ប្រធានាធិបតីឥណ្ឌូនេស៊ី លោក Joko Widodo នៅថ្ងៃចន្ទនេះបាននិយាយថា ជនជាតិឥណ្ឌូនេស៊ី ២នាក់មានផ្ទុកវីរុសកូរ៉ូណា (COVID-19)។ នេះជាករណីដំបូងបង្អស់នៅក្នុងប្រទេសឥណ្ឌូនេស៊ី។
លោកបាននិយាយថា ស្រ្តីវ័យ ៦៤ឆ្នាំម្នាក់ និងកូនស្រីគាត់អាយុ ៣១ឆ្នាំ ត្រូវបានគេធ្វើតេស្តរកឃើញមានផ្ទុកវីរុស ក្រោយពេលមានទំនាក់ទំនង ជាមួយនឹងជនជាតិជប៉ុនម្នាក់ ដែលរស់នៅក្នុងប្រទេសម៉ាឡេស៊ី។ ជនជាតិជប៉ុននោះ ត្រូវបានរកឃើញមានផ្ទុកវីរុស ក្រោយពេលគាត់ត្រឡប់មកពីដើរកម្សាន្តនៅប្រទេសឥណ្ឌូនេស៊ី និងបានរកឃើញមានផ្ទុកវីរុស ។
លោកបញ្ជាក់ទៀតថា ក្រុមពេទ្យឥណ្ឌូនេស៊ីបានធ្វើការតាមដាន ការធ្វើដំណើររបស់ជនជាតិជប៉ុននោះ មុនពេលរកឃើញករណីឆ្លងវីរុស។
“ក្រោយពេលពិនិត្យ ពួកគេកំពុងស្ថិតក្នុងដំណាក់កាលឈឺ។ នៅព្រឹកនេះ ខ្ញុំបានទទួលរបាយការណ៍ថា ស្រ្តីម្នាក់ និងកូនស្រីរបស់គាត់មានផ្ទុកវីរុសកូរ៉ូណា”។ អ្នកទាំងពីរនោះកំពុងត្រូវបានព្យាបាលនៅមន្ទីរពេទ្យ Sulianti Saroso ក្នុងទីក្រុងហ្សាការតា។
រដ្ឋមន្រ្តីសុខាភិបាលឥណ្ឌូនេស៊ី បានថ្លែងប្រាប់អ្នកសារព័ត៌មានថា ជនជាតិជប៉ុននោះគឺជាមិត្តភក្តិរបស់គ្រួសារស្រ្តីទាំង ២ និងបានទៅលេងផ្ទះរបស់ពួកគេ។
សូមបញ្ជាក់ថា ពិភពលោកទាំងមូលកំពុងមានការព្រួយបារម្ភយ៉ាងខ្លាំង ពីការផ្ទុះរីករាលដាលពីវីរុសមរណៈ ដែលបានផ្ទុះដំបូងក្នុងប្រទេសចិន។ រហូតមកដល់ពេលនេះ វីរុសដ៏កំណាចនោះ បានផ្តាច់ជីវិតមនុស្សជិត ៣.០០០នាក់ ចម្លងទៅកាន់មនុស្សជាង ៨០.០០០នាក់ និងរាតត្បាតដល់ប្រទេសជិត ៦០ទូទាំងពិភពលោក៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
