ភ្នំពេញ៖ អគ្គលេខាធិការរងគណៈកម្មាធិការវិនិយោគកម្ពុជា បានបញ្ជាក់ថា ខណៈ ដែលប្រទេសចិនទាំងមូលកំពុងតែចាត់វិធានការតឹងរ៉ឹង ប្រយុទ្ធប្រឆាំងនឹងជំងឺផ្លូវដង្ហើមថ្មី Covid-19 កម្ពុជាបានប្តេជ្ញាចិត្ត ក្នុងការរួមសុខរួមទុក្ខ ជាមួយមិត្តចិន នៅគ្រប់កាលៈទេសៈ។
នារសៀលថ្ងៃទី២៨ ខែកុម្ភៈ ឆ្នាំ២០២០ នៅទីស្តីការក្រុមប្រឹក្សាអភិវឌ្ឍន៍កម្ពុជា លោក ជា វុទ្ធី អគ្គលេខាធិការរងគណៈកម្មាធិការវិនិយោគកម្ពុជា បានទទួលជួបពិភាក្សាការងារជាមួយគណៈប្រតិភូចិន ដឹកនាំដោយលោក យ៉ាង វ៉ីឈុន (Yang Weiqun) អគ្គនាយករងនៃអគ្គនាយកដ្ឋានកិច្ចការអាស៊ីនៃក្រសួង ពាណិជ្ជកម្មចិន។
បើតាមសេចក្តីប្រកាស លោក យ៉ាង វ៉ីឈុន បានឱ្យដឹងថា ដំណើរទស្សនកិច្ចរបស់គណៈប្រតិភូមកកម្ពុជានាពេលនេះ គឺដើម្បីជំរុញកិច្ចសហប្រតិបត្តិការរវាងប្រទេសទាំងពីរក្នុងវិស័យពាណិជ្ជកម្មនិងវិនិយោគ ស្របតាមប្រសាសន៍របស់ លោកប្រធានាធិបតីស៊ី ជីនពីង ដែលបានជម្រាបជូន សម្តេចតេជោនាយក នៅក្នុងជំនួប ពិភាក្សាការងារនៅទីក្រុងប៉េកាំង នៅថ្ងៃទី៥ ខែកុម្ភៈ ឆ្នាំ២០២០ កន្លងទៅថា កម្ពុជា និងចិន ជាមិត្តដែកថែប ដែលសហការគ្នាដើម្បីកសាងអនាគតរួមគ្នា។
លោក បានមានប្រសាសន៍ថា ដំណើរទស្សនកិច្ចនាពេលនេះ មានគោលបំណងសំខាន់ដើម្បីឈ្វេងយល់ពីផលប៉ះពាល់ នៃកង្វះខាតការផ្គត់ផ្គង់វត្ថុធាតុដើម សម្រាប់រោងចក្រកាត់ដេរ និងពីការព្យួរផ្នែកមួយនៃការអនុគ្រោះពន្ធក្រោមក្របខ័័ណ្ឌ EBA ដល់រោងចក្រសហគ្រាសក្នុងវិស័យ កាត់ដេរសម្លៀកបំពាក់ និងផលិតស្បែកជើង និងលទ្ធភាពនៃការគាំទ្ររបស់រដ្ឋាភិបាល ចិនដល់កម្ពុជា ក្នុងការកាត់បន្ថយផលប៉ះពាល់ ក៏ដូចជាក្នុងការលើកទឹកចិត្តដល់សហគ្រាសចិនឲ្យមកបណ្តាក់ទុនវិនិយោគ នៅកម្ពុជាបន្ថែម។
លោក ជា វុទ្ធី បានស្វាគមន៍គណៈប្រតិភូដែលបានមកបំពេញទស្សនកិច្ច នៅកម្ពុជានាពេលនេះ ខណៈ ដែលប្រទេសចិនទាំងមូលកំពុងតែចាត់វិធានការតឹងរ៉ឹងប្រយុទ្ធប្រឆាំងនឹងជំងឺផ្លូវដង្ហើមថ្មី Covid-19 និង បានជម្រាបជូនគណៈប្រតិភូអំពីការប្តេជ្ញាចិត្តរបស់កម្ពុជា ក្នុងការរួមសុខរួមទុក្ខជាមួយមិត្តចិន នៅគ្រប់កាលៈទេសៈ ដែលជាក់ស្តែងត្រូវបានសបញ្ជាក់តាមរយៈដំណើរទស្សនកិច្ចរបស់ សម្តេចតេជោនាយករដ្ឋមន្ត្រី ទៅកាន់ទីក្រុងប៉េកាំង នៅថ្ងៃទី៥ ខែកុម្ភៈកន្លងទៅ។ លោក បានជម្រាបជូនគណៈប្រតិភូអំពីការប៉ាន់ស្មាន នូវផលប៉ះពាល់ ជាបន្ទាន់ពីការខ្វះខាតវត្ថុធាតុដើម ដល់វិស័យឧស្សាហកម្មកាត់ដេរ សម្លៀកបំពាក់និងស្បែកជើងដែលមួយចំនួនធំជាការវិនិយោគមកពីសាធារណរដ្ឋប្រជាមានិតចិន និងផលប៉ះពាល់នាពេលអនាគត ដ៏ខ្លីពីការព្យួរផ្នែកមួយ នៃការអនុគ្រោះពន្ធក្រោមក្របខ័័ណ្ឌ EBA ដល់វិស័យនានា។ លោកបានជម្រាបជូនគណៈប្រតិភូនូវវិធានការបន្ទាន់របស់រាជរដ្ឋាភិបាលកម្ពុជា ក្នុងការទប់ស្កាត់នឹងផលប៉ះពាល់ ខាងលើ និងបាននាំនូវសំណើរបស់ សម្តេចតេជោនាយករដ្ឋមន្ត្រី ទៅរដ្ឋាភិបាលចិន មេត្តាជួយសម្រួលដល់ការផ្គត់ផ្គង់វត្ថុធាតុដើម ដល់បណ្តាលរោងចក្រនៅកម្ពុជា ។ លើកទឹកចិត្តដល់អ្នកវិនិយោគចិន ឲ្យបន្តការបណ្តាក់ទុននៅ កម្ពុជា ។ ជំរុញការបើកទីផ្សារចិនដល់ផលិតផលកម្ពុជា និងខិតខំបញ្ចប់ការចរចាកិច្ចព្រមព្រៀងពាណិជ្ជកម្ម សេរីកម្ពុជា ចិន ឲ្យបានឆាប់រហ័ស។
ជាងនេះទៅទៀត ភាគីទាំងពីរ បានឯកភាពគ្នាក្នុងការបន្តកិច្ចសហការ គាំទ្រដល់ប្រតិបត្តិការរបស់សហគ្រាសចិននៅកម្ពុជា និងទាក់ទាញការវិនិយោគចិនមកកម្ពុជា បន្ថែមទៀតក្នុងវិស័យនានា ជាពិសេស ក្នុងការផលិតវត្ថុធាតុដើម បម្រើឲ្យវិស័យកាត់ដេរសម្លៀកបំពាក់និងស្បែកជើង និងក្នុងការត្រៀមលក្ខណៈទទួលយកសហគ្រាសដែលធ្វើការបម្លាស់ទីពីប្រទេសចិន មកកាន់កម្ពុជា៕ដោយ៖កូឡាប