ខេត្តមណ្ឌលគិរី៖ ប្រធានមន្ទីរបរិស្ថានខេត្តមណ្ឌលគិរី បានឲ្យដឹងកាលពីល្ងាចថ្ងៃទី២៨ ខែកុម្ភៈថា ក្នុងរយៈពេល២ខែដើមឆ្នាំ២០២០នេះ មន្ទីរបរិស្ថានខេត្តនេះ ចុះបង្ក្រាបបទល្មើសកាប់ទន្ទ្រានយដីព្រៃខុសច្បាប់ ការបរបាញ់សត្វ និងដាក់អន្ទាក់សត្វ បានជាង៣០ករណី។
លោក កែវ សុភក៌ ប្រធានមន្ទីរបរិស្ថានខេត្តមណ្ឌលគិរី បានឱ្យដឹងថា ដើមឆ្នាំ២០២០នេះ មន្ត្រីជំនាញធ្វើការបង្ក្រាបបទល្មើសកាប់រានដីព្រៃ និងការដាក់អន្ទាក់ចាប់សត្វព្រៃចំនួន៣១ករណី។
ក្នុងនោះមន្ត្រីជំនាញបានបញ្ជូនខ្លួនអ្នកពាក់ព័ន្ធទៅសាលាដំបូងខេត្តមណ្ឌលគិរី ដើម្បីចាត់ការបន្តតាមនីតិវិធីចំនួន៣៨នាក់ ក្នុងនោះក៏មានជនជាតិវៀតណាមម្នាក់ផងដែរ។
លោកលោក កែវ សុភក៌ បន្តថា បច្ចុប្បន្នមន្រ្តីជំនាញបរិស្ថានខេត្តមណ្ឌលគិរី មានការប្រឈមច្រើន ដោយសារតែមន្ត្រីឧទ្យានុរក្សនៅមានចំនួនតិចតួចនៅឡើយ រីឯផ្ទៃដីក្នុងតំបន់អភិរក្សមានទំហំធំល្វឹងល្វើយ។ ពេលបច្ចុប្បន្ននេះ ខេត្តមណ្ឌលគិរី មានផ្ទៃដីព្រៃអភិរក្សមានរហូតដល់ជាង១លានហិកតា៕ ដោយ៖ ដែន សីមា