ខេត្តព្រះសីហនុ៖ ប្រជាពលរដ្ឋ ជាពិសេសអ្នកបើកបរតាមផ្លូវសាធារណៈពេលយប់ ក្នុងក្រុងព្រះសីហនុ បានសំណូមពរដល់ លោក គួច ចំរើន អភិបាលខេត្តព្រះសីហនុ ឲ្យជួយអន្តរាគមន៍ទៅកម្លាំងសមត្ថកិច្ចចម្រុះ ឲ្យជួយចាត់វិធានវិការទប់ស្កាត់រថយន្តក្រឡុកស៊ីម៉ងត៍ និងរថយន្តដឹកទំនិញធុនធ្ងន់ជាច្រើនគ្រឿង ដែលបំពាក់ភ្លើងហ្វាមុខកោយរថយន្តនាំឲ្យចាំងភ្នែកអ្នកធ្វើដំណើរ ឬអ្នកបើកបរតាមផ្លួវថ្នល់ ចាំងភ្នែកមើលផ្លូវមិនឃើញ។
ចំពោះបញ្ហានេះ កាលពីយប់ថ្ងៃទី២៧ ខែកុម្ភៈ ឆ្នាំ២០២០ មានប្រជាពលរដ្ឋជាអ្នកធ្វើដំណើរតាមផ្លូវក្នុងក្រុងព្រះសីហនុ បានផ្ញើរូបថត ដោយបញ្ជាក់ថា មានរថយន្តក្រឡុកបេតុងមួយចំនួន ដែលបើកបរពេលយប់តាមផ្លូវអូរ៥ និងផ្លូវផ្សេងៗទៀត បានបំពាក់ភ្លើងហ្វាបាញ់មុខក្រោយផង និងបំពាក់ហ្វាសងខាងរថយន្តផង ដែលបង្កការលំបាក ដល់អ្នកបើកបរ ជាពិសេសអ្នកបើកពីក្រោយ។
គួររំលឹកថា ជាបន្តបន្ទាប់មកនេះ កម្លាំងនគរបាលចរាចរណ៍ នៃស្នងការដ្ឋាននគរបាលខេត្តព្រះសីហនុ បានដាក់ប៉ុស្តិ៍ត្រួតពិនិត្យការអនុវត្តច្បាប់ចរាចរណ៍ និងត្រួតពិនិត្យយានយន្តខុសបច្ចេកទេស ដែលបើកបរតាមផ្លូវសាធារណៈទាំងផ្លូវក្នុងក្រុង និងផ្លូវជាតិលេខ៤ជាដើម ដោយបានចាប់ដោះយកអំពូលហ្វា ដែលម្ចាស់រថយន្តទាំងនោះ បំពាក់ខុសបច្ចេកទេស តម្រូវឲ្យដោះចេញ ប៉ុន្តែរហូតមកដល់ពេលនេះ នៅឃើញអ្នកបើកបររថយន្តក្រឡុកស៊ីម៉ងត៍ និងរថយន្តដឹកទំនិញធំៗមួយចំនួននោះ នៅតែបន្តចាប់ដាក់អំពូលភ្លើងហ្វាខុសបច្ចេកទេសបន្តកើតឡើងដដែល ដោយមិនបានចូលរួមសហការជាមួយសមត្ថកិច្ច និងមិនបានអនុវត្តន៍ច្បាប់ចរាចរណ៍ផ្លូវគោកឲ្យបានត្រឹមត្រូវទេ។
ផ្តើមពីបញ្ហានេះ ប្រជាពលរដ្ឋរស់នៅក្នុងក្រុងព្រះសីហនុ ជាពិសេសអ្នកបើកបរ ឬធ្វើដំណើរតាមផ្លូវសាធារណៈ ក្នុងក្រុងព្រះសហនុ រំពឹងថា លោក គួច ចំរើន អភិបាលខេត្តព្រះសីហនុ នឹងជួយអន្តរាគមន៍ទៅកម្លាំងសមត្ថកិច្ចចម្រុះ ជាពិសេសកម្លាំងនគរបាលចរាចរណ៍ ឲ្យជួយមានវិធានការទប់ស្កាត់ទៅលើរថយន្តទាំងឡាយណា ពិសេសរថយន្តក្រឡុកស៊ីម៉ងត៍ ដែលបំពាក់ភ្លើងហ្វាមុខក្រោយខុសបច្ចេកទេសយានយន្ត ឲ្យបានឆាប់ និងមានប្រសិទ្ធភាព៕ ដោយ៖ ដែន សីមា
