បាត់ដំបង ៖ លោក ថោង ខុន រដ្ឋមន្ត្រីក្រសួងទេសចរណ៍ និងលោក ងួន រតនៈ អភិបាលនៃគណៈអភិបាលខេត្តបាត់ដំបង បានដឹកនាំកិច្ចប្រជុំត្រួតពិនិត្យចុងក្រោយអំពីការងារត្រៀមរៀបចំបុណ្យទន្លេលើកទី៦ ឆ្នាំ២០២០ នៅខេត្តបាត់ដំបង នាព្រឹកថ្ងៃទី ២ ខែមីនា ឆ្នាំ២០២០ នៅសាលាខេត្តបាត់ដំបង។
ពិធីបុណ្យទន្លេលើកទី៦នេះ នឹងមានរយៈពេល ៣ថ្ងៃ ចាប់ពីថ្ងៃទី ១៣ ១៤ ១៥ ខែមីនា ឆ្នាំ២០២០ ដែលក្នុងនោះ នឹងមានរៀបចំជាព្រឹត្តិការណ៍មុនពិធី (Pre Event) និងសកម្មភាពជាច្រើន រួមមាន ពិធីដាំដើមឈើ សិក្ខាសាលាស្តីពីការពង្រឹងគុណភាពសេវាកម្មទេសចរណ៍ ពិធីបួងសួង និងក្រុងពាលី កីឡាជិះកង់កម្សាន្ត ១០គីឡូម៉ែត្រ រត់ប្រណាំងកម្សាន្ត ការប្រកួតកីឡាបាល់ទាត់ បាល់ទះមិត្តភាព
កីឡាប៉េតង់ ប្រដាល់គុណខ្មែរអន្តរជាតិ កីឡាចំបាប់បុរាណ កីឡាទាញព្រ័ត្រ ការប្រកួតអុកចត្រង្គ ការតាំងពិព័រណ៍កសិទេសចរណ៍ ផលិតផលសហគ្រាសធុនតូច និងមធ្យម ផលិតផលបរទេស មហោស្រពម្ហូបអាហារ និងភេសជ្ជៈ ការសម្តែងទស្សនីយភាពសិល្បៈវប្បធម៌ និងការប្រគំតន្ត្រីការបាញ់កាំជ្រួចអបអរសាទរបុណ្យទន្លេ។
គួរកត់សម្គាល់ សម្តេចតេជោនាយករដ្ឋមន្ត្រី ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នឹងអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីបើកបុណ្យទន្លេលើកទី៦ នៅខេត្តបាត់ដំបងនេះ នាថ្ងៃទី ១៤ មីនា ឆ្នាំ២០២០ ខាងមុខនេះ។
សូមជម្រាបជូនថា ពិធីបុណ្យទន្លេត្រូវបានកំណត់ដោយអនុក្រឹត្យលេខ ២៦៥ អនក្រ.បក ចុះថ្ងៃទី១ ខែតុលា ឆ្នាំ២០១៤ ក្នុងគោលបំណងបង្កើតព្រឹត្តិការណ៍ទេសចរណ៍សម្រាប់ខេត្តជាប់ដងទន្លេ ពិសេសរួមចំណែកដល់ការជំរុញ និងអភិវឌ្ឍតំបន់តាមដងទន្លេកម្ពុជាឲ្យក្លាយជាប៉ូលទេសចរណ៍ដ៏ទាក់ទាញ ស្របតាមយុទ្ធសាស្ត្រពិពិធកម្មផលិតផលទេសចរណ៍របស់រាជរដ្ឋាភិបាល លើកកម្ពស់គុណភាពសេវាកម្មទេសចរណ៍ និងបំផុសមហាជនក្នុងការអភិរក្សធនធានធម្មជាតិតាមដងទន្លេ ព្រមទាំងជំរុញការតភ្ជាប់ និងពង្រឹងភាពជាដៃគូជាមួយប្រទេសជាមិត្ត។
ព្រមជាមួយនេះ ពិធីបុណ្យទន្លេក៏ជាឱកាសដ៏ប្រសើរដើម្បីជំរុញឲ្យគ្រប់ភាគីពាក់ព័ន្ធទាំងអស់ ចូលរួមក្នុងចលនាប្រឡងប្រណាំង ទីក្រុងស្អាត រមណីយដ្ឋានស្អាត សេវាល្អ និងបដិសណ្ឋារកិច្ចល្អ ការប្រឡងប្រណាំងទីក្រុងស្អាតកម្ពុជា និងការប្រឡងប្រណាំងទីក្រុងទេសចរណ៍ស្អាតអាស៊ាន ការអភិវឌ្ឍផលិតផលទេសចរណ៍តាមដងទន្លេ (River-based Tourism) ជាពិសេសការអភិវឌ្ឍនាវាទេសចរណ៍ តាមដងទន្លេមេគង្គតាមស្តង់ដារអាស៊ាន (ASEAN Mekong River Cruise Standard) និងការអប់រំយល់ដឹងជាសាធារណៈដល់ប្រជាពលរដ្ឋមូលដ្ឋានអំពីសារប្រយោជន៍នៃធនធានតាមដងទន្លេ៕ដោយ៖កូឡាប