ខេត្តព្រះសីហនុ៖ ព្រឹកមិញនេះ ប្រជាពលរដ្ឋរស់នៅក្នុងក្រុងព្រះសីហនុ បង្ហាញការភ្ញាក់ផ្អើល ខណៈឃើញជនជាតិចិនម្នាក់ បានដួលស្លាប់ភ្លាមៗ នៅនឹងកន្លែងកើតហេតុ។
ប្រភពបញ្ជាក់ថា ហេតុការណ៍ខាងលើនេះ វានកើតឡើងនៅម៉ោងប្រមាណ ៩ព្រឹកថ្ងៃសុក្រ ទី២៨ ខែកុម្ភៈ ឆ្នាំ២០២០ នៅក្នុងបរិវេណបុរីគជ់អាស៊ី។ ហើយថា មូលហេតុ នៃការប្រកាច់ស្លាប់ របស់ជនរងគ្រោះជនជាតិចិនខាងលើនេះ មិនទាន់មានមន្ត្រីជំនាញពាក់ព័ន្ធស្ថាប័នណាមួយចេញមុខបញ្ជាក់ ជនរងគ្រោះស្លាប់ដោយជំងឺអ្វីនោះទេ។
យ៉ាងណាក៏ដោយចុះ នៅវេលាមុនថ្ងៃត្រង់ថ្ងៃទី២៨ ខែកុម្ភៈ ឆ្នាំ២០២០នេះ សមត្ថកិច្ចចម្រុះ នៃរដ្ឋបាលខេត្តព្រះសីហនុ បានចុះទៅត្រួតពិនិត្យសាកសពបុរសម្នាក់ ដែលសមត្ថកិច្ចសន្និដ្ឋានជាបឋមថា ទំនងជាជនជាតិចិន (ស្លៀកខោជើងវែងពណ៌ខ្មៅ ពាក់អាវយឺតដៃបំពង់ពណ៌ស) បានដេកស្លាប់នៅម្តុំ រង្វង់មូលសួនច្បារបុរីគុជអាស៊ី ស្ថិតក្នុងសង្កាត់លេខ៣ ក្រុង-ខេត្តព្រះសីហនុ បន្ទាប់ពីពលរដ្ឋប្រទះឃើញសាកសពនេះ កាលពីម៉ោងប្រមាណ៩ព្រឹកថ្ងៃសុក្រនេះ។
ភ្លាមៗសមត្ថកិច្ច ក៏នៅមិនទាន់ដឹងពីមូលហេតុ នៃការស្លាប់ និងសាវតារ របស់ជនរងគ្រោះខាងលើនៅឡើយ ទេ ព្រោះកំពុងធ្វើការស្រាវជ្រាវ ត្រួតពិនិត្យ និងធ្វើកោសល្យវិច័យតាមបច្ចេកទេសឲ្យបានត្រឹមត្រូវជាមុនសិន៕ ដោយ៖ ដែន សីមា