ខេត្តមណ្ឌលគិរី៖ ថយន្តកែច្នៃមួយគ្រឿង ដឹកឈើពេញប្រៀប ត្រូវបានកម្លាំងកងរាជអាវុធហត្ថចុះបង្ក្រាបទាំងកណ្តាលអធ្រាត្រ។ ហេតុការណ៍នេះ ដឹកនាំដោយលោក ហឿន សុខណា ក្រុមលេខាធិការដ្ឋាន នៃគណៈបញ្ជាការឯកភាពស្រុក កែវសីមា កាលពីនៅវេលាម៉ោង ១២ និង១០នាទីយប់ ថ្ងៃទី៣ ខែមីនា ឆ្នាំ២០២០ ស្ថិតនៅត្រង់ចំណុចជិតខ្ទមអ្នកតា ក្នុងភូមិស្រែអំពិលក្រោម ឃុំស្រែខ្ទុម ស្រុកកែវសីមា។
សមត្ថកិច្ចឱ្យដឹងថា ក្រុមលេខាធិការដ្ឋានខាងលើ បានចុះល្បាតរុករកបទល្មើសនៅគោលដៅនានា ក្នុងឃុំស្រែខ្ទុម រួចក៏ប្រទះឃើញរថយន្តកែច្នៃចំការលើ ១គ្រឿងដឹកឈើប្រភេទលេខ១(សុក្រម ) ចំនួន ១០ដុំ ជាប្រភេទឈើមូល។
ចំណែកអ្នកបើកបរបានរត់គេចខ្លួនបាត់ស្រមោល ទំនងជាអាចដឹងខ្លួនមុន៕ ដោយ៖ ដែន សីមា
