ភ្នំពេញ : បុរសម្នាក់ជាអ្នកបើកបររថយន្តម៊ែរសឺដេស បានខឹងបុរសម្នាក់ស្រវឹងបើករថយន្តម៉ាកកូរ៉ូឡា បុករថយន្តថៅកែខ្លួនបណ្ដាលឲ្យខូចខាត និងមិនព្រមឈប់កន្លែងកើតហេតុ ក៏ដេញតាមទាន់ដកកាំភ្លើងបាញ់កង់រថយន្តបង្ក ផ្ទុះកង់និងភ្ញាក់ផ្អើល ដល់កម្លាំងនគរបាលចុះឃាត់ភ្លាមៗ ហេតុការណ៍នេះ បង្កការភ្ញាក់ផ្អើលម៉ោង៨យប់ ថ្ងៃទី២៩ ខែកុម្ភ: ឆ្នាំ ២០២០ នៅក្នុងបរិវេនកោះពេជ្រ សង្កាត់ទន្លេបាសាក់ ខណ្ឌចំការមន ។
បុរសអ្នកបើកបររថយន្តម៊ែរសឺដេស ពណ៌ស ពាក់ផ្លាកលេខភ្នំពេញ ២AY-០០០៩ ឈ្មោះ ឡុង ឡងឌី អាយុ ៣៥ឆ្នាំ មុខរបរយោធា ឋានៈអនុសេនីយ៍ទោ ជាជំនួយការការិយាល័យបុគ្គលិក អង្គភាពសេនាធិការដ្ឋានកងអន្តរាគមន៍ អ.ប.ក ស្នាក់នៅភូមិម័ល សង្កាត់ ដង្កោ ខណ្ឌដង្កោ បានដកកាំភ្លើងម៉ាកឡុកបាញ់កង់រថយន្តកូរ៉ូឡា ពណ៌ស្ករ ពាក់ផ្លាកលេខភ្នំពេញ ២AS-៦៤២១ ហើយត្រូវនគរបាលឃាត់ខ្លួន និងបញ្ជូលទៅកម្លាំងកងរាជអាវុធហត្ថរាជធានីភ្នំពេញ ។
នគរបាលផ្នែកវាស់វែងបានឲ្យដឹងថា ករណីគ្រោះថ្នាក់ចរាចរណ៍រវាងរថយន្តម៉ាកកូរ៉ូឡា បើកបរបុរសម្នាក់ស្រវឹងជោក បើកស្របទិសគ្នាជាមួយនឹងរថយន្តម៊ែរសឺដេស បើកបរបុរសម្នាក់ បុកគូថរថយន្តម៊ែរសឺដេស បណ្ដាលខូចខាតផ្នែកខាងក្រោយឆ្វេង ហើយមិនដឹងមូលហេតុអ្វី បានជាបុរសបើកបររថយន្តម៊ែរសឺដេស ដកកាំភ្លើងខ្លីបាញ់បំបែកកង់ តែភ្លាមៗកម្លាំងនគរបាលបានឃាត់បុរសយោធា ដកអាវុធបាញ់ ចំណែករថយន្តទាំង២គ្រឿង ធ្វើការវាស់វែងយករក្សាទុក នៅអធិការដ្ឋានខណ្ឌចំការមន តែបុរសដកកាំភ្លើង ដោយជាយោធា ក៏ប្រគល់ឲ្យខាងកម្លាំងកងរាជអាវុធក្រុងភ្នំពេញ ដើម្បីចាត់ការតាមផ្លូវច្បាប់ ព្រោះផ្ទុះអាវុធតាមផ្លូវសាធារណៈ ៕ដោយ៖បញ្ញាស័ក្តិ
