ភ្នំពេញ៖ ស្នងការដ្ឋាននគរបាលរាជធានីភ្នំពេញ បានរាយការណ៍ករណីបង្ក្រាប ការជួញដូរគ្រឿងញៀនដោយខុសច្បាប់ និងឃាត់ខ្លួនបានជនសង្ស័យចំនួន ៣២នាក់ ។
ដោយអនុវត្តតាមបទបញ្ជាជាប្រចាំរបស់លោក ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ នៅថ្ងៃទី២៧ ខែកុម្ភៈ ឆ្នាំ២០២០ វេលាម៉ោង១៩និង០០នាទី ដោយមានការអនុញ្ញាតពីលោក សឿន មុន្នីរ័ត្ន ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានឲ្យមន្ត្រីអនុវត្តច្បាប់នៃការិយាល័យប្រឆាំងគ្រឿងញៀន ចុះអនុវត្តវិធានការបង្ក្រាបជាក់ស្តែង ករណីជួញដូរគ្រឿងញៀនខុសច្បាប់ នៅចំណុចសំណង់មិនរៀបរយ ក្រោយប៉ុស្តិ៍ទួលសង្កែ១ ផ្លូវលំ ភូមិផ្សារតូច សង្កាត់ទួលសង្កែ១ ខណ្ឌប្ញស្សីកែវ រាជធានីភ្នំពេញ នៅពេលកម្លាំងសមត្ថកិច្ចយើងចុះទៅដល់ ឃាត់ខ្លួនជនសង្ស័យ ២នាក់ (ស្រី ០១នាក់) ឈ្មោះ ឡេង សុភួង ភេទប្រុស អាយុ ៣១ឆ្នាំ មុខរបរ មិនពិត ជនជាតិខ្មែរ ឈ្មោះ ឃុន សូវីហ្សា ភេទស្រី អាយុ ២៣ឆ្នាំ មុខរបរ អ៊ុតសក់ ជនជាតិខ្មែរ និងដោយបានការអនុញ្ញាតពីលោក សឿន មុនីរ័ត្ន បានឲ្យកម្លាំងសមត្ថកិច្ចយើងបន្តធ្វើរដ្ឋបាលនៅចំណុចខាងលើ ឃាត់ខ្លួនជនសង្ស័យដែលចូលមកទិញថ្នាំញៀនបានចំនួន ៣០នាក់ទៀត។
វត្ថុតាងដកហូតរួមមាន៖ ក្រាមពណ៌ស ថ្លាសង្ស័យជាគ្រឿងញៀនចំនួន ៣១កញ្ចប់ (តូច ២៦កញ្ចប់តូច និង ៤កញ្ចប់ធំល្មម និង ធំ ១) ជារបស់ឈ្មោះ ឡេង សុភួង។ ក្រាមពណ៌ស ថ្លាសង្ស័យជាគ្រឿងញៀនចំនួន ៣កញ្ចប់តូច ជារបស់ឈ្មោះ ឃុន សូវីហ្សា។ ជញ្ជីងថ្លឹងថ្នាំ ១ ។ ឧបករណ៍ជក់ ចំនួន ១។ ដែកកេសចំនួន ចំនួន ៥។
បច្ចុប្បន្នជនសង្ស័យ កំពុងឃាត់ខ្លួននៅការិយាល័យ ប្រឆាំងគ្រឿងញៀនដើម្បីធ្វើការសាកសួរបន្ដតាមនីតិវិធី៕ដោយ៖បញ្ញាស័ក្តិ