ថ្មីៗនេះ គណនីហ្វេសប៊ុក ឧត្តមសេនីយ៍ ទី ចំរើនកុសល បានបង្ហោះនូវវីដេអូមួយបង្ហាញឲ្យឃើញប៉ូលីសចរាចរណ៍ម្នាក់ បានស្ទុះចាប់ម៉ូតូពូម្នាក់ ទាំងដែលគាត់ពាក់មួក និងម៉ូតូមានកញ្ចក់ ស្លាកលេខត្រឹមត្រូវ ប៉ុន្តែ ប្រហែលជាម៉ូតូគាត់ភ្លេចបិទភ្លើងម៉ូតូពេលថ្ងៃ? ហើយខណៈពេលនោះ គាត់ប្រញាប់ទាញលុយពីហោប៉ៅហុចឲ្យមន្ត្រីរូបនោះយ៉ាងលឿន ។
ទោះយ៉ាងណា ទាក់ទងនឹងការករណី ម្ចាស់គណនីខាងលើបានចែករំលែកឲ្យបងប្អូនប្រជាពលរដ្ឋបានដឹងច្បាស់ពីកំរិតតួនាទីបុគ្គលមន្ត្រីរូបនោះ យ៉ាងដូច្នេះថា៖ «ជាចំណេះដឹង !
គាត់មិនមែនជានគរបាលចរាចរណ៍ទេ ទោះបីឯកសណ្ឋានគាត់ស្រដៀងគ្នាក៏ដោយ គាត់គ្រាន់តែជាមន្ត្រីជាប់កិច្ចសន្យារបស់សាលារាជធានីភ្នំពេញប៉ុណ្ណោះ។ ចំណុចកត់សំគាល់គឺគ្មានពាក់សក្តិលើស្មារ និងគ្មានរូបសញ្ញាថានគរបាលនៅលើឯកសណ្ឋានគាត់ឡើយ។ ចុះបើគាត់មិនមែនជានគរបាលចរាចរណ៍ផង ហេតុអីគាត់ចេញមកឃាត់ប្រជាពលរដ្ឋដែលល្មើសច្បាប់ចរាចរណ៍ ហើយពេលខ្លះគាត់យកប្រាក់ពីប្រជាពលរដ្ឋបែបនេះ? គឺបុគ្គលរូបនេះបានបំពានតួនាទី និងភារកិច្ចរបស់ខ្លួន នេះជាកំហុសធ្ងន់ធ្ងរ។ ចុះគាត់មានតួនាទីភារកិច្ចអីដែរនៅលើដងផ្លូវសាធារណៈ ? គឺចាំសហការជាមួយមន្ត្រីនគរបាលចរាចរណ៍តាមគោលដៅនិមួយៗដើម្បីជួយសម្រួលពេលកកស្ទះចរាចរណ៍ ជួយបិទចរាចរណ៍បណ្តោះអាសន្ននៅពេលមានក្បួនគណៈប្រតិភូ រថយន្តពន្លត់អគ្គិសភ័យពេលចេញសង្គ្រោះ និងរថយន្តពេទ្យសង្គ្រោះ ។
ដូចនេះចូរប្រជាពលរដ្ឋមេត្តាជ្រាប និងចូលរួមគោរពច្បាប់ទាំងអស់គ្នា ។ សូមអ្នកចូលខមិនមានសុជីវធម៍ថ្លៃថ្នូរ ដើម្បីស្ថាបនា និងមានការទទួលខុសត្រូវ ព្រោះនេះជាការចែករំលែកចំណេះដឹងតែប៉ុណ្ណោះ។ អរគុណ» ៕ ដោយ៖ លឹម ហុង