ភ្នំពេញ៖ នៅវេលាម៉ោង ២:០០ នាទី រសៀលថ្ងៃទី ២៩ ខែ កុម្ភៈ ឆ្នាំ ២០២០ សមត្ថកិច្ចនគរបាលនាយកដ្ឋានព្រហ្មទណ្ឌ ក្រសួងមហាផ្ទៃ បានបញ្ជូនជនសង្ស័យ៣នាក់ ពាក់ព័ន្ធនឹងការលួចលក់ដីលោក ភឺន ផល្លា ទំហំជាង ២ហិកតា មកអយ្យការអមសាលាដំបូងរាជធានីភ្នំពេញ ដើម្បីចាត់ការបន្តតាមច្បាប់ ។
ប្រភពពីមន្ត្រីនគរបាល នាយកដ្ឋានព្រហ្មទណ្ឌ ក្រសួងមហាផ្ទៃ បានឲ្យដឹងថា ជនសង្ស័យចំនួន ៣ នាក់ ដែលពាក់ព័ន្ធនឹងការឃុបឃិតគ្នាយកដីលោក ភឺន ផល្លា ទំហំជាង ២ ហិកតា លក់នៅ ភូមិ សំរោងខាងត្បូង សង្កាត់សំរោង ខណ្ឌព្រែកព្នៅ រាជធានី ភ្នំពេញ ត្រូវបានសមត្ថកិច្ច នគរបាល នាយកដ្ឋានព្រហ្មទណ្ឌ ក្រសួងមហាផ្ទៃ ឃាត់ខ្លួនបានជាបន្តបន្ទាប់នៅថ្ងៃទី ២៧ ខែ កុម្ភៈ ឆ្នាំ ២០២០ ។
បើតាមប្រភពដដែលបានបញ្ជាក់ថា ជនសង្ស័យទាំង ៣ នាក់ បានយកដីលោក ភឺន ផល្លា លក់ទៅឲ្យឈ្មោះ យស ម៉ារីណា គឺធ្វើតាមបញ្ជារបស់លោកអនុរដ្ឋលេខាធិការ ក្រសួងមហាផ្ទៃ មួយរូប ។
លោក ភឺន ផល្លា ជាម្ចាស់ដីបានសំណូមពរឲ្យតុលាការចាត់ជនពាក់ព័ន្ធទាំងអស់តាមផ្លូវច្បាប់ និងសុំយកដីជាកម្មសិទ្ធិរបស់លោកទំហំជាង ២ហិកតាត្រឡប់មកវិញ ។
លោកផែង វណ្ណៈ បានថ្លែងថា “ក្នុងរឿងនេះមានលោកជំទាវតំណាងរាស្ត្រម្នាក់នៅពីក្រោយខ្នងអ្នកទិញ ។ ទោះបីដឹងថាខ្លួនទិញដីពីចោរហើយក៏ដោយក៏មិនព្រមប្រគល់ដីឲ្យម្ចាស់គេវិញដែរ ថែមទាំងទៅធ្វើរបងព័ទ្ធយកថែមទៀតផង ។ អនុរដ្ឋលេខាធិការក្រសួងមហាផ្ទៃ នៅពីក្រោយខ្នងចោរលក់ដី ។ លោកជំទាវតំណាងរាស្ត្រម្នាក់ នៅពីក្រោយខ្នងអ្នកទិញដីចោរ “។
គួរបញ្ជាក់ថា បន្ទាប់ពីបែកធ្លាយរឿងចោរលួចលក់ដីទំហំជាង ២ ហិកតា របស់លោក ភឺន ផល្លា អាជ្ញាធរភូមិ សង្កាត់ បានប្រកាសលប់ចោល លិខិតផ្ទេរសិទ្ធិ ដែលពួកចោរលួចលក់ឲ្យទៅឈ្មោះ យស ម៉ារីណា វិញហើយ ។
លោកបន្តថា“ពេលនេះចោរលក់ដីក៏ចាប់បាន អ្នកនៅពីក្រោយខ្នងចោរ ក៏ស្គាល់អ្នកទិញដីពីចោរ ក៏ស្គាល់អ្នកនៅពីក្រោយខ្នងអ្នកទិញដីពីចោរក៏ដឹង តើច្បាប់នឹងចាត់ការអ្នកពាក់ព័ន្ធបែបណា ?”
លោកបញ្ជាក់ថា “៣បុរសម្នាក់បានលួចលក់ដីគេមួយកន្លែងនៅសង្កាត់សំរោង ខណ្ឌព្រែកព្នៅ បានតម្លៃ ១៥០០០០ ដុល្លារ ។ ពេលសមត្ថកិច្ចចាប់ខ្លួនបានលោកចោរបានសារភាពថា លុយលក់ដី ១៥០០០០ ដុល្លារ នោះ លោកចោរឲ្យទៅអ្នកច្បាប់អស់ ៧០០០០ ដុល្លារ ឲ្យទៅអ្នករត់ការឯកសារអស់ ៤០០០០ ដុល្លារ ចំណែកខ្លួនជាចោរទទួលបានតែ ៣០០០០ ដុល្លារ ប៉ុណ្ណោះ ១ម៉ឺនដុល្លារទៀតចែកបងប្អូន ។ ពេលស្ដាប់លោកចោរសារភាពចប់ខ្ញុំពិតជាអាណិតលោកចោរខ្លោចចិត្ត “។
យោងតាមកំណត់ហេតុរបស់សមត្ថកិច្ចនគរបាលព្រហ្មទណ្ឌកម្រិតស្រាល បានបញ្ជាក់ថា កាលពីឆ្នាំ២០១៨ ឈ្មោះ ឡុង ដារ៉ា បានលក់ដីទំហំ ២២៩០០ម៉ែត្រការ៉េ (22900m2) ទៅឱ្យឈ្មោះ ប៉ូច ថេន ក្នុងតម្លៃទឹកប្រាក់ (១៥ម៉ឺនដុល្លារអាមេរិក) ហើយបានចែកលុយនោះឲ្យទៅមេធាវី អស់ចំនួន៧ម៉ឺនដុល្លារ ចែកទៅឲ្យ លោក យិន អ៊ឹម ចៅសង្កាត់សំរោង បួនម៉ឺនដុល្លារអាមេរិក ជាថ្លៃធ្វើឯកសារលក់ដីខាងលើ ហើយនិងចែកបងប្អូនចំពោះខ្លួន គឺ ឡុង ដារ៉ា បានសារភាពថា នៅសល់ប្រាក់៣០០០០ដុល្លារអាមេរិកប៉ុណ្ណោះ។
ជនសង្ស័យ ឡុង ដារ៉ា បានបញ្ជាក់ប្រាប់សមត្ថកិច្ចទៀតថា ដីនេះឈ្មោះ ប៉ូច ថេន ជាអ្នកឈរឈ្មោះទិញទៅឱ្យឈ្មោះ ស ថាវី ហើយចំពោះប្រាក់ចំនួន ១៥ម៉ឺនដុល្លារនោះ ឈ្មោះ ឡុង ដារ៉ា បានទទួលពីឈ្មោះ ស ថាវី អ្នកស្រី ឡោក ខេង តាមរយៈមូលប្បទានបត្ររបស់ធនាគារកាណាឌីយ៉ា។
ឈ្មោះ ឡុង ដារ៉ា បានសារភាពប្រាប់សមត្ថកិច្ចថា ចំពោះដីស្រែដែលខ្លួនបានលក់នោះដែរ គឺជាដីស្រែរបស់ លោក ភឺន ផល្លា ដោយមានលោក ស ថាវី ជាអ្នកបញ្ជាឲ្យខ្លួនជាអ្នកលក់ទៅឲ្យឈ្នោះ ប៉ូច ថេន ហើយរាល់ឯកសារទាំងអស់ ពាក់ព័ន្ធនឹងការទិញលក់ដីនេះ គឺឈ្មោះ អ៊ុំ ភក្តី ជាអ្នករៀបចំឡើង។
បច្ចុប្បន្នក្រុមជនសង្ស័យ ដែលត្រូវឃាត់ខ្លួនទាំងបីនាក់មានទាំងមេខ្លោងឈ្មោះ ឡុង ដារ៉ា ផងកំពុងស្ថិតក្នុងចំណាត់ការ បើកការស៊ើបសួររបស់តំណាងអយ្យការអមសាលាដំបូងរាជធានីភ្នំពេញ តាមនីតិវិធី៕ដោយ៖កូឡាប
