កំពង់ចាម៖ ស្នងការដ្ឋាននគរបាលខេត្តកំពង់ចាម បានឲ្យដឹងថា លោកឧត្តមសេនីយ៍ស្នងការសូមអំពាវនាវ ដល់បងប្អូនប្រជាពលរដ្ឋឱ្យមានការប្រុងប្រយ័ត្នខ្ពស់ ព្រោះរដូវនេះជារដូវប្រាំង ពុំមានភ្លៀងធ្លាក់ជាយូរខែមកហើយ ធ្វើឱ្យងាយបង្កគ្រោះអគ្គិភ័យឆាបឆេះ។
សូមបញ្ជាក់ថា កាលពីថ្ងៃទី១ ខែមីនា ឆ្នាំ២០២០ រយៈពេលមួយព្រឹក គ្រោះអគ្គិភ័យបង្កការឆាបឆេះ ចំនួន២កន្លែងផ្សេងគ្នាស្ថិតក្នុងភូមិសាស្ត្រខេត្តកំពង់ចាម ។
១-ឆេះផ្ទះរបស់ប្រជាពលរដ្ឋមួយកន្លែង នៅភូមិដីឡូតិ៍ ឃុំត្រពាំងព្រះ ស្រុកព្រៃឈរ ដែលជាកម្មសិទ្ធរបស់ឈ្មោះ ស្រ៊ាន់ ថាត ភេទប្រុសអាយុ៥៥ឆ្នាំ ប្រពន្ធឈ្មោះ ញឹម សុផល អាយុ៥៩ឆ្នាំ ទំហំខូចខាត គឺផ្ទះសង់អំពីឈើប្រក់ក្បឿងជញ្ជាំងក្តារផ្នែកខាងក្រោមថ្មទំហំ៧,៥០ម៉ែត្រ គុណ ៩,៥០ម៉ែត្រ ស្មើនឹង២ខ្នង ។ ម៉ូតូ២គ្រឿង ខ្សែកផ្លាកទីនទង្ងន់៥ជី លុយ ២៥០០០០០រៀលនិងសម្ភារៈមួយចំនួនទៀត ។ ប្រតិបត្តិការនេះ ដោយត្រូវប្រើប្រាស់រថយន្តអគ្គិភ័យចំនួន៦គ្រឿងក្នុងនោះ រថយន្តខេត្ត ៣គ្រឿងរថយន្តស្រុកកំពង់សៀម ១គ្រឿង រថយន្តស្រុកព្រៃឈរ២គ្រឿង និងប្រើប្រាស់ទឹកអស់៦ស៊ីទែន។
នគរបាលបញ្ជាក់ពីមូលហេតុថា ដោយសារម្ចាស់ផ្ទះដុតភ្លើងធូបជំនាងផ្ទះតែមិនបណ្តាលឲ្យឆាបឆេះរាលដាលដល់ផ្ទះប្រជាពលរដ្ឋផ្សេងទៀតឡើយ។
ចំំណែកករណីទី២ ឆេះផ្ទះប្រជាពលរដ្ឋមួយកន្លែងទៀត ស្ថិតនៅភូមិតាប៉ាង៣ ឃុំតាប្រុក ស្រុកចំការលើ ម្ចាស់ឈ្មោះ ង៉េន ស្រីអាយុ៥១ឆ្នាំ (ម្ចាស់មិននៅផ្ទះ)។ ដោយទំហំការខូចខាត ផ្ទះសង់អំពីឈើ ប្រក់ស័ង្កសី ជញ្ជាំងស័ង្កសី រនាបឈើ ទំហំ៥ម៉ែត្រ គុណ៧ម៉ែត្រ ព្រមទាំងសម្ភារៈប្រើប្រាស់ ឯកសារមួយចំនួន ។ ដោយប្រើប្រាស់រថយន្តពន្លត់អគ្គិភ័យ ១គ្រឿង ប្រើប្រាស់អស់ទឹក ១ស៊ីទែន។មូលហេតុ បណ្ដាលមក ឆ្លងចរន្តអគ្គិសនី។
ក្នុងករណីអគ្គិភ័យ ឆាបឆេះផ្ទះប្រជាពលរដ្ឋនេះដែរ លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាមបានចាត់បញ្ចាឱ្យកម្លាំងជំនាញរបស់ស្នងការដ្ឋាន សហការជាមួយកម្លាំងអធិការដ្ឋានស្រុក ដោយមានការចូលរួមអន្តរាគមន៍ជួយពន្លត់អគ្គិភ័យពីប្រជាការពារ និងប្រជាពលរដ្ឋផងដែរ៕ដោយ៖កូឡាប
