ខេត្តព្រះសីហនុ៖ អគ្គស្នងការនគរបាលជាតិ នៅថ្ងៃទី១ខែមីនាឆ្នាំ២០២០ បានឲ្យដឹងថា នគរបាលការពារព្រំដែនទឹក ចាប់ឃាត់នាវាបរទេស ចំនួន ១គ្រឿង ដែលបានលួចចូលខុសច្បាប់ក្នុងដែនសមុទ្រកម្ពុជា នៅចំណុចនិយាមការ(N10°05.1300′-E103°07.8593′) នៅចន្លោះកោះតាង និងកោះប៉ូឡូវៃ។
ដោយយោងតាមបទបញ្ជារបស់លោកនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងក្រោមការដឹកនាំបញ្ជាផ្ទាល់ពី លោក ឧត្តមសេនីយ៍ឯក តេង សួន អគ្គស្នងការរងនគរបាលជាតិ និងលោក ឧត្តមសេនីយ៍ឯក ទូច ពលៈ ប្រធាននាយកដ្ឋាននគរបាលការពារព្រំដែនទឹក បានចាត់កម្លាំងអង្គភាពបង្ក្រាបបទល្មើសលើផ្ទៃសមុទ្រ សរុបចំនួន ២៧នាក់ ប្រើប្រាស់មធ្យោបាយល្បាត ចំនួន ៣គ្រឿង (នាវាកម្លាំង១៦០០សេះ ចំនួន ១គ្រឿង, អូប័រកម្លាំង៧០០សេះ ចំនួន១គ្រឿង និងអូប័រកម្លាំង៥០០សេះ ចំនួន ១គ្រឿង) ចេញស្វែងរក និងចាប់ឃាត់នាវាបរទេស ចំនួន ១គ្រឿង ដែលបានលួចចូលខុសច្បាប់ក្នុងដែនសមុទ្រ នៃព្រះរាជាណាចក្រកម្ពុជា នៅចំណុចនិយាមការ(N10°05.1300′-E103°07.8593′) នៅចន្លោះកោះតាង និងកោះប៉ូឡូវៃ កាលពីថ្ងៃទី២៦ ខែកុម្ភៈ ឆ្នាំ២០២០ វេលាម៉ោង២៣និង៤៥នាទី ។
សូមបញ្ជាក់ផងដែរ នាវានេះមានឈ្មោះ MT-COURAGEOUS សញ្ជាតិ CAMEROON មាននាវឹក ចំនួន ១៦នាក់ បានចេញដំណើរពីកំពង់ផែ KAO HSIUNG នៃកោះតៃវ៉ាន់ កាលពីថ្ងៃទី១២ ខែកុម្ភៈឆ្នាំ២០២០ និងបានបោះយុថ្កានៅចំណុចនិយាមការ N10°05.1300′-E103°07.8593′ ដើម្បីរងចាំបញ្ជាថ្មីពីថៅកែ ។
ចំពោះករណីនាវាខាងលើនេះ គឺបានបំពានទៅនឹងសេចក្តីសម្រេចរបស់ ក្រុមប្រឹក្សាសន្តិសុខអង្គការសហប្រជាជាតិ (សេចក្តីសម្រេចលេខ២៣៧៥ និង២៣៨៧ អនុម័តនាខែកញ្ញា ឆ្នាំ២០១៧) ក្នុងការដាក់ទណ្ឌកម្មលើសាធារណៈរដ្ឋប្រជាមានិតប្រជាធិបតេយ្យកូរ៉េ (DPRK) ដែលហាមឃាត់ការផ្ទេរពីនាវាទៅនាវា(SHIP-TO-SHIP / STS) ទៅទូកដឹកទំនិញរបស់សាធារណៈរដ្ឋប្រជាមានិតប្រជាធិបតេយ្យកូរ៉េ ។
បច្ចុប្បន្ន នាវាMT-COURAGEOUS ត្រូវបានសមត្ថកិច្ចនគរបាលការពារព្រំដែនទឹក ឃាត់ និងបញ្ជូនទៅព្រះរាជអាជ្ញាអមតុលាការខេត្តព្រះសីហនុ ដើម្បីបន្តនីតិវិធី និងចាត់ការតាមច្បាប់ ៕ដោយ៖បញ្ញាស័ក្តិ