ព្រះវិហារ ៖ អគ្គស្នងការដ្ឋាននគរបាលជាតិ បានឲ្យដឹងថា បុរសម្នាក់បានរងរបួសដាច់ជើងខាងឆ្វេង ពាក់កណ្តាលស្មង ពេលគាត់កំពុងបញ្ឆេះម៉ាស៊ីនបញ្ចូលខ្យល់ ធ្វើឲ្យខ្យល់ចូលក្នុងធុងហួសកម្រិត បណ្តាលឲ្យផ្ទុះខ្ទាតអំបែងត្រូវចំជើងរបស់គាត់តែម្តង ។
ហេតុការណ៍ដ៏រន្ធត់នេះកើតឡើងកាលពីថ្ងៃទី២៧ ខែកុម្ភៈ ឆ្នាំ២០២០ វេលាម៉ោង៧និង៣៥នាទី នៅភូមិពោធិទាប ឃុំម្លូព្រៃមួយ ស្រុកឆែប ខេត្តព្រះវិហារ ។
លោកវរសេនីយ៍ឯក ឈួរ ម៉ាឌី អធិការនគរបាលស្រុកឆែប បានឲ្យដឹងថា ជនរងគ្រោះឈ្មោះ ទុយ ធារ៉ា ភេទប្រុស អាយុ៣៦ ឆ្នាំ ជនជាតិខ្មែរ ទីលំនៅបច្ចុប្បន្ន ភូមិពោធិ៍ទាប ឃុំម្លូព្រៃមួយស្រុកឆែប ខេត្តព្រះវិហារ (របួសធ្ងន់ដាច់ជើងខាងឆ្វេង ក្រោមជង្គង់) មូលហេតុ បញ្ចូលខ្យល់ខ្លាំងហួលកំណត់ ។ បន្ទាប់ពីកើតហេតុភ្លាម បានហៅឡានឈ្នួលដឹកបញ្ជូនទៅសង្គ្រោះនៅមន្ទីរពេទ្យបង្អែក ១៦មករា ៕ដោយ៖បញ្ញាស័ក្តិ