តាកែវ៖ លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានធ្វើការអំពាវនាវឲ្យបងប្អូនប្រជាពលរដ្ឋនៅក្នុងខេត្តតាកែវ ត្រូវមានការប្រុងប្រយ័ត្នខ្ពស់ទៅលើបញ្ហាអគ្គិភ័យ ពីព្រោះនៅក្នុងរដូវនេះ គឺជារដូវក្តៅស្ងួត ដែលជាហេតុធ្វើឲ្យមាន ការកើតឡើងនៅអគ្គិភ័យ ដែលធ្វើឲ្យខាតបង់ទ្រព្យសម្បត្តិរបស់បងប្អូនប្រជាពលរដ្ឋ ដូច្នេះដើម្បីជៀសវាងនៅការកើតឡើងនៅហេតុការគ្រោះអគ្គិភ័យនេះដែរ បងប្អូនប្រជាពលរដ្ឋមិនត្រូវឆ្វេសប្រហែសឡើយ ជាមួយនឹងភ្លើងទៀន ធូប ប្រព័ន្ធអគ្គិសនី ជាពិសេសភ្លើងកន្ទុយបារី ដែលបានបោះចោលពាសវាលពាសកាលនោះតែម្តង ។
ថ្លែងបែបនេះ គឺក្នុងពេលដែលលោកស្នងការ បានអញ្ជើញចូលរួមក្នុងពិធីប្រកាសតែងតាំងមុខតំណែងថ្មី និងបំពាក់ឋានន្តរស័ក្ត ជូនដល់មន្ត្រីនគរបាលជាតិ នៃស្នងការនគរបាលខេត្តតាកែវ ចំនួន ១៨២រូប នាព្រឹកថ្ងៃទី ២ ខែមីនា ឆ្នាំ២០២០ នៅសាលប្រជុំនៃស្នងការដ្ឋាន ។
លោក សុខ សំណាង បានសង្កត់ធ្ងន់និងធ្វើការណែនាំឲ្យដល់មន្ត្រីនគរបាលជាតិទាំងអស់ ត្រូវតែបន្តស្វែងយល់បន្ថែមទៅលើប្រព័ន្ធបច្ចេកវិទ្យា ពីព្រោះបច្ចេកវិទ្យាសម័យទំនើបនេះ គឺមានលក្ខណៈងាយ ស្រួលច្រើនទៅលើការងារដែលកំពុងអនុវត្តរបស់នគរបាលជាតិ ដូចជាការចេះប្រើប្រាស់ប្រព័ន្ធផែនទី Google Earth ដែលបានធ្វើឲ្យមន្រ្តីជំនាញបានយល់ដឹងច្បាស់ ពីភូមិសាស្ត្រច្បាស់លាស់ ទៅលើការមើលផែនទី និងកំណត់មើលគោលដៅ ។ បើសិនជានគរបាលយើង បានយល់ច្បាស់ពីបច្ចេកវិទ្យានោះ គឺងាយស្រួលមែនទែនទៅលើការកំណត់គោលដៅ ដូចជាករណីអគ្គិភ័យ យើងអាចដឹងថា តើប្រភពទឹកនៅទីកន្លែងណាដែលស្ថិតនៅក្បែរកន្លែងកើតហេតុ ដូច្នេះរថយន្តពន្លត់អគ្គិភ័យដែលទៅជួយអន្តរាគមន៍នោះ អាចធ្វើការបូមទឹកបានលឿននិងរហ័ស ដែលជាកត្តាងាយស្រួលក្នុងការជួយអន្តរាគមន៍ពន្លត់នៅអគ្គិភ័យ ដែលកើតមានឡើងបានទាន់ពេលវេលា ហើយមួយវិញទៀតមន្ត្រីនគរបាលនៃកងអន្តរាគមន៍ពន្លត់អគ្គិភ័យនោះ ដាច់ខាតមិនត្រូវប៉ះពាល់នូវលុយកាក់របស់ពលរដ្ឋឡើយ៕ដោយ៖តាកែវ