សៀមរាប ៖លោកថោង ខុន រដ្ឋមន្ត្រីក្រសួងទេសចរណ៍ និងប្រតិភូក្រសួង បានផ្សព្វផ្សាយ និងដាក់ឱ្យអនុវត្តនូវវិធានការចាំបាច់ សកម្មភាពការងារជាអាទិភាព និងគម្រោងព្រឹត្តិការណ៍សំខាន់ ដើម្បីជួយខេត្តសៀមរាបក្នុងដំណាក់កាលវិបត្តិនៃ Covid-19 ដល់ប្រតិបត្តិករ និងមគ្គុទ្ទេសក៏ទេសចរណ៍ខេត្តសៀមរាប ប្រមាណជាង ៣០០នាក់ នាល្ងាចថ្ងៃទី ២ ខែមីនា ឆ្នាំ២០២០ នៅសណ្ឋាគាររីជែនស៊ីអង្គរ ។
ប្រតិបត្តិករ និងមគ្គុទេ្ទសក៏ទេសចរណ៍ដែលបានចូលរួមកិច្ចប្រជុំនេះ មានក្តីរីករាយ និងសូមចូលរួមគាំទ្រ និងអនុវត្តតាមវិធានការគាំទ្រ ៧ចំណុ របស់រាជរដ្ឋាភិបាល និងផែនការសកម្មភាពការងារចំពោះមុខរបស់ក្រសូងទេសចរណ៍ ដើម្បីជួយស្រោចស្រង់ឧស្សាហកម្ម និងសេវាកម្មទេសចរណ៍ខេត្តសៀមរាប ក្នុងដំណាក់កាលវិបត្តិ Covid-19 នេះ។
ជាកិច្ចចាប់ផ្តើម លោកថោង ខុន បានជម្រាបជូនអង្គប្រជុំពីសភាពការណ៍វិវត្តន៍ នៃវិស័យទេសចរណ៍ក្នុងឆ្នាំ២០១៩ និងនៅដើមឆ្នាំ២០២០ ពិសេសក្នុងដំណាក់កាលនៃវិបត្តិCovid-19 ដែលបាននិងកំពុងប៉ះពាល់ដល់ វិស័យទេសចរណ៍សកលលោក តំបន់ និងកម្ពុជាផងដែរ។ ដោយឡែក នៅខេត្តសៀមរា
បក៏សង្កេតឃើញមានការថមថយនៃចំនួនទេសចរផងដែរ។
លោករដ្ឋមន្ត្រី បានបញ្ជាក់ជូនអង្គប្រជុំថា មកដល់ពេលនេះ កម្ពុជានៅតែជាគោលដៅទេសចរណ៍ប្រកបដោយសុខសុវត្ថិភាព និងភាពទាក់ទាញ និងមិនមានកើតជំងឺ Covid-19 ទេ។ ជាងនេះទៀត ឆ្លើយតបនឹងវិបត្តិ Covid-19 នេះ រាជរដ្ឋាភិបាលបានដាក់ចេញវិធានការចាំបាច់ ៧ចំណុច ដើម្បីគាំទ្រវិស័យទេសចរណ៍ ហើយក្រសួងទេសចរណ៍ក៏បានបង្កើតនូវក្រុមការងារមួយដើម្បីជំរុញ និងលើកស្ទួយវិស័យទេសចរណ៍ក្នុងដំណាក់កាលវិបត្តិ និងបានដាក់ចេញនូវផែនការសកម្មភាពការងារចំពោះមុខ ២០២០-២០២១ ដែលផែនការនេះមានគោលដៅយុទ្ធសាស្ត្រ០៤ និងសកម្មភាពការងារចំនួន ៩០។
ក្នុងកិច្ចប្រជុំនេះ មន្ត្រីជំនាញក្រសួងទេសចរណ៍ បានឡើងធ្វើបទបង្ហាញលើការងារសំខាន់ៗ ដែលត្រូវផ្សព្វផ្សាយ និងដាក់ឲ្យអនុវត្តនៅខេត្តសៀមរាប រួមមាន៖ ការជំរុញចលនាទេសចរណ៍ក្នុងស្រុក និងពង្រឹងគុណភាពឧស្សាហកម្មទេសចរណ៍។ ការបណ្ដុះបណ្ដាល និងពង្រឹងសមត្ថភាពអ្នកជំនាញទេសចរណ៍។ ការរៀបចំព្រឹត្តិការណ៍នៅខេត្តសៀមរាបឆ្នាំ២០២០។ ការជំរុញចលនាផ្សព្វផ្សាយក្រៅប្រទេស និងបញ្ជ្រាបការយល់ដឹងជាសាធារណៈកម្ពុជាជាគោលដៅទេសចរណ៍សុវត្ថិភាពក្នុងដំណាក់កាលវិបត្តិ៕ដោយ៖បញ្ញាស័ក្តិ