស្ថិតនៅក្រោមច្បាប់ស្តីពី សមាគម និងអង្គការមិនមែនរដ្ឋាភិបាលឡើយ។
យើងខ្ញុំទាំងអស់គ្នាមានជំនឿជាក់ និងក្តីសង្ឃឹមយ៉ាងមុតមាំបំផុតថា លោករដ្ឋមន្ត្រីនឹងពិនិត្យ និងសម្រួលដល់កិច្ចការពារព្រៃឈើក្នុងតំបន់ព្រៃឡង់ ចំពោះបណ្តាញសហគមន៍ព្រៃឡង់ក្នុងការ ល្បាតការពារព្រៃឈើ ដាំដើមឈើឡើងវិញ និងប្រារព្ធពិធីប្រពៃណីផ្សេងៗនៅពេលខាងមុខជាធម្មតាដូចសព្វមួយដង។ អ្វីដែលបានធ្វើឱ្យយើងខ្ញុំមានជំនឿជាក់ និងក្តីសង្ឃឹមយ៉ាងមុតមាំបំផុតនោះ គឺការសម្រេចដាក់បញ្ចូលខេត្តព្រះវិហារ ចូលក្នុងតំបន់ការពារដែនជម្រកសត្វព្រៃ ព្រៃឡង់ កាលពីឆ្នាំ២០១៦ កិច្ចប្រឹងប្រែងជាច្រើនទៀត និងការសម្រួលឱ្យមានកិច្ចសហការនាពេលកន្លងមក បានបង្ហាញពីសុច្ឆន្ទៈ និងការប្តេជ្ញាចិត្តដ៏ត្រឹមត្រូវរបស់លោករដ្ឋមន្ត្រីចំពោះការការពារធនធានធម្មជាតិ ដែលនៅសេសសល់នៅកម្ពុជា។ ប្រសិន បើគ្មានការសម្រេចដ៏ឆ្លាតវៃបែបនេះ ប្រហែលព្រៃឈើនៅតំបន់ព្រៃឡង់ និងតំបន់ឯទៀតអាចត្រូវបាត់បង់ស្ទើរទាំងស្រុងទៅហើយ។
សូមបញ្ជាក់ថា ក្រសួងបរិស្ថានតាមរយៈលោក នេត្រ ភក្ត្រា រដ្ឋលេខាធិការ និង ជាមន្ត្រីនាំពា្យក្រសួងបរិស្ថាន បានអះអាងថា កន្លងទៅ ក្រសួងតែងតែផ្តល់កិច្ចសហការល្អជាមួយបណ្តាញសហគមន៍ព្រៃឡង់ក្នុងការងារចុះល្បាត និងអភិរក្សធនធានធម្មជាតិនៅដែនជម្រកសត្វព្រៃព្រៃឡង់ ប៉ុន្តែបណ្តាញសហគមន៍ព្រៃឡង់បានធ្វើសកម្មភាព ដែលមានភាពមិនស្មោះត្រង់ក្នុងកិច្ចសហការ និងបង្កើតការអុកឡុក ក្រឡុកស្ថានការណ៍ បង្កើតរបាយការណ៍បំភ្លៃសាធារណមតិលើការងារគ្រប់គ្រងនិងអភិរក្សធនធានធម្មជាតិ។
លោក នេត្រ ភក្ត្រាបញ្ជាក់ថា ក្រសួងបរិស្ថានគ្មានផលប្រយោជន៍អ្វីទៅប្រឆាំងនឹងអ្នកស្រឡាញ់និងចូលរួមការពារធនធានធម្មជាតិឡើយ ប៉ុន្តែតម្រូវឲ្យគោរពតាមច្បាប់ជាធរមាន។ ក្រសួងបរិស្ថានបានណែនាំជាច្រើនដងរួចមកហើយឱ្យបណ្តាញសហគមន៍ព្រៃឡង់ចុះបញ្ជីនៅក្រសួងមហាផ្ទៃ ដើម្បីមានភាពស្របច្បាប់ក្នុងការបំពេញការងារ និងបង្កើតកិច្ចសហការដោយស្មោះត្រង់លើការងារគ្រប់គ្រងនិងអភិរក្សធនធានធម្មជាតិ។
មន្ត្រីជាន់ខ្ពស់ក្រសួងបរិស្ថានរូបនេះអះអាងបន្ថែមថា ម្តងហើយម្តងទៀត ក្រោមខ្សែញាក់របស់ម្ចាស់ជំនួយរបស់ខ្លួន ពួកគេនៅតែបន្តធ្វើសកម្មភាពខុសច្បាប់ ដើរចេញពីគន្លងសមូហភាពដឹកនាំគ្រប់គ្រង និងព្យាយាមចិញ្ចឹមទំនាស់លើបញ្ហាព្រៃឡង់ តាមយៈការលួចចូលល្បាតដោយអនាធិបតេយ្យ លួចប្រើប្រាស់ Apps ដែលគ្មានការទទួលស្គាល់ជាផ្លូវការពីអាជ្ញាធរមានសមត្ថកិច្ច បំភ្លៃលើទិន្នន័យនៃបទល្មើសធនធានធម្មជាតិ រាប់គល់ឈើមួយដើមថាជាបទល្មើសមួយដែលគ្មានលក្ខណៈវិទ្យាសាស្ត្រ។
សូមជម្រាបជូនថា កាលពីថ្ងៃទី២២ខែកុម្ភៈ កន្លងទៅ អាជ្ញាធរ និងមន្ត្រីឧទ្យានុរក្សបានរារាំងបណ្តាញសហគមន៍ព្រៃឡង់ ព្រះសង្ឃ សកម្មជនបរិស្ថាន និងយុវជន មិនឱ្យចូលព្រៃទៅកាន់កន្លែងប្រារព្ធពិធីបុណ្យព្រៃឡង់ និងបំបួសព្រៃឈើ ដែលគ្រោងធ្វើឡើង រយៈពេល២ថ្ងៃ គឺនៅថ្ងៃទី២២ ដល់ ២៣ ខែកុម្ភៈ ឆ្នាំ២០២០៕ដោយ៖បញ្ញាស័័ក្តិ
