ភ្នំពេញ៖ លោកអភិបាលរាជធានីភ្នំពេញ បានបញ្ជាក់ថា ដោយពិនិត្យមើលឃើញ ពីសភាពដំបូល និងសំណង់តូបមួយចំនួនធំ មានសភាពច្បាស់ទ្រុឌទ្រោម ដែលខ្លាចមានបញ្ហាហានិភ័យកើតឡើងជាយថាហេតុ គ្រោះថ្នាក់ទៅលើប្រជាពលរដ្ឋដែលមកផ្សារនេះ ទើបលោក ដឹកនាំមន្ត្រីជំនាញ ចុះមកធ្វើការសិក្សា និងស្រង់មតិពីប្រជាពលរដ្ឋ ដើម្បីរៀបគម្រោងក្នុងការជុសជុលឡើងវិញ ។
នៅវេលាម៉ោង ៨និង ៣០នាទីនាថ្ងៃទី៣ ខែមីនា ឆ្នាំ២០២០ ស្ថិតនៅចំណុច ផ្សារស្ទឹងមានជ័យ ក្រុមទី២ ភូមិថ្មី សង្កាត់ ស្ទឹងមានជ័យទី១ ខណ្ឌមានជ័យ រាជធានីភ្នំពេញ លោកឃួង ស្រេង អភិបាល នៃគណៈអភិបាលរាជធានីភ្នំពេញ ដឹកនាំមន្ត្រីជំនាញក្រោមឱវាទចុះត្រួតពិនិត្យសំណង់ផ្សារស្ទឹងមានជ័យ ដែលមានអាយុកាលយូរឆ្នាំ តាំងពីសម័យរដ្ឋកម្ពុជា បច្ចុប្បន្នមានសភាពចាស់ទ្រុឌទ្រោម ដើម្បីធ្វើការវាយតម្លៃ និងសិក្សាក្នុងការជុសជុល និងស្ថាបនាផ្សារនេះឲ្យមានសភាពថ្មីឡើងវិញ។
លោក បានធ្វើការណែនាំឲ្យ អាជីវករ ប្រជាពលរដ្ឋ កុំឲ្យមានការយល់ច្រលំ ក្នុងការត្រួតពិនិត្យនេះ មិនមែនដើម្បីយកផ្សារទៅវិនិយោគលើអ្វីផ្សេងនោះទេ គឺការចុះត្រួតពិនិត្យនេះ ដើម្បីត្រួតពិនិត្យ និងវាយតម្លៃ ក្នុងការរៀបចំការជុសជុលឡើងវិញ ជូនដល់ប្រជាពលរដ្ឋដែលជាអាជីវករ ឲ្យលក់ដូរដំណើរការជាធម្មតា ចៀសវាងមានបញ្ហាអ្វីកើតឡើងជាយថាហេតុ ទៅលើអាជីវករ ក៏ដូចជាអតិថិជន ។
លោកអភិបាលរាជធានីភ្នំពេញ បានបញ្ជាក់ប្រាប់ទៅអាជីវករថា ក្នុងនាមអាជ្ញាធររាជធានីភ្នំពេញ ដែលជាម៉ែ ជាឪរបស់បងប្អូនប្រជាពលរដ្ឋ តែងបានគិតគូរយ៉ាងខ្លាំង អំពីសុខទុក្ខនិងការលំបាករបស់ប្រជាពលរដ្ឋ ។ ជាក់ស្ដែងនៅពេលនេះ ផ្សារស្ទឹងមានជ័យចាស់ ដែលបានកសាងឡើងតាំងពីទសវត្សរ៍ទី៦០មកនោះ ឃើញថាមានសភាពចាស់ទ្រុឌទ្រោម ហើយវានឹងអាច បង្កគ្រោះថ្នាក់ដល់បងប្អូនអាជីវករ និងប្រជាពលរដ្ឋ ខណៈដែលមានភ្លៀងឬខ្យល់កន្ត្រាក់ម្តងៗ ។ រដ្ឋបាលរាជធានីភ្នំពេញ គ្រោងនឹងធ្វើការជួសជុលផ្សារនេះឲ្យបានល្អប្រសើរឡើងវិញ។ ប៉ុន្តែទោះបីជាយ៉ាងណាក្តីលោកឃួង ស្រេង បានបញ្ជាក់ថា គម្រោងនេះ បើបងប្អូនអាជីវករ មានការជំទាស់មិនឲ្យធ្វើការជួសជុលឡើងវិញទេ អាជ្ញាធរក៏មិនធ្វើការជួសជុលវិញដែរ ។ តែបើមានប្រជាពលរដ្ឋអាជីវករ មានការគាំទ្រច្រើន លើសពីអ្នកមិនគាំទ្រ រដ្ឋបាលរាជធានីភ្នំពេញ នឹងធ្វើការជួសជុលឲ្យបានល្អប្រសើរ ដោយរក្សានូវលំនាំដើមទាំងស្រុង។
គួរបញ្ជាក់ផងដែរថា ផ្សារស្ទឹងមានជ័យចាស់តាមការបញ្ជាក់របស់អាជ្ញាធរមូលដ្ឋានបានឲ្យដឹងថា ផ្សារនេះ
បានកសាងឡើងក្នុងឆ្នាំ១៩៦៤ ដោយធ្វើអំពីឈើប្រក់ក្បឿងដែលមានទំហំ១៣ ម៉ែត្រគុណនឹង១៨ ម៉ែត្រ។ ប៉ុន្តែមកដល់ពេលនេះ ដោយសារសត្វល្អិត ដូចជាកណ្តៀរ ខ្មូតជាដើមជាដើមចូលស៊ី និងដោយសារមានអាយុកាលយូរហើយនោះ បានធ្វើឲ្យតួផ្សារមានលក្ខណៈពុកផុយ ទើបរដ្ឋបាលខណ្ឌមានជ័យ ស្នើសុំមករដ្ឋបាលរាជធានីភ្នំពេញ ឲ្យធ្វើការជួសជុលឡើងវិញ ព្រោះខ្លាចមានគ្រោះថ្នាក់ដោយយថាហេតុដល់បងប្អូនប្រជាពលរដ្ឋនិងអាជីវករ៕ដោយ៖កូឡាប
