មិនត្រឹមតែមនុស្សទេដែលរងផលប៉ះពាល់ពីការឆ្លងវីរុស Covid-19 តែសត្វស្វានៅភាគខាងត្បូងខេត្ត Songkhla (ថៃ) ដែលភាគច្រើនពឹងផ្អែកលើម្ហូបអាហារពីភ្ញៀវទេសចរ កំពុងប្រឈមនឹងកង្វះខាត។ អ្នកទេសចរមកពីប្រទេសសឹង្ហបុរី និងម៉ាឡេស៊ី ដែលនិយមមកកាន់ Songkhla កំពុងលុបចោលដំណើរទេសចរណ៍របស់ពួកគេ ចំពេលមានការព្រួយបារម្ភអំពីការផ្ទុះឡើងវីរុសនេះ ដែលបណ្តាលឱ្យសត្វស្វានៅទីនោះមិនសូវមានចំណីអាហាររាល់ថ្ងៃ។
អ្នកលក់ផ្លែឈើក្នុងស្រុកដែលអាណិតអាសូរសត្វស្រេកឃ្លានទាំងនេះ បានចាប់ផ្តើមផ្តល់ឱ្យពួកគេនូវផ្លែឪឡឹក និងប៉េងប៉ោះ។ ភ្ញៀវទេសចរថៃមានទំនោរផ្តល់ពោតដល់ពួកវា។
សុខភាពជាប្រធានបទរសើប ជាពិសេសនៅពេលដែលយើងប្រឈមមុខនឹងការរីករាលដាលនៃជំងឺមរណៈ ដែលមានឥទ្ធិពលផ្លូវចិត្តលើសក្តានុពលទេសចរណ៍។
យោងតាមគេហទំព័រ Asia One អ្នកស្រុកបានស្នើសុំសាលាក្រុង Songkhla ដើម្បីថែរក្សាសត្វស្វា ព្រោះវាជាផ្នែកទាក់ទាញទេសចរណ៍ដ៏មានប្រជាប្រិយបំផុតមួយដែលបង្កើតប្រាក់ចំណូលសម្រាប់ខេត្ត។
អាជីវកម្មទេសចរណ៍ថៃកំពុងទទួលរងការវាយលុកពីផលប៉ះពាល់នៃវីរុស Covid-19 ។ អាជ្ញាធរទេសចរណ៍ថៃ (TAT) កាលពីម្សិលមិញ បានកាត់បន្ថយការប៉ាន់ស្មានរបស់ខ្លួនសម្រាប់ភ្ញៀវអន្តរជាតិឆ្នាំ ២០២០ នាក់ មកនៅត្រឹម ៣៣ លាននាក់ ធ្លាក់ចុះ ៣ លាននាក់ ពីគោលដៅចុងក្រោយ ៣៦ លាននាក់ និង ៦-៧ លាន តិចជាងឆ្នាំ ២០១៩ ដែលមានចំនួន ៣៩,៨ លាននាក់។
វិស័យទេសចរណ៍ក្នុងស្រុកបានធ្លាក់ចុះ ខណៈដែលម្ចាស់សណ្ឋាគារជួបប្រទះនឹងតម្រូវការខ្សោយ ដែលភាគច្រើនមកពីការប្រជុំ និងសិក្ខាសាលា ដែលត្រូវបានលុបចោលដោយសារការភ័យខ្លាចនៃវីរុសកើនឡើង៕
ប្រែសម្រួលដោយ៖ លឹម ហុង (ប្រភព៖ thethaiger)