ភ្នំពេញ៖ លោកស្រី Solida Chhaiychanrithy អនុរដ្ឋលេខាធិការក្រសួងព័ត៌មាន បានសរសេរសារលើហ្វេសប៊ុកថា ផ្ទះនេះមិនមានមនុស្សនៅទេប៉ុន្តែវិក្កយបត្រខែនេះអស់ជាង៥លានរៀល(ជាងមួយពាន់ដុល្លារ) ពេលយើងទៅសួរនាំភាពមិនប្រក្រតីនេះ ក៏ជួបមន្ត្រីជំនាញ ប៉ន្តែសម្គាល់ឃើញថា នៅមានមន្ត្រីរក្សាឥរិយាបទមិនតាមកំណែទម្រង់ស៊ីជម្រៅរបស់រាជរដ្ឋាភិបាលសោះ។
លោកស្រី បានបន្តថា “ជួយពិចារណាផងបងប្អូនអើយផ្ទះនៅលើផ្លូវក្នុងក្រុង មិនមានកាយដីធ្វើផ្លូវឬដាក់លូទេ ហើយក៏គ្មានអ្នកលួចទឹកចេញពីផ្ទះនេះដែរហេតុអ្វីលោកទឹកអស់ជាងប្រាំលាន ខណ:អគ្គិសនីអស់តែបីពាន់រៀល? ឬនាឡិកាស្ទង់នោះវិលមុខ? “។
លោកស្រី បានបញ្ជាក់ថា “យើងស្នើសុំឲ្យមន្ត្រីផ្នែក(ជាង) មកជួយមើលពីភាពមិនប្រក្រតីនេះ គេថាចាំសប្តាហ៍ក្រោយយ៉ាងហី! សុំថ្ងៃត្រឹមថ្ងៃចន្ទក្រោយនេះ ក៏មន្ត្រីមិនព្រមទេ ចាំមួយសប្ដាហ៍សិន។ អញ្ចឹងបើត្រូវបង់មួយខែៗ ជាងមួយពាន់ដុល្លារនោះ ខ្ញុំសូមប្រកាសលក់ផ្ទះនេះចោល ព្រោះគ្មានលុយបង់ទឹកទេ”។
ទោះយ៉ាងណា នៅថ្ងៃទី២មីនា រដ្ឋាករទឹក បានចេញប្រកាសព័ត៌មាន ដោយបានរកឃើញកំហុសអតិថិជនម្នាក់ដែលបានបង្ហោះហ្វេសបុកថា ផ្ទះគ្មានមនុស្សនៅសោះ តែប្រើទឹកអស់ជាង ៥លានរៀល នោះបណ្តាលមកពីទឹកហូរក្នុងបង្គន់ចោល ដែលបិទវ៉ាន មិនជិត។
បន្ទាប់ពីមានការបង្ហោះ ក៏ដូចផ្សាយព័ត៌មានថា មានប្រជាពលរដ្ឋមួយរូបរស់នៅរាជធានីភ្នំពេញ បានប្រតិកម្មខ្លាំងៗនឹងរដ្ឋាករទឹកស្វយ័តរាជធានីភ្នំពេញ ដោយអះអាងថា “ផ្ទះគ្មានមនុស្សនៅសោះ វិក្កយបត្រទឹកចេញមកអស់ជាង៥លានរៀល” ។
គណនីហ្វេសប៊ុកឈ្មោះ “Solida Chhaiychanrithy” ដែលធ្វើអោយផ្អើលដល់មហាជន សារព័ត៌មាន ក៏ដូចអង្គភាពរដ្ឋាករទឹកនោះ គឺបានបង្ហោះកាលពីថ្ងៃទី២៨ ខែកុម្ភៈ ឆ្នាំ២០២០ នេះថា “ផ្ទះនេះមិនមានមនុស្សនៅទេ ប៉ុន្តែវិក្កយបត្រខែនេះអស់ជាង៥លានរៀល(ជាងមួយពាន់ដុល្លារ) នោះរួចមក ។ នៅថ្ងៃទី២ ខែមីនា នេះខាងក្រុមជំនាញបានចុះទៅទីតាំង ជាមួយម្ចាស់ផ្ទះជាលទ្ធផលរកឃើញថាគឺទឹកហូរចោលក្នុងបង្គន់ដែលខូចពោង ដោយសម្ពាធទឹកខ្សោយ ធ្វើអោយទឹកនេះហូរតែពេលយប់ និងម្យ៉ាងទៀតវ៉ាននាឡិកាខូចបិទមិនជិត នេះជាបញ្ហាដែលម្ចាស់ផ្ទះយល់ថា បានបិទទឹកហើយម៉េចបានទឹកបង្គន់ហូរទៅកើត ។
មន្ត្រីជំនាញក៏បានដោះនាឡិកា យកវាស់ស្ទង់រួចហើយ គឺរកឃើញពុំមានបញ្ហាទេ ។ ជាមួយនេះ ខាងមន្ត្រីបានថតលេខ នាឡិកានោះពីថ្ងៃ សៅរ៍ និង ថ្ងៃ ចន្ទ នេះឃើញខុសគ្នារហូត ដល់ 4 ម៉ែត្រគីប ឯណោះ។
ក្រោយពីរកឃើញលទ្ធផលជាក់ស្តែងយ៉ាងនេះ ម្ចាស់ផ្ទះបាន យល់ព្រមចុះហត្ថលេខាលើកំណត់ហេតុ នឹងប្រាប់ទៅកូនគាត់បន្តទៀតដើម្បីឲ្យបានដឹងរឿងទាំងនេះ និងកុំអោយមានការភាន់ច្រលំ ដែលនាំដល់ផ្សព្វផ្សាយព័ត៌មាន មិនពិត ៕ ដោយ៖កូឡាប