ខេត្តស្វាយរៀង៖ ប្រជាពលរដ្ឋបានប្រទះឃើញសាកសពស្ត្រីម្នាក់ ជាអ្នកដើររើសអេតចាយដេកស្លាប់ជាប់ចិញ្ចើមថ្នល់ នៅព្រឹកថ្ងៃទី៣ ខែមីនា ឆ្នាំ២០២០នេះ គឺបានដឹងនូវមូលហេតុហើយ ក្រោយពីសមត្ថកិច្ចធ្វើកុសល្យវិច័យសាកសពរួច និងសន្និដ្ឋានជាករណីគ្រោះថ្នាក់ចរាចរណ៍។
យោងតាមសមត្ថកិច្ចបានឲ្យដឹងថា៖ នៅព្រឹកថ្ងៃទី៣ ខែមីនា ឆ្នាំ២០២០ ស្ថិតតាមបណ្ដោយផ្លូវជាតិលេខ១ នៅក្នុងភូមិ ជ្រៃធំ សង្កាត់ ព្រៃអង្គុញ ក្រុងបាវិត ខេត្តស្វាយរៀងដោយមានប្រជាពលរដ្ឋបានប្រទះឃើញ សាកសពស្ត្រីម្នាក់ ដេកស្លាប់ជាប់ចិញ្ជើមថ្នល់ជាតិលេខ១ និងក្រោយពីទទួលព័ត៌មានខាងលើនេះភ្លាម សមត្ថកិច្ចជំនាញនិងគ្រូពេទ្យ ដោយមានការសម្របសម្រួល ពីលោកព្រះរាជអាជ្ញា បានពិនិត្យលើខ្លួនសាកសព។
សមត្ថកិច្ចបានបន្តទៀតថា៖ បន្ទាប់ពីពិនិត្យលើទើបដឹងថា សាកសពខាងលើមានឈ្មោះ នាង ណារី អាយុ ៥៧ឆ្នាំ ជនជាតិខ្មែរមុខររបរមិនពិតប្រាកដ (វិកលចរិក) មានទីលំនៅភូមិ ព្រៃភ្នៀត ឃុំសំឡី ស្រុក កំពង់រោទិ៍ ខេត្តស្វាយរៀង ហើយនៅលើសាកសពមានសភាព បាក់ភ្លៅសងខាង មានដាច់រលាត់កំភួនជើងខាងស្តាំ និងរលាត់សៀតផ្កាខាងឆ្វេង ផ្អែកតាមការសន្និដ្ឋាន គណៈកម្មការកោសល្យវិច័យ បានឱ្យដឹងថា ជាករណីគ្រោះថ្នាក់ចរាចរណ៍ ហើយនៅក្បែរសាកសព មានការុងដាក់អេតចាយ និងលុយខ្មែរចំនួន៤៨០.០០០រៀល៕ដោយ៖វ៉ៃកូ
